Month: July 2021

“Өглөөний Улаанбаатар” төслийн хүрээнд “Өглөөний гудамж”-ыг тохижуулах ажлыг Нийслэлийн хот тохижилтын газар ОНӨТҮГ хийж байна. Энэ талаар Нийслэлийн хот тохижилтын газрын орлогч дарга Д.Батболд “Өглөөний гудамжид үйл ажиллагаа явуулах аж ахуй нэгжүүд өглөө эрт тусгай цагийн хуваариар ажиллана. Лекц, сургалт, сайн дурын ажил гэх мэт төрөл бүрийн арга хэмжээг энд зохион байгуулах юм. Тохижилтын ажил 60 хувьтай явж байна. Одоогоор усан оргилуур, цэцэгжүүлэлт, явган хүний замын ажил дууссан. Гудамжны гэрэлтүүлэг, “Өглөөний улаанбаатар” хөшөө, арга хэмжээ явуулах тайзыг хийж, үйлчилгээний байгууллагуудын гадна фасадыг будсанаар тохижуулж дуусах юм. “Өглөөний гудамж” ирэх сарын 1-нээс нээлтээ хийнэ” гэв.

Өнөөдөр буюу долдугаар сарын 10-нд зарим эрхэмд төрийн дээд одон медаль гардуулж байна. “Чингис хаан” хамтлагийн дуучин Д.Жаргалсайханд Ардын жүжигчин цол олгожээ.

Тэрээр “Тусгаар тогтнолоо бататгасан 100 жилийн ойн дээр энэхүү төрийн хүндэтгэлтэй шагналыг хүртсэндээ баяртай байна. Монголын сонгодог урлаг, ардын урлаг тэр дундаа рок попын урлаг хөгжиж, 50 жилийн ойгоо тэмдэглэж байна. Энэхүү шагнал нь рок поп хөгжмийг төрийн хэмжээнд дахин үнэлж байгаа нотолгоо гэж бодож байна. Намайг дэмжсээр ирсэн сонсогчиддоо баярлалаа. Та бүхний хүчээр өдий зэрэгтээ яваа гэдгээ ойлгодог” хэмээлээ.

Монгол Улсын Үндсэн хуулийн Гучин гуравдугаар зүйлийн 1 дэх хэсгийн 7 дахь заалт, Гучин дөрөвдүгээр зүйлийн 1, Монгол Улсын Ерөнхийлөгчийн тухай хуулийн 9 дүгээр зүйлийн 1, 15 дугаар зүйлийн 1 дэх хэсэг, Монгол Улсын Ерөнхийлөгчийн 2021 оны хоёрдугаар сарын 03-ны өдрийн 07, 2021 оны гуравдугаар сарын 15-ны өдрийн 37 дугаар зарлигийг тус тус үндэслэн Монгол Улсын Ерөнхийлөгч У.Хүрэлсүх зарлиг гаргаж, цэргийн дээд цол хүртээлээ.

ЦЭРГИЙН ДЭЭД ЦОЛ ХҮРТЭЭХ ТУХАЙ МОНГОЛ УЛСЫН ЕРӨНХИЙЛӨГЧИЙН ЗАРЛИГААР:

1. Тагнуулын Ерөнхий газрын дарга, хурандаа Пэлжээгийн Одонбаатар,
2. Цагдаагийн Ерөнхий газрын дарга, хурандаа Жамсранжавын Болд нарт Хошууч генерал цол,
3. Төрийн тусгай хамгаалалтын газрын дарга, хурандаа Пүрэвжавын Батаад Бригадын генерал цолыг тус тус хүртээв.

Ерөнхийлөгч У.Хүрэлсүх “Эрхэм хүндэт генералууд аа!

Тулгар төрийн 2230, Их Монгол Улсын 815, Үндэсний эрх чөлөө, тусгаар тогтнолоо сэргээн мандуулсны 110, Ардын хувьсгалын 100 жилийн ойг тохиолдуулан Монгол Улсын Ерөнхийлөгч, Зэвсэгт хүчний Ерөнхий командлагч “Цэргийн дээд цол хүртээх тухай” зарлиг гаргаж, өнөөдөр цагдаа, тагнуул болон төрийн тусгай хамгаалалтын байгууллагын албан хаагчдад хуулийн дагуу генерал цол олгож байна.

