Month: April 2019

Хэнтий аймаг Батширээт сумаас зүүн хойш 80 км Онон багийн нутаг “Хашлиг” гэдэг газар ОХУ-аас 2019 оны дөрөвдүгээр сарын 22-ны өдрийн 12:42 цагт ой, хээрийн гал түймэр хил давж орж иржээ. Түймрийн тархалтыг хиймэл дагуулаар баталгаажуулсан байна.

Түймрийн голомтод Хэнтий аймгийн Онцгой байдлын газраас 24 алба хаагч, 1 автомашин, Үндэсний Аврах бригадаас 20 алба хаагч, ЗХ-ний 303-р ангиас 1 нисдэг тэрэг, хилийн цэргээс 53 алба хаагч, 4 автомашин, орон нутгаас 10 иргэн, 4 автомашин, 15 морь нийт түймрийн голомтод 67 хүн, ЗХ-ний 303-р ангиас 1 нисдэг тэрэг, 6 автомашин, 15 морьтойгоор ажиллаж байна. Түймэрт урьдчилсан байдлаар ойн бүсийн 600 га талбай өртөж шатжээ.

Зарим хэвлэл, мэдээллийн хэрэгслээр “Монгол улсаас ой хээрийн түймэр хил даван ОХУ-ын нутаг дэвсгэрт орсон” тухай мэдээлэл гарч байгаа нь худал гэдгийг албаны хүмүүс онцолж байна.

Арвайхээрт 50 ортой хүүхдийн эмнэлгийн шав тавих ёслол өнөөдөр боллоо. Өвөрхангай аймгийн нийт хүн амын 33.4 хувийг 0-18 насны хүүхэд эзэлдэг бөгөөд аймгийн БОЭТ-ийн амбулаториор жилд Архангай , Баянхонгор, Өвөрхангай аймаг, Булган аймгийн Рашаант сумын харъяат 20 орчим мянган хүүхэд үзүүлж, 2400 гаруй хүүхэд хэвтэн эмчлүүлдэг.

БОЭТ-ийн Хүүхдийн тасгийг анх 1956 онд 15 ортойгоор байгуулж, 1977, 1981 онд өргөтгөж байсан ч өдгөө ханиад томууны үед тус тасгийн 40 орыг 100 хүртэл нэмэгдүүлж, эмч сувилагчид багагүй ачаалалтай ажилладаг юм. Уг байдлыг УИХ-ын гишүүдэд уламжилсаны дагуу УИХ-ын гишүүн Д.Тогтохсүрэн, Я.Содбаатар, УИХ-ын гишүүн, Засгийн газрын гишүүн С.Чинзориг нарын дэмжлэгтэйгээр улсын төсвийн 5 тэрбум төгрөгийн өртгөөр энэхүү том бүтээн байгуулалтын ажил эхэлж байна.

Барилгын ажлыг “Хангамж-Өргөө” ХХК гүйцэтгэх ба энэ оны 11 дүгээр сард багтаан дуусгаж, ашиглалтад хүлээлгэн өгөхөө мэдэгдэв.

Ирэх тавдугаар сарын эхээр болох “Монголын инновацийн 7 хоног” арга хэмжээний хүрээнд БСШУСЯ, ШУА болон “Стартап Монгол” төрийн бус байгууллага хамтран Монгол Улсын нийгэм, эдийн засгийн хөгжилд инновацийн соёлыг төлөвшүүлж, бүтээлч сэтгэлгээг хөгжүүлэх инновацийн түншлэл, хамтын ажиллагааг өргөжүүлэхэд чиглэсэн “Эрдэм хакатон 2019” тэмцээнийг зохион байгуулахаар болжээ. Ирэх тавдугаар сарын 3-наас 10-ны хооронд зохион байгуулах энэхүү тэмцээн “Эрүүл мэнд, Хүнсний аюулгүй байдал” сэдвийн хүрээнд явагдах ажээ. Тэмцээнд оролцогчид нь патент, ашигтай загвар, барааны тэмдэг эзэмшдэг эсхүл гэрээгээр эзэмших эрхтэй, Оюуны өмчийн газарт мэдүүлгээ гаргасан их, дээд сургууль, эрдэм шинжилгээний байгууллага, аж ахуйн нэгж, энтрепренёр хувь хүн байх юм байна.

