Month: April 2019

Нийслэлийн Засаг даргын 2019 оны дөрөвдүгээр сарын 17-ны өдрийн орчны аюулгүй байдлыг хангах зорилгоор хашаа, хайсыг буулгах ажлыг зохион байгуулах тухай А/321 дүгээр захирамжаар Улаанбаатар хотын өнгө үзэмж, тохижилт бүхий газар, ногоон байгууламжийг нэмэгдүүлэх, нийтийн эзэмшлийн зам талбайг чөлөөлөх, авто болон явган зорчигчийн аюулгүй байдлыг хангах, орчны бохирдлыг бууруулах арга хэмжээ авч ажиллахыг холбогдох байгууллагуудад үүрэг болгосон.

Эхний ээлжинд Нийслэлийн Хот байгуулалт, хөгжлийн газраас Улаанбаатар хотын Их тойрууд байрлах Сүхбаатар дүүргийн 1-8 дугаар хороо, Чингэлтэй дүүргийн 1-6 дугаар хороо, Баянзүрх дүүргийн 1, 3, 6, 15, 18, 25 дугаар хорооны нутаг дэвсгэрт байрлах буулгах шаардлагатай хашаа, хайс, хаалт, түр хашааны судалгааг гаргах юм.

Тус судалгааг үндэслэн Нийслэлийн газар зохион байгуулалтын алба нь шаардлагад нийцэхгүй хашаа, хайс, түр хашааг ажлын 10 хоногийн хугацаанд буулгах мэдэгдлийг холбогдох иргэн, аж ахуй нэгж, байгууллагад хүргүүлэн урьдчилан мэдэгдэх юм.

Мэдэгдэлд заасан хугацаанд хашаа, хайс, хаалт, түр хашааг буулгаагүй тохиолдолд албадан чөлөөлөх үйл ажиллагааг Нийслэлийн газар зохион байгуулалтын алба, Нийслэлийн Цагдаагийн газар хамтран хэрэгжүүлж, буулгахтай холбогдон гарсан зардлыг буруутай этгээдээр төлүүлж, хууль тогтоомжийн дагуу арга хэмжээ авч ажиллахыг Нийслэлийн Мэргэжлийн хяналтын газар хариуцан хэрэгжүүлэхийг үүгээр сонордуулж байна.

Онцгой байдлын ерөнхий газар, Япон Улсын Олон улсын хамтын ажиллагааны байгууллагатай хамтран “Монгол Улсын Газар хөдлөлтийн гамшгаас хамгаалах чадавхыг бэхжүүлэх төсөл”-ийг хэрэгжүүлж байгаа билээ. Төслийн хүрээнд барилгын газар хөдлөлт тэсвэрлэлтийн үнэлгээнд ашиглагдах тоног төхөөрөмжийг ОБЕГ-ын Гамшиг судлалын хүрээлэн, МХЕГ, нийслэлийн Хот байгуулалт, хөгжлийн газар, Барилгын хөгжлийн төвд өнөөдөр хүлээлгэн өгөх арга хэмжээ боллоо.

Арга хэмжээнд ОБЕГ-ын дарга, хошууч генерал Т.Бадрал, Японы Жайка олон улсын байгууллагын төлөөлөл болон ОБЕГ-ын Гамшиг судлалын хүрээлэн, МХЕГ, нийслэлийн Хот байгуулалт, хөгжлийн газар, Барилгын хөгжлийн төвийн холбогдох мэргэжилтнүүд оролцсон юм. Барилгын газар хөдлөлт тэсвэрлэлтийн үнэлгээ хийхэд ашиглагдах тоног төхөөрөмжийг хэрхэн ашиглах талаарх сургалтыг өнгөрсөн онд нийслэл, дүүргүүдийн Мэргэжлийн хяналтын газар, Нийслэлийн хот төлөвлөлт, ерөнхий төлөвлөгөөний газрын 60 гаруй мэргэжилтнийг хамруулан зохион байгуулсан юм гэж Онцгой байдлын ерөнхий газраас мэдээллээ.

Санхүүгийн зохицуулах хорооны “Банк бус санхүүгийн үйл ажиллагааны зохицуулалтын журам”-ын 2.11-д “Тусгай зөвшөөрлөө авснаас хойш 6 сарын хугацаанд банк бус санхүүгийн байгууллагын удирдлага нь Монголын банк бус санхүүгийн байгууллагуудын холбооноос зохион байгуулсан сургалтад хамрагдаж гэрчилгээ авсан байна” гэж заасан байдаг.

