Month: December 2019

Сурагчдын өвлийн амралт эхэлж байгаатай холбогдуулан хүүхдийг угаарын хийн хордлогод өртөхөөс урьдчилан сэргийлэх зорилгоор эцэг эх, асран хамгаалагч та бүхэнд дараах сэрэмжлүүлгийг хүргэж байна.

Нийслэлийн ИТХ-ын ээлжит XXX хуралдаан боллоо. Хуралдаанаар Улсын тусгай хэрэгцээний талбайн хэмжээ, хилийн заагт өөрчлөлт оруулах санал уламжлах тухай, Монгол Улсын Засгийн газрын 62 дугаар тогтоолын хэрэгжилтийг хангах талаар авч хэрэгжүүлж буй ажлын тухай танилцуулга, “Нийслэл дэх төр, хувийн хэвшлийн түншлэл” дэд хөтөлбөр батлах тухай, “Төр, хувийн хэвшлийн түншлэлээр төсөл, хөтөлбөр хэрэгжүүлэх журам”-ын төсөл, Тогтоолд өөрчлөлт оруулах тухай зэрэг асуудлыг хэлэлцлээ. Улсын тусгай хэрэгцээний талбайн хэмжээ, хилийн заагт өөрчлөлт оруулах санал уламжлах тухай асуудлыг Улаанбаатар хотын ерөнхий менежер бөгөөд Захирагчийн Ажлын албаны дарга Т.Гантөмөр танилцуулав.

Тэгвэл газрын хэмжээ, хилийн заагт өөрчлөлт оруулах шаардлага гарсан аж. Учир нь “Монгол наадам цогцолбор”-ын оффис болон усан хангамж, ариутгах газар барьж байгуулахад нэмж 12 га газрыг нэмж тусгай хэрэгцээнд авах шаардлага гарсан байна. Мөн Сонгинохайрхан дүүрэг, Төв аймгийн газар олголтоос шалтгаалж давхцал үүсэх асуудал их гарчээ. Тиймээс давхцлыг арилгах, хэсэгчилсэн ерөнхий төлөвлөгөөний тодотголыг гаргах үүрэг бүхий Ажлын хэсэг гарч ажиллан, иргэдтэй зөвшилцөж, давхцлыг арилгаж ажилласан байна.

Ийнхүү “Монгол наадам цогцолбор”-ын 551 га газар дээр нэмэгдүүлэх давхцлыг арилгаж, Төв аймгийн Аргалант сумтай хиллэх нийт 565 га газрын цэсийг шинэчлэн тогтоохоор танилцуулав.

Энэ сарын 28-нд ихэнх нутгаар, 29-нд нутгийн зүүн хагаст цас орж, цасан шуурга шуурч, ихэнх нутгаар хүйтний эрч эрс чангарахыг ЦУОШГ-аас онцгойлон анхаарууллаа.

-Арванхоёрдугаар сарын 28-наас 2020 оны нэгдүгээр сарын 1-нийг хүртэлх цаг агаарын урьдчилсан төлөв-

Арванхоёрдугаар сарын 28-нд баруун аймгуудын нутгийн зүүн хэсэг, төв, зүүн болон говийн аймгуудын ихэнх нутгаар, 29-нд нутгийн зүүн хагаст, 30-нд зүүн аймгуудын нутгийн зүүн хэсгээр цас орж, цасан шуурга шуурна.

Салхи 28-нд ихэнх нутгаар, 29-нд говь, тал, хээрийн нутгаар секундэд 14-16 метр хүрч ширүүснэ.

Ихэнх нутгаар хүйтний эрч эрс чангарч Дархадын хотгор, Завхан голын эх, Идэр, Тэс голын хөндийгөөр шөнөдөө 40-45 градус, өдөртөө 30-35 градус хүйтэн байна.

Увс нуурын хотгор, Хүрэн бэлчир орчим, Хөвсгөл, Хэнтийн уулархаг нутаг, Эг, Үүр, Орхон-Сэлэнгэ, Хараа, Ерөө, Туул, Тэрэлж, Хэрлэн, Онон, Улз голын хөндийгөөр шөнөдөө 33-38 градус, өдөртөө 21-26 градус хүртэл хүйтэрнэ.

Харин говийн бүс нутгийн өмнөд хэсгээр шөнөдөө 20-25 градус, өдөртөө 10-15 градус, бусад нутгаар шөнөдөө 27-32 градус, өдөртөө 16-21 градус хүйтэн байна.

Арванхоёрдугаар сарын 30-ны өдөр нутгийн баруун хэсгээр, 31-нд ихэнх нутгаар хүйтний эрч суларна.

