Month: October 2018

Дох, сүрьеэ, хумхаа өвчинтэй тэмцэх төслийн хүрээнд Глобаль сангийн санхүүжилтээр 10 ширхэг зөөврийн дижитал рентген төхөөрөмжийг ХӨСҮТ болон Увс, Дархан-Уул, Баянхонгор, Завхан, Хэнтий, Төв, Хөвсгөл, Өвөрхангай, Дорноговь аймагт хүлээлгэн өгчээ. Төхөөрөмжийн ашиглалттай холбоотойгоор ХӨСҮТ болон дээрх аймгуудын Нэгдсэн эмнэлэг, Эрүүл мэндийн газрын сүрьеэ, рентгений эмч, техникч, тоног төхөөрөмжийн инженерүүдэд сургалт явуулсан байна. Сургалтаар рентген тоног төхөөрөмжийн ашиглах болон цацрагийн хамгаалалт, аюулгүй байдлыг хангах чиглэлээр Мэргэжлийн хяналтын байгууллагын улсын ахлах байцаагч мэдээлэл өгчээ.

Мэргэжлийн хяналтын ерөнхий газрын 1800-1286 нээлттэй утсаар есдүгээр сарын 24-нөөс 10-12-ны хооронд нийт 135 иргэний гомдол саналыг хүлээн авч, зөвлөгөө, мэдээлэл өгчээ.

Үүнээс 86 дуудлаганд зөвлөгөө мэдээлэл өгч, 33 гомдлыг харъяа дүүрэг болон НМХГ-ын Шуурхай албанд шилжүүлсэн байна.

Мөн чиг үүрэгт хамаарахгүй асуудлаар 16 дуудлага ирсэн аж.

ШУТИС-ийн Эрдмийн зөвлөлийн ээлжит хуралдаанаар тус сургуулийн хүндэт профессор цолыг “Эрдэнэт” үйлдвэр ХХК-ийн ерөнхий захирал, техникийн шинжлэх ухааны доктор, Монгол Улсын Аж үйлдвэрийн гавьяат ажилтан Х.Бадамсүрэн, профессор цолыг “Эрдэнэт” үйлдвэр ХХК-ийн ерөнхий баяжуулагч, техникийн шинжлэх ухааны доктор, Төрийн соёрхолт, гавьяат уурхайчин Ж.Баатархүү нарт олгов.

Эрдмийн зөвлөлийг төлөөлж анхны ерөнхийлөгч П.Очирбат үг хэлэв. Тэрбээр “Монгол Улсын уул уурхай, Аж үйлдвэрийн салбарыг хөгжүүлэхэд хүндтэй гавьяа байгуулж, “Монголросцветмет” нэгдэл болон “Эрдэнэт” үйлдвэрийг удирдан, монгол инженерийн ур чадварыг нэр төртэй харуулж байгааг нь үнэлэн “Эрдэнэт” үйлдвэрийн ерөнхий захирал Х.Бадамсүрэнд хүндэт профессор цол олгож байна. Тэрээр хамтарсан үйлдвэрүүдийг удирдаж ирсэн шилдэг менежер төдийгүй геологи, уул уурхайн салбарын шилдэг эрдэмтэн, судлаач юм. Тиймээс салбартаа оруулсан хувь нэмрийг нь эрдэмтэн нөхөд нь үнэлж буй юм” хэмээн онцлов. Мөн ШУТИС-ийн профессор цол хүртсэн “Эрдэнэт” үйлдвэрийн ерөнхий баяжуулагч, Төрийн соёрхолт, гавьяат уурхайчин,техникийн шинжлэх ухааны доктор Ж.Баатархүү нь салбартаа хүлээн зөвшөөрөгдсөн эрдэмтэн, судлаач болохыг тодотгов.

ШУТИС нь сургуулийнхаа сургалт, эрдэм шинжилгээний хөгжил болон Монгол Улсын аж үйлдвэрийн салбарт хүндтэй гавьяа байгуулсан эрхмүүдэд профессор, хүндэт профессор цол олгодог. Энэхүү эрхэм цолыг тус сургуулийн эрдмийн зөвлөлийн шийдвэрээр шинжлэх ухаан, техник технологи, уул уурхайн салбарт гавьяа байгуулсан гадаад, дотоодын 30 гаруй эрдэмтэн хүртээд байгаа юм.