Монгол Улс 1994 оноос генерал цолыг бий болгон, хууль журмын дагуу олгож ирсэн түүхэн уламжлалтай. Төрийн тусгай албад бол ард иргэд, нийгмийн амар амгалан байдлыг сахин хамгаалж, эрсдэлт нөхцөлд тушаалаар үүрэг гүйцэтгэдэг онцгой үүрэг хариуцлагатай салбар юм. Эдгээр салбарыг удирдаж, албаны үүрэг даалгаврыг чанд биелүүлж, улстөржилтөөс ангид байж, нийгэмдээ болон ард иргэддээ үйлчлэх тангарагтаа үнэнч байж, нэгэн үзүүрт сэтгэлээр сахин биелүүлж байдаг Та бүхэнд ард иргэдийнхээ нэрийн өмнөөс талархал илэрхийлье.

Та бүхэн төрийн тусгай албанд олон жил үр бүтээлтэй, тогтвортой ажиллаж, өргөсөн тангарагтаа үнэнч байж, цолныхоо шаардлагад нийцсэн хүмүүс гэж үзэж байна.

Генерал цол бол нэн хүндтэй цол бөгөөд энэ цолоор дамжин үүрэг хариуцлага нэмэгдэж байгаа гэдгийг онцлон тэмдэглэж хэлэхийг хүсэж байна. Цолыг даган ирж байгаа хүндэтгэл, итгэл хариуцлагыг дааж, цолондоо тэнцэхүйц ёс зүйтэй, хичээл зүтгэл, эрч хүчтэй ажиллах даалгавар Та бүхний мөрөн дээр энэ мөрдөстэй хамт ирж байгааг үргэлж санаж яваарай.

Эрхэм нөхөд өө!

Эх орныхоо төлөө зүтгэж буй цэрэг эрс, цэргийн мөрдөстөн Та бүхний ард гэр бүл, үр хүүхдүүд нь байдаг. Цэргийн хүний гэр бүл бол төрийн цэргийн байгууллагын бат бэх ар тал, ёс суртахууны үндэс суурь болдог гэж би бодож явдаг.

Амжилт ололт, алдаа оноо бүрийн чинь ард сэтгэл догдлон байдаг цэргийн албан хаагчдын гэр бүл, эрхэм хүндэт генералууд Та бүхний гэр бүл, үр хүүхдүүдэд Монгол Улсын Зэвсэгт хүчний Ерөнхий командлагчийн хувьд чин сэтгэлийн халуун баяр хүргэж байна.

Монгол цэргийн яруу алдар бадрах болтугай!” гэлээ.

ХӨСҮТ-ийн дэд захирал Ж.Байгалмаа:

Манай улсад коронавируст халдварын хоёр том давлагаа бий болсон. Тодруулбал,2021 оны хоёрдугаар сарын сүүлээр эхэлсэн ба оргил үе 04.20-ноос хойш ажиглагдаж хөл хорионы дараа өвчлөл буурсан ч хоёр дахь давлагаа 06.10-даас эхлээд 06.20-нд хамгийн оргил үедээ хүрсэн. Энэхүү давлагаа цаашид хэрхэн үргэлжлэхийг бид ажиглаж байна. Дотоодын нийт халдвар нь Улаанбаатарт 60 хувь, орон нутагт 40 хувь нь бүртгэгдээд байна. Нас баралтын түвшин тавдугаар сард хамгийн оргил үедээ байсан бол хоёр дахь давлагааны үед нас баралтын түвшин харьцангуй буурсан.

Вакцин үнэхээр хамгаалж чадаж байна уу гэх асуулт их байна. Өмнөх давлагаанд вакцины үр нөлөөг харах боломжгүй байсан бол энэ удаад бүрэн тунгаа хийлгэсэн хүн 70 гаруй хувьтай байгаа нь үр дүнг харах боломжтой цаг үед ирсэн. Вакцин нь таныг халдвар авах эрсдэлээс тодорхой хэмжээнд буюу 70-95 хувиар хамгаална. Гэхдээ зэрлэг омгийн вирус буюу анхны төрлийн вирусаас хамгаална. Халдвар авсан ч хүндрэх, нас барах эрсдэлээс хамгаалагдана. Сүүлийн 4 долоо хоногт маш хүнд өвчилж байгаа хүний тоо буурсан буюу 2,8 хувь байсан бол 1,8 хувь болсон. Хөнгөн өвчтөн 50-64 хувь болж нэмэгдсэн. Үүнээс үзэхэд вакцины нөлөө гарч байна.