Монгол Улсын Ерөнхий сайд У.Хүрэлсүх Олон Улсын соробан сампин, цээж тооллын тэмцээнд багаараа амжилттай оролцож, аваргын цом авсан сурагчдыг өрөөндөө хүлээн авч уулзан хүндэтгэл үзүүлж, баяр хүргэн амжилт хүсээд гарын бэлэг өгөв.

Камбож Улсын нийслэл Пномпень хотод энэ сарын 7-8 нд болсон Олон Улсын соробан сампин, цээж тооллын USMAS тэмцээнд дэлхийн 40 улсын 4000 хүүхэд 10 ангилалд оюуны чадвараараа өрсөлдсөн байна. Тус тэмцээнд Тояа хүүхэд хөгжлийн академийн сурагчид оролцож 38 аваргын цом, 36 алтан цом, зургаан мөнгөн цом хүртсэн байна. Тэмцээнд Улаанбаатар хот болон Өвөрхангай, Хөвсгөл, Дорнод аймгийн 6-14 насны сурагчид амжилттай оролцсон бөгөөд дээд түвшний оноог Хөвсгөл аймгийн Түнхэл тосгоны ЕБС-ын наймдугаар ангийн сурагч н.Тэргэл авсан байна. Ерөнхий сайд оюун ухааны чадвараа хөгжүүлээд зогсохгүй эх орноо төлөөлж Олон улсын тэмцээнд өндөр амжилттай оролцож, Монгол Улсынхаа нэрийг мандуулж, монгол хүний оюуны чадамжийг дэлхийд харуулж, хичээл зүтгэл гаргасанд хүүхдүүдэд талархал илэрхийлж улам их амжилт хүслээ. Мөн эдгээр хүүхдийг бэлтгэн сургаж, хүмүүжүүлж, төлөвшүүлж буй багш нарт талархан, бахархаж байна гэсэн юм.

“Үндэсний эрх чөлөө, тусгаар тогтнолоо сэргээсний баярын өдөр” болон “Шинэ жилийн баяр”-ын өдрүүдэд хилийн боомтуудын амрах хуваарийг хүргэж байна.

Монгол Улсын Ерөнхий сайд, Хүүхдийн төлөө Үндэсний зөвлөлийн тэргүүн У.Хүрэлсүх “Оны онцлох хүүхэд”-үүдийн шагналыг Төрийн ёслол хүндэтгэлийн өргөөнд гардууллаа.

2019 онд үндэсний болон олон улс, тив, дэлхийн түвшинд оюун ухаан, мэдээллийн технологи, спорт, байгаль хамгаалал, хүмүүнэг, сайн үйлсийн төрөлд 119 хүүхэд өрсөлдөж онцгой амжилт гарган эх орноо сурталчилж, үе тэнгийн хүүхдүүдээ манлайлсан 35 хүүхэд “Оны онцлох хүүхэд”-ээр шалгарлаа. Мөн Нийслэлийн Сүхбаатар дүүргийн 25 дугаар тусгай сургуулийн 9б ангийн 15 хүүхэдтэй тусгай ангийн хамт олон, “Би нар” гэр бүлийн уран сайхны киноны 10 авъяаслаг хүүхдүүд багийн амжилтаар тус тус “Оны онцлох хүүхэд”-ээр тодорч, Монгол Улсын Ерөнхий сайдаас өргөмжлөл, шагнал, гарын бэлгээ гардан авав.

Монголд Улсын Ерөнхий сайд Монгол Улсын Засгийн газраас хүүхдийн хөгжил, төлөвшил, ёсзүйтэй иргэн болж өсөхөд онцгой анхаарч, хүүхэд эцэг эхээ хайрлах, бусдыг хүндлэх, туслах, эх орон байгаль орчноо хамгаалах, хууль ёсыг сахих, үндэсний өв уламжлалаа дээдлэн хүндлэх амьдрах арга ухааны дадал чадвар эзэмшүүлэх , оюун ухаан, бие бялдар авъяас чадвараа хөгжүүлэх бүх боломжийг бүрдүүлэх, дэмжин ажиллах чиглэлээр бодлогоо хэрэгжүүлж ажилладаг гэв. 2019 онд зуслан, хүүхэд хөгжүүлэх ордонд хамрагдсан хүүхдийн тоо өмнөх оноос 50 хувиар өссөн зэрэг нь бодлогын хэрэгжилтийн эерэг дүн юм. Иймд хүүхэд та бүхэн шударга хүн болж хүмүүжин төлөвшиж, ээж аавдаа энэрэлтэй, эх орондоо хайртай хүмүүс болоорой гэв.

