Month: October 2018

“Дархлаажуулалтын 10 хоног” эхэллээ. Дархлаажуулалтын хүрээнд өмнө нь вакцин хийлгээгүй хоцорсон 15 хүртэлх насны хүүхдүүдэд нөхөн хийх, эцэг, эх асран хамгаалагчид бодит мэдээлэл өгөх, эрүүл мэндийн ажилтны ур чадварыг сайжруулах зэрэг ажлуудыг хийхээр төлөвлөжээ. Монгол Улсын Засгийн газрын тогтоолын дагуу 24 дэх жилдээ уг аяныг зохиож байна. 2018 оны дархлаажуулалт “Вакцинаар хамтдаа сэргийлье” уриан дор болно. Энэ сарын 20-30-ны өдрүүдэд улс орон даяар үргэлжлэх юм. Өнөөдөр Монголын уран зургийн галерейд уулзалт зөвөлгөөн, “Вакцинаар хамтдаа сэргийлье” гэрэл зургийн үзэсгэлэнгийн хамт нээлтээ хийлээ. Нээлтэд Эрүүл мэндийн дэд сайд Л.Бямбасүрэн, ХӨСҮТ-ийн ерөнхий захирал Д.Нямхүү, аймаг орон нутаг, дүүрэг хороодын дархлаажуулалтын сувилагч, эмч зэрэг 100 гаруй төлөөлөгч оролцлоо.

Халдварт өвчин судлалын үндэсний төвийн дархлаажуулалтын албаны тандалт, мониторингийн тасгийн эрхлэгч В.Байгалтай ярилцлаа.

-Вакциныг яагаад хийлгэх ёстой вэ?

-Дэлхий дахинд халдварт өвчнөөс хамгийн найдвартай сэргийлэх арга бол дархлаажуулалт. Тиймээс дархлаажуулалтыг дэлхий дахинаа жилд хоёр удаа зохион байгуулдаг. Манай улсын хувьд одоогийн мөрдөгдөж байгаа дархлаажуулалтын тов 1993 онд батлагдсан. Хамгийн анх 1923 онд вакциныг хийж эхэлсэн. 1939 онд цагаан цэцэг өвчнийг устгаснаар дэлхийд хамгийн анх энэ өвчнийг устгасан улс болсон. Бидний дараа АНУ зэрэг том улсууд тус өвчнийг устгасан түүхтэй. 2000 онд халдварт саа буюу насан туршдаа хөгжлийн бэрхшээлтэй болох магадлалтай аюулт өвчнийг устгасан. Дэлхийд энэ өвчин дөрвөн оронд гарч байна гэсэн мэдээ байгаа. Гүйцэт устах хүртэл халдварт саагийн урдчилан сэргийлэх вакцинжуулалт хийгдсээр байх болно. Сүүлийн арваад жил сахуу, татран, хөхүүл ханиад зэрэг өвчний гаралт эрс буурсан. Нярайн татран сүүлийн 10 гаруй жил бүртгэгдээгүй. Ер нь вакцин хийснээр эдгээр өвчнүүд сүүлийн 10 жилд гарсангүй гэж ойлгож болно. Улаан бурхан өвчнөөр 2015 онд нэлээн том дэгдэлт болсон. Яагаад дэгдсэн бэ гэвэл 1990-ээд оны шилжилтийн үед вакцины хамралт буурсан. Энэ үеэр вакцинд хамрагдаагүй хүмүүсийн бөөгнөрөлөөс дэгдэлт үүссэн. Сүрьеэгийн вакцин нь халдвар авахаас урдчилан сэргийлдэггүй. Хүндрэлээс нь урдчилан сэргийлдэг. Хүүхдүүдийн дундах сүрьеэгийн хүндрэл маш сайн буурсан байгаа. Хепатит В-ийн вакциныг 1991 оноос хийж эхэлсэн. Дэлхий дахинд анхны хавдрын эсрэг вакцин гэж нэрлэгдсэн. Анх хийлгэж байсан хүүхдүүд одоо 27 нас хүрсэн байна. Үүнээс өмнө төрсөн хепатит В-ийн дархлаажуулалтад хамрагдах хүсэлтэй хүмүүс эмчид үзүүлээд, сайн дураар гурван тунгаар вакцин хийлгэж, урдчилан сэргийлэх боломжтой. Энэ нь хавдрын эсрэг вакцин учир үр дүн нь 10, 20 жилийн дараа гарч болно. Хепатит А-ийн вакциныг 2012 оноос хийж эхэлсэн. Өмнө хепатит А-ийн гаралт ямар их байлаа. Одоо 10000 хүн тутамд хоёр л халдвар илэрч байна гэсэн судалгаа гарсан.

