Нийслэлийн гамшгаас хамгаалах иж бүрэн сургуулийн хүрээнд өнөөдөр Сонгинохайрхан дүүрэгт газар хөдлөлтийн гамшгийн үед эрэн хайх, аврах ажиллагааны дуурайлган үзүүлэх дадлага сургууль боллоо. Дадлага сургуулийг “Номин холдинг” компанийн агуулах худалдааны байранд зохион байгуулав. Сургуулийг хийхдээ “Улаанбаатар хотод 6,5 баллын хүчтэй газар хөдлөлт болсны улмаас Сонгинохайрхан дүүргийн 18 дугаар хорооны нутаг дэвсгэрт байрлах “Номин холдинг” ХХК-ийн агуулах худалдааны барилгад нуралт үүсч, их хэмжээний гал түймэр гарлаа” гэсэн цагийн байдал зарлажээ.
Уг дуудлагыг тус дүүргийн Онцгой байдлын хэлтсийн Гал унтраах, аврах 26 дугаар анги хүлээн авч, ослын голомтод гал унтраах үндсэн албаны болон автомеханик шат бүхий автомашинтай хүрэлцэн ирэв. 10 тн усны багтаамж бүхий автомашинаас барилгын зүүн талд гарч байгаа гал түймрийг унтрааж, галын тархалтыг зогсоож, барилгын дээвэрт асч буй галыг суурьтай хушуу ашиглан унтраалаа. Автомеханик шатыг сунгаж, барилгын дээвэр дээр байгаа дөрвөн иргэнийг аварч, 4 тн автомашинаас гал түймэр унтраах тархалтыг хийж, барилгын зүүн урд талын гал түймрийг зогсоож, автомеханик шаттай холбон барилгын дээвэрт гарсан түймрийг бүрэн унтраав.
Үзүүлэх сургуульд тус дүүргийн Цагдаагийн 2 дугаар хэлтсийн хэв журам сахиулах алба, мэргэжлийн хяналтын байгууллага, онцгой байдлын алба, дүүргийн эрүүл мэндийн алба, шуурхай удирлагын алба, улаан загалмай нийгэмлэг, үндэсний аврах бригадын эрэн хайх аврах анги, дулаан цахилгаанаар хангах алба, ариутгал халдваргүйжүүлэлт гээд гамшгийн эрсдэл тохиолдсон нөхцөлд ажиллах мэргэжлийн бүх байгууллага оролцож, бэлтгэл байдлыг бүрэн хангаж, шаардлагатай бүхий л ажиллагааг гүйцэтгэж амжилттай оролцлоо гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.
Энэ сард зохион байгуулагдсан Багшийн нарын Их хуралд оролцохоор Завхан аймгаас ирсэн “Жавхлант” цогцолбор сургуулийн бага ангийн багш Б цус харваж энэ сарын 17-ны өдөр нас барсан харамсалтай хэрэг гарчээ. Энэхүү хурал 23 жилийн дараа болж буйгаараа онцлогтой аж. Уг Багш нарын VII Их хуралд 800 орчим төлөөлөгч оролцсон. Багшийн мэргэжил дээшлүүлэх Институтийн захирлын үүрэг гүйцэтгэгч Д.Сүрэнчимэг энэ талаар мэдээлсэн бөгөөд тэрбээр Багш нарын Их хурлын үеэр гарсан энэ хэрэг болон Багшийн хөгжлийн ордонд өнгөрсөн Бямба гарагт гарсан галтай холбогдуулан үүрэгт ажлаасаа чөлөөлөгдөх хүсэлтээ гаргасан байна.
