Month: April 2019

Өнгөрсөн гуравдугаар сарын 13-ны өдөр Сүхбаатар дүүргийн эрүүгийн хэргийн анхан шатны шүүхэд Д.Нэмэхбаяр, Н.Раднаасэд нарын 11 хүнд холбогдох хэргийн шүүх хурлын урьдчилсан хэлэлцүүлэг болсон.

Хэргийн эргэн сануулахад, Төв талбайн ногоон байгууламж руу бие зассан гэх үйлдлээрээ олны дургүйцлийг хүргээд байсан Д.Нэмэхбаярыг АТГ-аас мөрдөн шалгах үед гэрээс нь 14 сая төгрөг бэлнээр олдсон байдаг. Харин мөнгийг тэрбээр хээл хахуульд авсан гэдгээ мэдүүлгээрээ хүлээн зөвшөөрсөн бөгөөд Д.Нэмэхбаяр нарыг “Үдийн цай” хөтөлбөрийн тендерт оролцсон зарим аж ахуйн нэгж, иргэдээс хээл хахууль авах байдлаар давуу байдал олгож, албан тушаалын байдлаа урвуулан ашигласан хэргээр буруутган, шүүж байгаа юм. Тэдэнд Эрүүгийн хуулийн 22.4.2 /Нийтийн албан тушаалтан хахууль өгөгчийн ашиг сонирхлын үүднээс албаны чиг үүргээ хэрэгжүүлсний хариуд, эсхүл хэрэгжүүлэхийн тулд шууд, эсхүл бусдаар дамжуулан хахууль өгөхийг шаардсан, авсан бол нийтийн албанд томилогдох эрхийг хоёр жилээс таван жил хүртэл хугацаагаар хасаж таван мянга дөрвөн зуун нэгжээс хорин долоон мянган нэгжтэй тэнцэх хэмжээний төгрөгөөр торгох, эсхүл нэг жилээс таван жил хүртэл хугацаагаар зорчих эрхийг хязгаарлах, эсхүл хоёр жилээс найман жил хүртэл хугацаагаар хорих ял шийтгэнэ./ 22.5.1 Өөртөө, бусдад давуу байдал бий болгох зорилгоор бусдад албаны чиг үүрэг, бүрэн эрх, албан тушаалын байдалтай нь холбогдуулан эд зүйл өгсөн, эдийн бус баялаг, тэдгээрийг өмчлөх эрхийг шилжүүлсэн, төлбөргүй, эсхүл хөнгөлөлттэй үйлчилгээ үзүүлсэн, эсхүл эдгээрийг амласан, санал болгосон бол нийтийн албанд томилогдох эрхийг хоёр жилээс таван жил хүртэл хугацаагаар хасаж хоёр мянга долоон зуун нэгжээс арван дөрвөн мянган нэгжтэй тэнцэх хэмжээний төгрөгөөр торгох, эсхүл зургаан сараас гурван жил хүртэл хугацаагаар зорчих эрхийг хязгаарлах, эсхүл зургаан сараас гурван жил хүртэл хугацаагаар хорих ял шийтгэнэ./ зааснаар яллах дүгнэлт үйлдсэн байна.

Тэгвэл тэдэнд холбогдох гэм бурууг нь шүүх хурал маргааш Сүхбаатар дүүргийн шүүхэд болох ажээ.

Хан-Уул дүүргийн 16 дугаар хорооны оршин суугчид “Буянт-Ухаа I” хорооллын урд талын талбайд өглөөний 8:00 цагт дохион дуунаар цугларлаа. Энд гамшгаас хамгаалах сургалт болсонгүй. Харин хорооноос тараасан хуудсанд тамга даруулах гэсэн иргэдийн цуваа үүсчээ. 16 дугаар хорооноос 10 хүний бүрэлдэхүүнтэй зохион байгуулалтын баг гаран ажиллаж байсан юм.