-Вакцин хийлгээгүйн хор хөнөөл нь юу вэ?

-Вакцинаар хамгаална гэдэг нь өөрийгөө төдийгүй эргэн тойронд байгаа бүх хүмүүсийг давхар хамгаалдаг. Вакцинаа хийлгээгүй тохиолдолд вакцин хийлгээгүй халдварт өвчинд өртөнө. Гэтэл таны эргэн тойронд вакцин хийлгээгүй хүн байвал давхар халдвар тээж өвдөнө, тараана. Вакцин хийлгээгүйгээр өөрийгөө төдийгүй өрөөл бусдыг ч гэсэн хохироож байгаа хэрэг гэдгийг ойлгох хэрэгтэй.

-Халдварт өвчнийг вакцины тусламжтай дарсан гэж ойлгож болох уу?

-Тарилгатай халдварт өвчин буюу вакцинаар сэргийлэгддэг халдварт өвчин буурахын хэрээр нийт халдварт өвчин массаараа бас буурдаг.

-Сүүлийн үед вакцин хийлгээд миний хүүхэд өвдчихлөө, буруу вакцин хийлээ, хугацаа нь дууссан байсан гэдэг ч юмуу вакциныг эсэргүүцэх үг яриа гарч байна. Энэ юунаас болоод байна?

-Миний бодлоор нэр нөлөө бүхий хүн вакцины талаар сөрөг нэг мэдээ цацахад тэрийг уншиж судлалгүй, өөрийн болголгүй шууд итгээд, түүн дээр дөрөөлсөн дараа дараагийн нэмэлт хачир оруулан, тарааж явдаг хэсэг хүмүүс байдаг. Үүнийг би буруу үзэл гэж нэрлэнэ. Яагаад гэвэл энэ олон жилийн хугацаанд элдэв өвчнийг устгаад ирсэн урдчилан сэргийлэлтийг үгүйсгэх нь ямар үр дүнд хүрэхийг бодох хэрэгтэй. Хэрэв үүнээс нь болоод дахиад тэр өвчлөл гараад эхэлбэл тэр хүн хариуцлага хүлээх үү, яах билээ гэдгээ дүгнэдэг байгаасай л гэж хүсч байна.

-Вакцингүй өвчин бий юу?

-Маш олон өвчин бий. Одоо бол бид зөвхөн 11 төрлийн халдварт өвчнөөс урдчилан сэргийлэх вакциныг хэрэглэж байна.

-Монголдоо вакциныг үйлдвэрлэх боломж нь хэр байдаг бол?

-Түүхэн замналаас харвал манай орон вакцинаа өөрсдөө үйлдвэрлэж байсан цаг бий. Цагаан цэцэг өвчний вакциныг өөрсдөө үйлдвэрлэж, хэрэглэснээр уг өвчний гаралт байхгүй болсон. Хепатит В вакциныг Нийгмийн эрүүл мэндийн үндэсний хүрээлэнд үйлдвэрлэдэг байсан. Одоо үед вакцины бараа материалыг худалдаж авч, гаднаас оруулаад үйлдвэрлэх, тээвэрлэж оруулж ирээд шууд хэрэглэх хоёрын хоорондох эдийн засгийн ялгаа асар их болсон. Гадаад улсуудад вакцин массаар нь үйлдвэрлээд, тарааж байгаа учир харьцангуй хямд. Бид бүх бүтээгдэхүүнээ аваад Монголдоо үйлдвэрлэхээр өндөр зардал гарна. Тиймээс бидний барьдаг зарчим бол ДЭМБ-аас баталсан шаардлагыг хангасан, чанартай, хямд вакциныг ДЭМБ-ын хүүхдийн сангийн тусламжтай, тээвэрлэлтийн нарийн горимын дагуу оруулж ирдэг. Түүнээс хэн дуртай ашиг хайсан нэг хүн вакцин оруулж ирээд зардаг асуудал биш.

-Вакцинжуулалтын 10 хоногт сайн дураар хамрагдах хүсэлтэй хүн бүр вакцин хийлгэж болох уу, төлбөр бий юу?