Умард Солонгосын удирдагч Ким Жон Уныг лимузин хөлөглөн ирэхэд ОХУ-ын ерөнхийлөгч Владимир Путин хүлээж зогсов. Эх орондоо зочлон ирсэн гадаадын төрийн тэргүүнүүдийг хүлээлгэдгээрээ алдартай ОХУ-ын ерөнхийлөгч ийн хүлээсэн нь Солонгосын хойгийн хэрэг явдалд Орос улс оролцох чин хүсэлтэй байгаагийн илрэл бололтой. ОХУ-БНАСАУ-ын төрийн тэргүүнүүдийн уулзалт өчигдөр алс дорнодын Владивосток хотод найрсаг уур амьсгалтай болж өнгөрлөө. Нийт таван цаг орчим үргэлжилсэн уулзалтын үеэр Путин, Ким нар Солонгосын хойгийг цөмийн зэвсгээс ангижруулах асуудлыг голлон ярилцсан байна. Тэрээр Путинтай уулзахдаа “Солонгосын хойгийн энх тайван, аюулгүй байдал бүхэлдээ АНУ-ын цаашдын хандлагаас хамаарна. БНАСАУ бүх боломжит хувилбар нөхцөлд зохицон ажиллахад бэлэн байгаа” гэж мэдэгджээ. Энэ үеэр Ким Жон Ун өнгөрсөн хоёрдугаар сард Ханойд болсон уулзалт амжилтгүй болсон нь АНУ-ын хандлагатай холбоотой гэж Путинд тайлбарласан тухай Солонгосын Төв Мэдээллийн Агентлаг мэдээлсэн байна. Хариуд нь Путин Солонгосын хойгийн цөмийн зэвсгийн асуудлыг зөвхөн яриа хэлэлцээрийн замаар шийдэх ёстойг батлан илэрхийлээд үүний тулд Умард Солонгост аюулгүй байдлын баталгаа хэрэгтэйг онцолжээ. Умард Солонгост тохиромжтой цагтаа айлчлан ирэхийг Ким Жон Ун урьж, Путин урилгыг талархан хүлээж авсан байна. Ким Жон Ун өнөөдөр сонгодог урлагийн тоглолт, далайн аквариум үзээд үдээс хойш нутгийн зүг жолоо залахаар болжээ. Өчигдөр хоёр удирдагч хамт үдийн зоог барихдаа орос борш, банш, хавчны салат зооглосон байна. Владимир Путин сэтгүүлчидтэй уулзахдаа Ким Жон Унтай хийсэн хэлэлцээрийнхээ үр дүнг АНУ-ын талд мэдээлнэ гэж хэлжээ. “Бидэнд нуух зүйл, ямар нэг хуйвалдаан байхгүй. Америкийн талд биднийг байр сууриа илэрхийлэхийг Ким удирдагч өөрөө хүссэн юм” хэмээн тэр ярьжээ. Владивостокын уулзалтаас ямар нэг хамтарсан мэдэгдэл гаргаж, гэрээ хэлцэл байгуулсангүй. Гэхдээ уулзалт талуудад чухал ач холбогдолтой болж өнгөрснийг тус тусын албаны эх сурвалжууд мэдээлсэн.
“Осол, гэмтлээс сэргийлэх тогтвортой хөгжлийн зорилт-2030” салбар хоорондын шийдвэр гаргагчдын улсын зөвлөгөөн Монгол Улсын Ерөнхий сайдын ивээл дор Төрийн ордонд болж байна. Зөвлөгөөнийг Монгол Улсын Ерөнхий сайд У.Хүрэлсүх нээж үг хэлэв. Тэрээр осол, гэмтлийн тохиолдол, түүнийг бууруулах чиглэлээр нухацтай хэлэлцэж, тодорхой арга хэмжээ авах нь чухал байгааг тэмдэглэв. Өнгөрсөн онд осол, гэмтлийн улмаас 142 мянга 600 гаруй хүн гэмтэж, 2920 хүн амь насаа алдсан байна. Энэ нь өдөрт 7-8 хүн осол, гэмтлийн улмаас амиа алдаж, дайн байлдаанд нэрвэгдсэн орныхтой дүйх хэмжээнд хүрсэн гэсэн үг юм. Зөвхөн зам, тээврийн ослоор 20 мянга 300 гаруй хүн гэмтэж, 529 хүн амь насаа алджээ. 
Тайландын Бангкок хотноо Ази тивийн 2019 аварга шалгаруулах тэмцээн 6 дахь өдрөө үргэлжилж байна. Эрэгтэйчүүдийн 60 кг-ын жинд Азийн наадмын аварга Эрдэнэбатын Цэндбаатар Узбекистаны Ш.Рахимовтой мөнгөн медалийн төлөө тулалдаж ялснаар Ази тивийн аваргын алтан медалийн төлөө өрсөлдөхөөр болов. Харин энэ өдөр /2019.04.25/ манай багаас эмэгтэй 4, эрэгтэй 2 тамирчин рингэнд гарч тулалдан ялагдал хүлээж хүрэл медаль хүртлээ. Армийн дэлхийн аварга, ОУХМ Б.Чинзориг энэ өдөр гэмтлийн улмаас рингэнд гараагүй бөгөөд хүрэл медаль хүртэхээр болов.