“Оны онцлох хүүхэд”-ээр тодорсон хүүхдүүд Монгол Улсынхаа ирээдүйн хөгжлийг түүчээлэн, зөв монгол хүн болж төлөвшин, Монгол Улсаа хөгжүүлэхийг найзууддаа уриалж байна гэсэн юм.

Техник сэтгэлгээ, шинэ санаачилга, сурлагын амжилт, урлаг уран бүтээл, биеийн тамир спорт, эх орны түүх соёл, өв уламжлал, байгаль хамгаалал, эрүүл аюулгүй орчин, хүмүүнлэг энэрэнгүй сайн үйлс, хүүхдийн өөрийн удирдлагын байгууллагын чиглэлээр явуулсан үйл ажиллагааны үр дүн болон багийн амжилт үзүүлсэн байдлаар нь есөн төрлөөр шалгаруулалт явуулж тодруулсан байна.

Оны онцлох хүүхэд шалгаруулах ёслолын ажиллагааг Хүүхдийн төлөө Үндэсний зөвлөлийн ажлын алба, Засгийн газрын Хэрэгжүүлэгч агентлаг Гэр бүл, хүүхэд залуучуудын хөгжлийн газраас 28 дахь жилдээ ийнхүү уламжлал болгон зохион байгуулж байна.

Архангай аймгийн Өндөр-Улаан сумын Балгасын тал дахь Гол мод-2-ын Хүннүгийн 1, 10, 189-р язгууртны булшнаас Улаанбаатарын Их сургуулийн археологичдын 2001-2011, 2019 оны малтлага судалгаагаар олж, илрүүлсэн Монгол Улсын түүх, соёлын хосгүй үнэт зүйлийн жагсаалтад бүртгэгдсэн алт, мөнгө, хаш эдлэл, эртний Ромын шилэн аяга, хүрэл эдлэлүүдийг Монголбанкны Эрдэнэсийн санд шилжүүлэн авч, үзмэрийн танхимдаа дэлгэн байршуулаад байгаа билээ.

Энэхүү “ГОЛ МОД II” Хүннүгийн язгууртны бүлэг булшны зарим олдворыг АНУ-ын археологийн хүрээлэнгийн “Археологи” сэтгүүлээс “2019 оны дэлхийн шилдэг 10 олдвор”-ын нэг хэмээн зарласан байна. Эдгээр үзмэрийг иргэд Эрдэнэсийн санд хүрэлцэн ирж үзэх нь нээлттэй бөгөөд https://www.mongolbank.mn/museumrequest.aspx линкээр хүсэлтээ оруулж, бүртгүүлэх боломжтой.

Боловсрол, соёл, шинжлэх ухаан, спортын сайд Ё.Баатарбилэг, дэд сайд Г.Ганбаяр, Төрийн нарийн бичгийн дарга Б.Баярсайхан болон яамны бусад удирдлага соробан сампингийн Олон Улсын тэмцээнд амжилттай оролцсон хүүхдүүдийг хүлээн авч хүндэтгэл үзүүллээ.

Камбож улсад зохион байгуулагдсан түргэн цээж бодолтын олон улсын тэмцээнд Монгол Улсаас “Тояа” академийн 83 сурагч, 13 багш оролцож 41 улсын 4000 гаруй хүүхэдтэй өрсөлдөн багийн дүнгээр нэгдүгээр байр эзэлсэн юм. 81 орны гишүүнчлэлтэй олон улсын боловсролын байгууллагаас зохион байгуулдаг тус тэмцээнд Монголын 38 сурагч дэлхийн аварга, 36 сурагч алтан цом, 6 хүүхэд мөнгөн цом, 3 хүүхэд хүрэл цомын эзэн болж монгол хүүхдийн оюуны чадамжийг дэлхийд таниулсан билээ.

Олон улсын тэмцээнд амжилт гаргасан сурагчид БСШУСЯ-ны удирдлагуудад нэг секундэд хоёр бодлого гарах 100 мөртэй бодлогыг цээж бодолтын аргаар бодож сонирхуулсан юм.

БСШУС-ын сайд Ё.Баатарбилэг “Ирэх онд зохиогдох хамгийн чухал тэмцээнд нь сайд болон яамны зүгээс дэмжлэг үзүүлэх болно” гээд бусад удирдлагуудын хамт бяцхан оюунлаг сурагчдад шинэ жилийн бэлэг гардууллаа.