“A” хэсгийн ахлагч Жаргалтуяа “Бид 06:00 цагт цуглаад асраа барьсан. 16 дугаар хорооны иргэд маань идэвхтэй цугларсан. Уг нь үзүүлэх сургалт болно гэсэн боловч тийм юм болсонгүй. Зүгээр л бүртгэл явагдаад, тараах бичиг нь хүрэлцээгүйгээс болж бөөн шуугиан, хэрүүл болоод таарлаа. 16 дугаар хороо 12 мянга орчим хүн амтай. Харин ОБЕГ-аас хэвлэж өгсөн иргэдэд тарааж өгөх цаас нь хүрээгүй” гэв.

Цугларалтын талаар 16 дугаар хорооны иргэн Сувдаагаас сэтгэгдлийг нь асуусан юм.

Та энэ сургалтаас гамшгийн талаар юу мэдэж, сурч авсан бэ?

-Энд жагсаж байгаад л тамга даруулснаас өөр үйл ажиллагаа болсонгүй. Би 8 цаг 10 минутанд гарч ирсэн. Намайг гарахаас өмнө сургалт явагдсан юм уу, би тэрнийг мэдэхгүй байна.

Иргэдийн идэвх оролцоо ямар санагдав?

-Иргэд маш олноор идэвхтэй цугларлаа. Гэвч зохион байгуулалт маш муу үйл ажиллагаа боллоо.

А.МӨНХЗУЛ

Г.ХОНГОРЗУЛ

Сэлэнгэ аймгийн Мандал суманд хугацаат цэргийн албаны 2019 оны хаврын нэгдүгээр ээлжийн цэрэг татлагын эрүүл мэндийн үзлэг явуулж эхэллээ.

Үзлэгийг энэ сарын 23-25-ны өдөр явуулна. Цэрэг татлагад Монгол Улсын иргэн 18-25 насны эрэгтэйчүүд хамрагдах бөгөөд тухайн харьяа дүүргийнхээ цэрэг татлагын байранд тогтоосон өдөр, цаг хугацаанд ирсэн байх үүрэгтэй ажээ. Цэрэг татлага зохион байгуулж буй дээрх хугацаанд цэргийн насны, зарлан дуудах хуудас авсан залуус бүртгэл, нарийн мэргэжлийн эмч нарын үзлэгт өөрийн биеэр хамрагдана.

Барилга, хот байгуулалтын сайд Х.Баделхан энэ сарын 23-ны өдөр яам, агентлаг, харьяа байгууллагын газрын дарга нарын хамтаар Барилга, барилгын материалын үйлдвэрийн яамны орлогч сайд, БНМАУ-ын Сайд нарын Зөвлөлийн орлогч даргаар ажиллаж байсан хурандаа, генерал Сономын Лувсангомбыг хүлээн авч уулзан, хүндэтгэл үзүүллээ.

Хурандаа, генерал Сономын Лувсангомбо нь ЗХУ-д Барилгын инженерийн дээд сургуульд суралцаж, барилгын инженер-технологичийн мэргэжил эзэмшсэн бөгөөд 1959-1964 он, 1968-1971 онд Барилга, барилгын материалын үйлдвэрийн яамны орлогч сайд, нэгдүгээр орлогч сайд, 1964-1968 он хүртэл Улсын барилгын зөвлөлийн орлогч дарга, 1972-1982 онд БНМАУ-ын Сайд нарын Зөвлөлийн орлогч дарга, Барилгын архитектурын комиссын дарга, Барилга архитектур, техник хяналтын улсын хорооны даргаар хавсран ажиллаж байсан юм.