Улсын Дээд шүүхийн нийт шүүгчийн хуралдаан 2021 оны долдугаар сарын 9-ний өдөр хуралдаж, Монгол Ардын намын даргын өөрчлөлтийг бүртгүүлэх тухай хүсэлтийг хэлэлцээд тус намын Бага хурлын 2021 оны зургадугаар сарын 25-ны өдрийн XI хуралдаанаас Л.Оюун-Эрдэнийг намын даргаар сонгосон үйл ажиллагаа Улс төрийн намын тухай хууль болон тухайн намын дүрэмд нийцсэн байх тул намын даргын өөрчлөлтийг бүртгэж шийдвэрлэжээ.

Мөн Монгол Улсын шүүхийн тухай хуулийн 27 дугаар зүйлийн 27.1.5 дахь хэсэгт заасны дагуу Шүүхийн сургалт, судалгаа, мэдээллийн хүрээлэнгийн захирлаар Н.Отгончимэгийг томилох асуудлыг Улсын дээд шүүхийн Шүүгчдийн зөвлөгөөнд танилцуулсан байна.

Үндэсний их баяр наадмын амралтын өдрүүдэд арилжааны банкуудын ажиллах хуваарийг танилцуулж байна.

Төрийн банк

Үндэсний их баяр наадмын өдрүүдэд буюу долдугаар сарын 10-18-ны өдрийг дуусталх хугацаанд Улаанбаатар хотын нийт салбар амарна.

ХААН банк

ХААН банк Нарантуул тооцооны төв энэ сарын 10-нд, Замын-Үүд салбарын Хилийн боомт тооцооны төв энэ сарын 17-18-нд, Өмнөговь салбарын Оюутолгой тооцооны төв энэ сарын 12-17-нд, Сүхбаатар салбарын Бичигт тооцооны төв энэ сарын 10-11-нд, Сэлэнгэ салбарын Алтанбулаг тооцооны төв энэ сарын 10-нд болон 13-18-нд ажиллана. Мөн Хөвсгөл салбарын Мөрөн тооцооны төв энэ сарын 10-нд ажиллах бөгөөд ХААН банкны бусад салбарууд Бүх нийтийн амралтын өдрүүдээр буюу энэ сарын 11-18-нд ажиллахгүй аж.

Хас банк

Энэ сарын 11-16-нд Хас банкны И-март тооцооны төв ажиллана. Бусад салбар нэгжүүд Үндэсний их баяр наадмын өдрүүдэд амарна.

Голомт банк

Энэ сарын 10-нд Нарантуул зээлийн төв, Хархорин салбар ажиллана. Долдугаар сарын 19-нөөс салбарууд хуваарийнхаа дагуу ажиллана.

Худалдаа хөгжлийн банк

Энэ сарын 11, 13, 16-нд бүх салбарууд амарна. Харин энэ сарын 14-нд Сүхбаатар дүүргийн Картын үйлчилгээний төв, Чингэлтэй дүүргийн Урт цагаан тооцооны төв, Баянзүрх дүүргийн Баянцээл салбар, Баянгол дүүргийн 4 дүгээр хороолол тооцооны төв, Хан-Уул дүүргийн Зайсан салбар, Сонгинохайрхан дүүргийн Гурвалжин салбар ажиллана. Мөн энэ сарын 15-нд Сүхбаатар дүүргийн Төв талбай салбар, Чингэлтэй дүүргийн Бөмбөгөр салбар, Баянзүрх дүүргийн 13 дугаар хороолол тооцооны төв, Баянгол дүүргийн Төмөрзам салбар, Өргөө салбар, Хан-Уул дүүргийн Ривер гарден салбар, Хан-Уул – 2, салбар, Сонгинохайрхан дүүргийн 1 дүгээр хороолол тооцооны төв ажиллана.

Богд банк

Энэ сарын 10, 12, 13-нд Урт цагаан жижиг дунд бизнесийн зээлийн төв, 14, 15, 16-нд Бодь цамхаг салбар ажиллана.

Капитрон банк

Энэ сарын 12-13-нд Баянгол салбар, 14-15-нд Ард салбар, 11-18-нд Гурвалжин салбарын харьяа 1 дүгээр тооцооны касс, Их тойруу салбарын харьяа Улаанбаатар буян тооцооны касс ажиллах бөгөөд 12-16-нд бусад бүх салбар нэгжүүд амарна.

Ариг Банк

Үндэсний их баяр наадмын бүх нийтийн амралтын өдрүүдээр буюу 2021 оны долдугаар сарын 11-16-ны өдрүүдэд Ариг банкны салбар нэгжүүд амарна.