Сургалтаар ББСБ-ын үйл ажиллагааны онцлог, хууль эрх зүйн орчин, хяналт зохицуулалт, ББСБ-ын нягтлан бодох бүртгэл, тайлагнал, олон улс дахь бичил санхүүгийн салбарын хөгжил, өнөөгийн төвшин, нийгмийн хариуцлага, үйлчилгээний байгууллагын стандарт зэрэг банк бус санхүүгийн үйл ажиллагаа эрхлэхэд зайлшгүй шаардлагатай мэдлэг олгоход чиглэгдсэн мэдээллийг ББСБ-уудын удирдах албан тушаалтнуудад нэгдсэн байдлаар өгөх зорилготой юм. Мөн банк бус санхүүгийн салбарын ажилтнуудын дагаж мөрдөх ёс зүй, комплаенс зэрэг сэдвүүдийг сургалтын хөтөлбөрт нэмж оруулсан.

Үүний дагуу Санхүүгийн зохицуулах хороо, Монголын банк бус санхүүгийн байгууллагуудын холбоо хамтран шинээр тусгай зөвшөөрөл авч буй ББСБ-уудын удирдлагуудад зориулсан сертификатжуулах сургалтыг 2018 оны 4 дүгээр сарын 24-26-ны өдрүүдэд зохион байгуулах гэж байна. Сургалтад хамрагдах хүсэлтэй тусгай зөвшөөрөл бүхий ББСБ-уудын удирдлагууд Хорооны Банк бус санхүүгийн байгууллагын 51-261668 утсанд холбогдож мэдээлэл авах боломжтой юм.

Улсаа аврах үндэсний хөдөлгөөнийхөн өнөөдөр Сүхбаатарын талбайд хэвлэлийн бага хурал хийлээ. Нийслэлийн төв талбайг хувь иргэний нэр дээр эзэмшүүлж, барьцаанд тавьсан баримтууд тус хөдөлгөөнийхөнд ирсэн тул ийнхүү хэвлэлийн хурал хийсэн юм байна. Тэдний мэдээлснээр 2006 оны тавдугаар сарын 10-нд нийслэлийн Засаг даргын 215 тоот захирамжаар Сүхбаатарын талбайн 50 хувийг “Юү Би констракшн” компани буюу Худалдаа хөгжлийн банкны захирал Б.Эрдэнэбилэгийн мэдэлд шилжүүлсэн юм байна. Ингэснээр тус компани Сүхбаатарын талбайн урт талын хэсгийг Улаанбаатар хотын банканд хууль бусаар барьцаалан их хэмжээний мөнгө зээлээд байгаа ажээ.

Тодруулбал, 2017 оны зургадугаар сарын 09-нд 500 сая, 2017 оны зургадугаар сарын 13-нд дөрвөн сая 2018 оны зургадугаар сарын 27-нд дөрвөн сая 450 мянган ам.доллар буюу нийт 8.6 сая ам.долларын зээлийг Улаанбаатар хотын банкнаас авч Сүхбаатарын талбайг барьцаанд тавьжээ. Тиймээс Сүхбаатарын талбайг хувийн эзэмшилд шилжүүлсэн шийдвэр хийгээд газрын гэрчилгээг хүчингүй болгож буруутэй этгээдэд хуулийн дагуу хариуцлага хүлээлгэхийг Улсаа аврах үндэсний хөдөлгөөнийхөн нийслэлийн Засаг дарга бөгөөд Улаанбаатар хотын захирагч С.Амарсайханаас шаардаж албан шаардлага хүргүүлж байгаа юм байна. Шаардлагын хариуг 72 цагийн дотор авах гэнэ.

Нийслэлийн Баянзүрх дүүргийн иргэдийн Төлөөлөгчдийн хурлын XII хуралдаан маргааш болно.

Дүүргийн иргэдийн Төлөөлөгчдийн хурлын Тэргүүлэгчдийн 2019 оны 03 сарын 26-ны өдрийн тогтоолоор дүүргийн ИТХ-ын нэгдсэн хуралдааныг 2019 оны 04 дүгээр сарын 19-ны өдрийн 10 цагт хуралдуулахаар товлосон. Тус хуралдаанаар дүүргийн иргэдийн Төлөөлөгчдийн хурлын дахин сонгуульд 10,19 дүгээр тойргоос сонгогдсон төлөөлөгчдийн бүрэн эрхийн асуудлыг хэлэлцэх аж.