ОБЕГ,АХБ-тай хамтран Ядуурлыг бууруулах Япон сангийн санхүүжилтээр хэрэгжүүлж буй “Зуд болон ой, хээрийн түймэртэй тэмцэх олон нийтийн чадавхыг бэхжүүлэх” төслийг 2016-2019 онд хэрэгжүүлэхээр ажиллаж байна. Төсөл хэрэгжиж буй Дорнод аймгийн Цагаан-овоо суманд гамшгаас хамгаалах иж бүрэн сургуулийг энэ сарын 15-16-ны өдөр амжилттай зохион байгууллаа гэж ОБЕГ-аас мэдээлэв. Тус суманд болсон сургуулийн үеэр “Сайн дурын аврагч бэлтгэх” сургалтаар бэлтгэгдсэн сургагч багш нар болон сумын иргэд гал түймэр унтраах болон эмнэлгийн анхан шатны тусламж үзүүлэх тактикийн сургууль хийж, гамшгаас хамгаалах мэдлэгээ бататгав. Төсөл Говь-Алтай, Хөвсгөл, Дорнод, Сүхбаатар аймгийн 12 суманд хэрэгжиж байгаа юм.

Сонгинохайрхан дүүргийн 2018 оны хоёрдугаар ээлжээр хугацаат цэргийн албанаас халагдаж ирсэн дайчдыг хүлээн авч, ажлын байранд зуулчиллаа.

Тодруулбал, цэргийн албанаас халагдсан залуучуудад дүүргийн Хөдөлмөр, халамж үйлчилгээний хэлтсийн хамт олон “Шилэн хийц” ХХК, “Эко констракшин” ХХК, “Магнай трейд” ХХК, “Буян” ХХК, “Жигүүр гранд” ХХК зэрэг 75 гаруй аж ахуйн нэгж байгууллагын 60 төрлийн 1200 гаруй сул чөлөөтэй ажлын байр байгаа талаар мэдээлэл өгч, 130 гаруй иргэнийг сул чөлөөтэй ажлын байрандаа бүртгэн ярилцлага хийж, ажлын байранд урьжээ.

Монгол Улсын Баатар Ж.Нэхийтийн нэрэмжит, дэд хурандаа В.Намхайнямбуу захирагчтай Хилийн 0101 дүгээр ангийн хамт олон “Хилчдийн нийгмийн хамгаалал 2024” хөтөлбөрийн хүрээнд аймгийн удирдлагуудын дэмжлэгээр албан хаагчдынхаа нийгмийн асуудлыг шийдвэрлэж,14 айлын орон сууцыг ашиглалтад орууллаа.

“Хилчин хотхон”-ны анхны эзэд нь хилчин шалгагчид бөгөөд тэд ар гэртээ санаа зовохгүй ажил албаа гүйцэтгэж, ая тухтай тохилог орчин нөхцөлд амьдрах боломжтой болов. Орон сууцны барилгыг 0101 дүгээр ангийн ажилтан, албан хаагчид, цэргүүд хоёр сарын хугацаанд барьжээ.Орон сууцыг барихад аймгийн ИТХ-ын дарга Г.Бямбаа, Засаг дарга Ш.Оргил болон “Халиун Уул”, “Сэлэнгэ Титан”, “Сэлэнгэ АЗЗА” зэрэг аж ахуйн нэгж байгууллагууд дэмжлэг туслалцаа үзүүлсэнд ангийн нийт бие бүрэлдэхүүн талархал илэрхийлэв.

Шинэ орон сууцны нээлтэд аймгийн ИТХ-ын дарга Г.Бямбаа, Засаг даргын орлогч Б.Нарантуяа, Хилийн 0101 дүгээр ангийн захирагч В.Намхайнямбуу, ХХЕГ-ын ХШҮДАГ-ын дарга хурандаа Д.Чойбаатар нарын албаны хүмүүс оролцов.

Монгол Улсын Батлан хамгаалахын сайд Н.Энхболдын урилгаар ОХУ-ын Батлан хамгаалахын сайд, армийн генерал С.Шойгу өнөөдөр аравдугаар сарын 18-нд манай улсад айлчилж байна.Түүний айлчлалтай холбогдуулан Яармагын зам, Наадамчдын гудамж, Чингисийн өргөн чөлөө, Энхтайваны өргөн чөлөө, Сүхбаатарын талбайн баруун, зүүн талын замуудыг тухай бүрт нь тур хугацаагаар хэсэгчилэн хааж, хөдөлгөөнд зохион байгуулалт хийх аж.Айлчлалын үеэр Баянзүрх дүүргийн Цагдаагийн I, II хэлтэс хамгаалалт хийх бөгөөд Баянзүрх дүүргийн цэргийн штабынхан айлчлалын бэлтгэл ажлыг бүрэн хангажээ. Армийн генерал С.Шойгугийн айлчлал энэ өдрийн 17.00 цагт дуусах юм.