Дорноговь аймгийн Замын-Үүд сумын улс хооронд зорчигч болон ачаа тээвэр эрхлэгчдийн эрх ашиг зөрчигдөж байгаа талаар тус сумын иргэд, жолооч нар өнөөдөр мэдээлэл хийлээ.
Замын-Үүд суманд 19 мянга гаруй иргэн оршин суудаг бөгөөд 70 гаруй хувь нь тээврийн үйлчилгээ эрхэлж амьжиргаагаа залгуулдаг байна. Гэвч тэдний хил дээр ажиллах нөхцөл маш хүнд хэцүү болжээ. Тухайлбал, Хятадын боомтын талаас монгол жолооч нарт дарамт шахалт үзүүлж, татвар татаас авч, зодож дарамтлахаас гадна, бичиг баримтыг нь дур зоргоороо хурааж авах нь энгийн үзэгдэл болсон гэв. Эрээнд чөлөөт бүс гэх нэгэн хашаа руу жолооч нарыг оруулж нэг машинаас 350-500 юань авдаг. Улмаар жолооч нарын хил нэвтрэх эрхийг дураараа хасч, боомилох, хөөж туух нь ч ихэссэн гэдгийг онцоллоо. Гэхдээ зохицуулалтаараа 4-5 хүний суудалтай автомашинаар л хил нэвтрэх эрхтэй бөгөөд УАЗ-469 машинаар л хил нэвтрэх боломжтой аж. Гэвч энэ асуудалд Монголын талаас нэг удаа ч анхаарал хандуулж, эрх нь зөрчигдөж байгаа иргэд, жолооч нараа хамгаалах арга хэмжээ авдаггүй гэж байлаа. Харин ч нэмж сүрдүүлж, шахаж хавчдаг байна. Тиймээс энэ асуудалд анхаарал хандуулж эрх нь зөрчигдөж байгаа хүмүүсийнхээ эрх ашгийг хамгаалахыг төр засгийн удирдлагуудаас тэд хүсч байгаа илэрхийлэв.

Монгол Улсын Их Хурлын сонгуулийн 42 дугаар тойрогт болох УИХ-ын гишүүний нөхөн сонгуульд шаардагдах 287 сая гаруй төгрөгийг Засгийн газрын нөөц сангаас гаргахаар болжээ.

Нөхөн сонгууль 2019 оны зургаадугаар сарын 30-ны өдөр болно гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.

Хамтран амьдрагчаа заналхийлж, амь насанд нь хүрсэн байж болзошгүй хэрэг өнгөрөгч долоо хоногт Төв аймагт гарчээ. Тодруулбал, тус аймгийн Батсүмбэр суманд Хүйн голын эрэг орчмоос гаднын нөлөөтэй нас барсан 35-40 орчим насны эмэгтэй хүний цогцос олдсон байна. Албан бус эх сурвалжийн мэдээлснээр талийгаач нь гаднын нөлөөтэй нас барсан байж болзошгүй нүүр гар, уруул хэсэгт цус хуралттай байсан гэнэ. Уг хэргийг тус аймгийн цагдаагийн газарт шалгаж байна.

Нэгдүгээр ангид элсэн орох сурагчдын бүртгэлийг хэрхэн зохион байгуулах тухай албан ёсны шийдвэр хараахан гараагүй байгаа гэдгийг нийслэлийн Боловсролын газраас мэдээллээ.

Одоогоор нийслэлийн дүүргүүдийн ерөнхий боловсролын сургуулийн ачааллыг тэнцвэржүүлэх буюу хамран сургах тойргийн асуудлыг судалж буй талаар тус газрын Бага боловсрол хариуцсан мэргэжилтэн Л.Уртнасан хэллээ.

Тэрбээр “Нэгдүгээр ангид элсэн орох сурагчдын бүртгэлийг хэрхэн зохион байгуулах тухай албан ёсны шийдвэр хараахан гараагүй байна. Өнгөрсөн жил нэгдүгээр ангийн сурагчдын бүртгэлийг намар зохион байгуулж, 34 мянга 692 сурагч нэгдүгээр ангид элсэн суралцсан. Энэ жилийн хувьд нэгдүгээр ангийн сурагчдын элсэлтийг эрт эхлэхээр зорьж байна. Ингэснээр тухайн сургууль багшлах боловсон хүчин, анги танхим, сандал ширээгээ бэлтгэх боломжтой болох юм. Энэ жилийн жилд 2019-2020 онд нийт 38 мянга 262 хүүхэд нэгдүгээр ангид элссэн. Тиймээс энэ жил дөрвөн мянга гаруй хүүхэд нэгдүгээр ангид нэмж элсүүлж байна. Сургуульд элсэх бүртгэлийг цахим болгохоор ажлын хэсэг ярилцаж, туршилтаар нэг сургуульд элсэлтийг зохион байгуулахаар яригдаж байгаа.Ерөнхийдөө, нэгдүгээр ангид элсэх сурагчдын бүртгэлийг зохион байгуулах шийдвэр тавдугаар сарын эхээр гарна” гэсэн юм. Боловсрол, соёл, шинжлэх ухаан, спортын сайд Ё.Баатарбилэгийн 2019 оны дөрөвдүгээр сарын 5-ны А/200 тушаалд “Өмчийн бүх хэлбэрийн ерөнхий боловсролын сургуулийн нэгдүгээр ангид тухайн онд зургаан нас хүрээгүй хүүхдийг элсүүлэхийг хориглосугай” гэж тусгажээ. Тиймээс 2019-2020 оны хичээлийн жилд зөвхөн 2013 оны нэгдүгээр сарын 1-нээс арванхоёрдугаар сарын 31-ний өдөр төрсөн хүүхдүүдийг элсүүлэхээр болж байгааг албаныхан хэлж байна.