Прокурорын байгууллагаас 2019 онд дэвшүүлсэн “Хүрээлэн байгаа орчны эсрэг гэмт хэрэг, зөрчилтэй тэмцэхэд хууль сахиулах байгууллагуудын үйл ажиллагааг уялдуулан удирдан зохион байгуулах” зорилтын хүрээнд Баянгол дүүргийн прокурорын газар дүүргийн Онцгой байдлын хэлтэстэй хамтран ажиллах “Санамж” бичиг байгуулсан билээ. Уг “Санамж” бичгийн хүрээнд тус дүүргийн нутаг дэвсгэрт үйл ажиллагаа явуулж байгаа автомашин хийгээр цэнэглэдэг /АХЦС/ болон шатахуун түгээх станцуудын үйл ажиллагаа стандартын шаардлагыг хангаж буй эсэхийг хамтран шалгав. Шалгалтанд Баянгол дүүргийн нутаг дэвсгэрт үйл ажиллагаа явуулж байгаа Автомашин хийгээр цэнэглэдэг /АХЦС/ болон шатахуун түгээх 12 станц хамрагджээ. Шалгалтаар галын аюулгүй байдлын тухай хууль зөрчин үйл ажиллагаа явуулж байсан гурван аж ахуйн, нэгжид дүүрэг дэх Онцгой байдлын хэлтсээс зөрчлийн хэрэг нээж, хэрэг бүртгэлтийн ажиллагаа явуулж байна. Дээрх зөрчил гаргасан автомашин хийгээр цэнэглэдэг болон шатахуун түгээх станцуудын үйл ажиллагааг эрх бүхий албан тушаалтны саналыг үндэслэн хүний амь нас, эрүүл мэнд, хүрээлэн байгаа орчинд шууд, эсхүл шууд бусаар хор хохирол учруулж болзошгүй гэж 2019 оны 04 дүгээр сарын 11-ний өдрөөс үйл ажиллагааг бүхэлд нь зогсоосон байна. Баянгол дүүргийн прокурорын газраас мэдээллээ.

Монгол Улсад орчин цагийн боловсролын асуудал эрхэлсэн төв байгууллага бүрэлдэн тогтсоны 95 жилийн ойг тохиолдуулан эрхэлсэн ажилдаа олон жил үр бүтээлтэй ажиллан Боловсролын салбарын хөгжилд оруулсан хувь нэмрийг үнэлж, Монгол Улсын Ерөнхийлөгч Х.Баттулга 2019 оны 04 дүгээр сарын 11-ний өдөр 62 дугаар зарлигаа гарган багш нарт төрийн одон, медаль хүртээсэн. Шагналыг Монгол Улсын их хурлын гишүүн, Монгол Улсын Засгийн газрын гишүүн, Боловсрол, соёл, шинжлэх ухаан, спортын сайд Ё.Баатарбилэг, тус яамны Төрийн нарийн бичгийн дарга Б.Баярсайхан болон газрын дарга нар гардууллаа.

Хөдөлмөрийн гавьяаны улаан тугийн одонгоор 25-р тусгай сургуулийн биеийн тамирын багш Д.Долгоржав, Сүхбаатар дүүргийн 4-р сургуулийн бага ангийн багш Г.Түмэннасан, 70-р тусгай сургуулийн согог зүйч багш Б.Энхтуяа, Орхон аймгийн “Эрдмийн сан” сургуулийн багш С.Бээжинсан нар шагнагдлаа.

Алтан гадас одонгоор “Ирээдүй” цогцолбор ахлах сургуулийн газарзүйн багш Ш.Оюунчимэг, Шинэ анагаах ухааны их сургуулийн багш Б.Саранцэцэг, Монгол Улсын Боловсролын их сургуулийн Дүрслэх урлаг, технологийн сургуулийн технологийн багш О.Эрдэнэ-Ус, Баянгол дүүргийн 133-р цэцэрлэгийн эрхлэгч Д.Долгор, Дорнод аймгийн “Шинэ хөгжил” сургуулийн технологийн багш Д.Чулуунбаатар, Нийслэлийн 53-р сургуулийн биеийн тамирын багш Л.Энхболд, Хөвсгөл аймгийн Алаг-Эрдэнэ сумын бага боловсролын багш Г.Энхтуяа, 25-р тусгай сургуулийн биеийн тамирын багш Ц.Намжилдорж, Архангай аймгийн Хотонт сумын ерөнхий боловсролын сургуулийн бага ангийн багш Б.Нямсүрэн нар энгэрээ мялаалаа.

Хөдөлмөрийн хүндэт медалиар Сүхбаатар дүүргийн 1-р сургуулийн түүх, нийгмийн ухааны багш М.Цогбаяр, Баянзүрх дүүргийн 62-р цэцэрлэгийн багш Ш.Насанжаргал, Баянгол дүүргийн 85-р цэцэрлэгийн багш Д.Нямцоо нар шагнагдлаа.

Засгийн газрын шагнал-Боловсролын тэргүүний ажилтан цол тэмдгээр Дархан-Уул аймгийн “Оюуны ирээдүй” цогцолбор сургуулийн ахмад багш Ч.Жимс, “Эхлэл АОМ” сургуулийн захирал Ц.Бадамхатан, Монгол-Оросын хамтарсан 3-р сургуулийн багш Я.Байгалмаа нар шагнагдлаа.

Төрийн одон медалиар шагнагдсан багш сурган хүмүүжүүлэгч нарт БСШУС-ын сайд Ё.Баатарбилэг баяр хүргэж, амжилт хүслээ