БХБ-ын сайд Х.Баделхан Монгол улсын барилгын салбар зах зээлийн давалгаа, эдийн засгийн хямралын үед хүнд нөхцөл байдалд орж байсан ч эдийн засаг сэргэхийн хэрээр салбарын хөрөнгө оруулалт нэмэгдэж, үйл ажилллагаа тэлж, эрчимжиж байна. Иргэдийн хамгийн ихээр хүлээлт үүсгэдэг орон сууцны нийлүүлэлтийг нэмэгдүүлэх, иргэдийг орон сууцаар хангах чиглэлд салбар яам онцгойлон анхаарч ажиллаж байгаа төдийгүй Төрөөс барилгын салбарт баримтлах бодлогоо 10 жилээр тодорхойлон Засгийн газраар батлуулснаа танилцууллаа.

Төрөөс барилгын салбарт баримтлах бодлогын хүрээнд “Барилгын салбарын хөгжлийг тогтворжуулах үе”, “Салбарын эрчимтэй хөгжлийн гарааны үе”, “Хөгжингүй улс, орнуудын түвшинд хүрч, эрчимжих үе” гэсэн гурван шаттайгаар бодлого хэрэгжиж, салбарын өнөөгийн чадавхи ирэх 10 жил 4 дахин нэмэгдэж, шинэ дэвшилтэд ололт нэвтэрнэ гэдгийг онцлон тэмдэглэлээ.

Барилгын салбарыг хөгжүүлэхэд салбарын үе үеийн удирдлага, сэхээтнүүдийн хувь нэмэр хэмжээлшгүй их бөгөөд та бүхний үнэт зөвлөгөөг үргэлж сонсон ажиллах болохоо сайд Х.Баделхан илэрхийлсэн юм.

Хурандаа, генерал С.Лувсангомбо “Барилгын салбар бол Монгол улсын хөгжлийн хэмжүүр болсон том салбар. 1920-иод оноос эхлэн Монголчууд өөрсдийнхөө хүч, хөдөлмөрөөр их бүтээн байгуулалтынхаа эхлэлийг тавьж байсан түүхтэй. Тухайн үед барилгын техникийн бодлого гэж гаргадаг байлаа. Бодлогын гол зорилго нь барилгыг зөв барьж, газарт нь зөв тааруулахад л чиглэсэн юм. Монгол улсын цаг агаарын байдал, байгаль, газарзүйн онцлогт зохицсон норм нормативыг олж, шийдэхгүйгээр барилгын салбар цааш явахад хэцүү гэдгийг тухайн үеийн удирдлагууд олж харан, тодорхойлж байсан” гэж дурсан ярьсан юм.

Өнөөдөр барилгын салбар үндэсний томоохон салбар болон хөгжиж, улс орны хөгжлийг тодорхойлох хэмжээнд хүрсэн нь үе үеийн сэхээтнүүд, барилгачид, инженерүүдийн гавьяа бөгөөд энэ салбарыг өвлөн авч өнөөдрийн хөгжилд хүргэж ажиллаж байгаа салбарын удирдлага, инженерүүдэд баяр хүргэж, амжилт хүслээ.

Тэрбээр “Хэн дуртай хүн, хүссэн газартаа барилга барьдаг явдлыг таслан зогсоох хэрэгтэй” гэсэн өөрийн бодлоо хуваалцсан юм. Хот, тосгоны ерөнхий төлөвлөгөө гэдэг бол салбар яамны амин судас нь байдаг бөгөөд хот төлөвлөлтийг нарийн тооцож хэрэгжүүлдэг байх нь чухал гэдгийг зөвлөөд барилгын салбарт ерөнхий төлөвлөгөөний журам алдагдаад байгааг хэлсэн юм.

Эсгий хот хэмээн Улаанбаатар хотыг Барууныхан “шоолдог” байсан үе саяхан. Харин одоо Монголын залуучууд, сэхээтнүүд, барилгачид, инженерүүдийн арга ухаан, хүч хөдөлмөр барилгын салбарыг гайхалтай сайхан хөгжүүлэн, орчин үеийн хот болгож чаджээ. Хамгийн гол нь тухайн улс эртний түүх соёлоороо гайхагдах учиртай. Монголчуудын өөрсдийн гараараа бүтээсэн хуучны дурсгалт барилгыг энэ хэвээр нь хадгалан, орчин цагийн барилгатай хослуулан нэгтгэж чадвал барилгын салбарт шинэ хэв маяг бий болно хэмээн сэтгэлдээ бодож явдагаа Хурандаа, генерал С.Лувсангомбо илэрхийллээ.