-Хамгийн гол нь олон хүнийг хамруулж, урдчилан сэргийлэх арга хэмжээ авч байгаа учир хүссэн хүн болгон хамрагдаж болно. Дээр дурдсан 11 нэр төрлийн вакциныг хүн бүр хийлгэх боломжтой.

-Хаана хийлгэх вэ, цагийн хязгаар бий юу?

-Харьяа Өрхийн эрүүл мэндийн төвүүдээр ажлын цагийн хуваарийн дагуу хийнэ.

Автотээврийн үндэсний төв ТӨҮГ-аас аж ахуй нэгж байгууллагуудын дотоодын хяналтыг сайжруулах, нүүрс тээврийн замд гарч буй авто осол, зөрчлийг бууруулах зорилгоор “Баян зам” тээвэрчдийн холбоотой хамтран “Хурд 40/50 км/цаг-Аюулгүй тээвэр” аяныг зохион байгуулжээ.

Өмнөговь аймгийн Тавантолгой, Ухаахудагийн уурхайгаас Гашуунсухайт-Ганцмод боомтын чиглэлийн нүүрс экспортын тоо хэмжээ өсөхийн хэрээр тээвэрлэгч аж ахуй нэгж байгууллага нь тээврийн хэрэгслийн бүрэн бүтэн байдлыг хангах, жолоочийн ажил амралтын горимыг чанд мөрдүүлэх, байгууллагын дотоод хяналт шалгалтыг тогтмол зохион байгуулж, аюулгүй байдлыг хангах шаардлага нэмэгдсээр байна.

Иймд жолооч нарын анхаарал, сэрэмжийг нэмэгдүүлэх, аюулгүй байдлыг хангах үзлэг шалгалтыг байнга хийх, мэдээлэх тогтолцоог бий болгох зорилгоор тээвэрчдийн гэргий нар нэгдэн, анхааруулга санамжийг ийнхүү өгчээ.

Шилдэг оюутанд олгох Монгол Улсын Ерөнхийлөгчийн нэрэмжит тэтгэлгийг жил бүрийн 5, 12 дугаар сард олгодог уламжлалтай.

Монгол Улсын Ерөнхийлөгчийн нэрэмжит тэтгэлгийг амжилттай сурч хөдөлмөрлөн, үлгэр жишээ онцгой амжилт гаргасан дотоодын дээд боловсролын сургалтын байгууллагын бакалаврын хөтөлбөрийн өдрийн ангийн оюутан, коллеж, мэргэжлийн сургалт-үйлдвэрлэлийн төвийн 30 хүртэлх суралцагчид олгоно.

Тэтгэлэгт нэр дэвшигчийн материалыг 11 дүгээр сарын 15-ны дотор Ерөнхийлөгчийн Тамгын газарт буюу Төрийн ордны шуудангаар хүлээн авна.

Тэтгэлгийн журамтай эндээс танилцана уу.

Туул гол дээгүүр шинээр барих Баянзүрхийн 281.2 у/м төмөр бетон гүүрний бүтээн байгуулалтын ажил 63.5 хувийн гүйцэтгэлтэй байна. Өнөөдрийн байдлаар үндсэн гүүрний 52 шон суурь, 9 хуваарилах хавтан суурилуулж 18 тулгуур, захын тулгуурын их бие хийхээс 11-ийг нь хийгээд байгаа ажээ. Баянзүрх дүүргийн Гачууртын уулзвараас Налайх, Чойрын уулзвар хүртэлх авто зам нь 1963, 1965 онуудад БНМАУ болон БНХАУ-ын Засгийн газар хоорондын хэлэлцээрийн хүрээнд баригдсан бөгөөд 50-иас дээш жил болж, ашиглалтын шаардлага хангахаа больсон аж.

Налайхын авто замын техник ашиглалтын түвшинг нэмэгдүүлж, нэг чиглэлдээ хоёр эгнээ болгон өргөтгөхөөр төлөвлөн энэ жил ажлыг эхлүүлсэн. Тиймээс тус замын хөдөлгөөний аюулгүй байдлыг уялдуулах үүднээс Туул гол дээрх Баянзүрхийн гүүрийг дөрвөн эгнээ, дугуйн болон явган замтай барихаар төлөвлөн ажиллаж байгаа юм. Гүүрийг шинээр барьснаар замын хөдөлгөөний ачааллыг бууруулж, аюулгүй байдлыг сайжруулах, зорчигч тээвэрлэгчдийн цаг хугацаа, шатахуун хэмнэх, ая тухтай байдлыг хангах эдийн засгийн өндөр ач холбогдолтой.