Монголоо хамгаалах, улсынхаа түүхийг хадгалан үлдээх, өв уламжлал хуучны дурсгалаа сэргээхэд Барилга, хот байгуулалтын яам, барилгын салбар түүчээлэн, манлайлан оролцох ёстойг зөвлөсөн юм.

Сайд Х.Баделхан “Үнэтэй сайхан зөвлөгөөг харамгүй өгч, дурсамжаа хуваалцсанд баярлаж байгаагаа хэлээд Эрхэм хурандаа С.Лувсангомбо таны өгсөн үнэтэй зөвлөгөөг салбарын үйл ажиллагаа, бодлогодоо тусгаж, ахмадуудын хөлс хүч, сэтгэлээ шингээж барьсан хуучны дурсгалт барилгуудыг хамгаалан авч үлдэхэд анхаарч ажиллана” гэдгээ илэрхийллээ.

Авлигатай тэмцэх газар нь Эрүүгийн хэрэг хянан шийдвэрлэх тухай хуулийн 6.1 дэх зүйлийн 2 дахь хэсэг, Авлигын эсрэг хуулийн 15 дугаар зүйлийн 15.1 дэх хэсэгт заасны дагуу харъяаллын гэмт хэргүүдийг шалгах, авлигын гэмт хэргийг илрүүлэх зорилгоор тодорхой төрлийн гэмт хэрэгтэй тэмцэх чиг үүргээ хэрэгжүүлэхийн тулд иргэд, байгууллагаас авлигын холбогдолтой гомдол, мэдээллийг хүлээн авч, гэмт хэргийн шинжтэй үйлдэл тогтоогдсон тохиолдолд хэрэг бүртгэлтийн хэрэг нээж мөрдөн шалгах ажиллагаа явуулж ажиллав.

Мөрдөн шалгах хэлтсээс 2019 оны 4 дүгээр сард гэмт хэргийн шинжтэй 72 гомдол, мэдээлэл хянан үзсэнээс 25 гомдол, мэдээлэл буюу 34.7 хувьд хэрэг бүртгэлтийн хэрэг нээх санал гаргасан, 14 гомдол, мэдээлэл буюу 19.4 хувьд хэрэг бүртгэлтийн хэрэг нээхээс татгалзах саналтайгаар прокурорт шилжүүлж, одоо 31 гомдол, мэдээллийн үлдэгдэлтэй, шийдвэрлэлт 56.9 хувьтай байна.

Мөрдөн шалгах хэлтэст хүлээн авч шалгасан 72 гомдлын 43 буюу 59.7 хувийг Улаанбаатар, 29 буюу 40.3 хувийг орон нутгийн харьяаллын гомдол эзэлж байна.

Мөрдөн шалгах хэлтсийн хэмжээнд 2019 оны 4 дүгээр сард хэрэг бүртгэлт, мөрдөн байцаалтын 444 хэрэгт мөрдөн шалгах ажиллагаа явуулснаас 13 буюу шалгасан хэргийн 2.9 хувийг шүүхэд шилжүүлэх саналтайгаар прокурорт, 47 буюу шалгасан хэргийн 10.6 хувийг хэрэг бүртгэлтийн хэрэг хаах саналтайгаар прокурорт, 8 буюу шалгасан хэргийн 1.8 хувийг харьяаллын дагуу шилжүүлж, одоо 376 эрүүгийн хэргийн үлдэгдэлтэй байгаагаас хэрэг бүртгэлтийн 321 хэрэг, мөрдөн байцаалтын 55 хэрэг байна.

АТГ-аас мөрдөн шалгах ажиллагаа явуулж шүүхэд шилжүүлсэн зарим хэргүүд:

• “Улаанбаатар дулааны сүлжээ” ТӨХК-ийн захирлаар ажиллаж байсан Б нь албан тушаалын байдлаа урвуулан ашиглаж тус газраас хэрэгжсэн худалдан авах ажиллагааг хууль бусаар явуулж нэр бүхий аж ахуйн нэгжийг сонгон шалгаруулж хахууль авсан
• “Дорнод бүсийн эрчим хүчний систем” ТӨХК-ийн Хангамж, үйлчилгээний хэлтсийн даргаар ажиллаж байсан Г нь албан тушаалын байдлаа урвуулан ашиглан бусдад давуу байдал бий болгон их хэмжээний хээл хахууль авсан
• Өмнөговь, Дундговь, Төв аймгийн иргэний хэргийн давж заалдах шатны шүүх /хуучин нэрээр/-ийн Ерөнхий шүүгчээр ажиллаж байсан Д нь иргэний хэрэг шийдвэрлэх явцдаа өөрийн хамаарал бүхий этгээдээр дамжуулан бусдаас хахууль авсан
• Замын-Үүд сумын Засаг даргын тамгын газрын тендер сонгон шалгаруулах үнэлгээний хорооны эрх бүхий албан тушаалтнууд нь албан үүрэг албан тушаалын байдлаа урвуулан ашиглаж техникийн шаардлага, тендерийн тодорхойлолтын шаардлагыг хангаагүй бараа бүтээгдэхүүнийг нийлүүлэх тухай гэрээг байгуулж бусдад давуу байдал бий болгосон хэргүүдийг харьяалах прокурорын байгууллагад шилжүүлээд байна.

Гамшгаас хамгаалах иж бүрэн сургуулилт болж өнөөдөр 07.00-09.30 цагт нийслэл Улаанбаатар хотын авто замын хөдөлгөөнийг бүрэн хязгаарласан. Хязгаарлалтын бүсээс гарч байгаа машиныг гаргаж, харин орох хөдөлгөөнийг зогсоосон байсан юм. Одоогийн байдлаар хотын төв рүү чиглэсэн хөдөлгөөн ачаалалтай байгаа талаар Тээврийн цагдаагийн албанаас мэдээлж байна. Мөн зам тээврийн ослын шинжтэй нийт 42 дуудлага бүртгэгдсэн байна. Өглөө 07.00 цагт хөдөлгөөн бүрэн хаасны дараа зам тээврийн ослын дөрвөн тохиолдол бүртгэгджээ.

Хэнтий аймгийн Батширээт суманд байрладаг Монгол Улсын хилийн 783 дугаар баганын чиглэлээр ойн түймэр дөрөвдүгээр сарын 22-ны өдрийн 15.13 цагт орж иржээ. Түймрийн голомтод нийт 183 хүн, 13 автомашин, 23 морьтой ажиллаж байна. Тус аймгийн Онцгой байдлын газрын Гал түймэр унтраах, аврах 32,42 дугаар ангийн 24 алба хаагч, орон нутгийн 22 иргэн, нийт 46 хүн, долоон автомашинтай хүч нэмэгдүүлэн ажиллахаар очсон байна. Мөн ОБЕГ-ын даргын шийдвэрээр түймрийн нөхцөл байдалтай танилцах, удирдлагаар хангах, хүч нэмэгдүүлэн ажиллахаар ОБЕГ, ҮАБ, Зэвсэгт хүчний 303 дугаар ангийн хамтарсан нийт 27 алба хаагч “МИ-171Е” загварын нисдэг тэргээр өнөөдөр /2019.04.25/ 07.10 цагт түймрийн голомт руу нислэг үйлджээ.