Нийслэлийн Газрын албанаас Баянгол дүүрэгт 3 цэцэрлэг, 1 сургууль баригдах байршилд газар чөлөөлөлтийн ажлыг хийж гүйцэтгэлээ. Эдгээр сургууль, цэцэрлэгийн газрын нөлөөлөлд нийт 40 нэгж талбарын 18000 м2 буюу 1,8 га газар өртсөн бөгөөд газар чөлөөлөлт 96 хувьтай байна.
Шинээр сургууль цэцэрлэг барих ажилд идэвх санаачлагатай оролцож, олон нийтийн эрх ашгийн төлөө газраа чөлөөлсөн дээрх 40 иргэн, аж ахуйн нэгж байгууллагууддаа нийслэлийн иргэдийн өмнөөс талархал илэрхийлье.
Тухайлбал,
•БГД-ийн 16 дугаар хороо, Туулын 13, 14 дүгээр гудамжинд 200 ортой хүүхдийн цэцэрлэгийн газар
•БГД-ийн 2 дугаар хороо, 150 орто хүүхэд хүлээн авах хүчин чадалтай 66 дугаар цэцэрлэгийн өргөтгөлийн газар
•БГД-ийн 21 хороо, Горькийн 20 дугаар гудамжинд 240 ортой хүүхдийн цэцэрлэг барих газар
•БГД-ийн 9 хороо Горькийн 4, 5 дугаар гудамжинд 640 хүүхэд хүлээн авах хүчин чадалтай сургуулийн газар

Монгол Улсын Ерөнхий сайд У.Хүрэлсүхийн “СПОРТ БА ХӨГЖИЛ” Улсын зөвлөгөөнийг нээж хэлсэн үгийг бүрэн эхээр нь хүргэж байна.

Биеийн тамир, спортын салбарын улсын зөвлөгөөнд оролцогч эрхэм төлөөлөгчидөө

Эх орныхоо нэр алдрыг Дэлхийд дуурсгагч хүндэт Тамирчид, Дасгалжуулагчдаа

Та бүгдийнхээ амар амгаланг эрж, энэ өдрийн мэндийг дэвшүүлье.

Өнөөдөр Нэгдсэн Үндэстэний байгууллага, түүний гишүүн орнуудын зүгээс биеийн тамир, спортыг хүний эрүүл мэнд, бие бялдар, улс үндэстэний эв нэгдэл, нийгмийн эерэг харилцааг дэмжих хэрэглүүр, улсын орны бүтээн байгуулалт, нийгэм-эдийн засгийн хөгжлийн хурдасгуур хэмээн үзэж биеийн тамир, спортын салбарын бодлого, иргэдийн бие бялдрыг чийрэгжүүлэхэд онцгойлон анхаарч ажилладаг болоод байна.

Биеийн тамир, спорт нь ард иргэдийнхээ эрүүл мэндийг хамгаалах, бие бялдрыг хөгжүүлэхээс гадна өсвөр үе, залуучуудыг эх орноо гэсэн зүрх сэтгэлтэй, эх орноороо бахархдаг бие хүн болж төлөвшихөд онцгой ач холбогдолтой.

Энэ 2018 он Монгол хүн Олимпийн наадмаас анх медаль хүртсэний 50 жил, алтан медаль хүртсэний 10 жилийн тэгш ой тохиож буй түүхэн жил юм.

Энэ цаг мөчид Аргентиний Буонес Айрис хотноо зохиогдож буй Залуучуудын зуны Олимпийн наадам, Индонезийн Жакарта хотноо зохиогдож буй Азийн Паралимпийн наадамд Монгол Улсын баг тамирчид амжилттай оролцож, медалийн буухиаг үргэлжлүүлж байгаад бахархахгүй байхын аргагүй юм. ­

Энэ дашрамд, Олимп, дэлхий, олон улсын тэмцээнд амжилттай оролцож Монгол улсынхаа нэр алдрыг Дэлхийд дуурсгадаг Тамирчид, Дасгалжуулагчид болон арын албанд үеийн үед хоёргүй сэтгэлээр зүтгэж байдаг биеийн тамир, спортын салбарынхан Та бүгддээ Монгол Улсын Засгийн газрын нэрийн өмнөөс болон хувиасаа халуун баярыг хүргэе.

Монголын ард түмэн Та бүгдээрээ бахархаж, Та бүгддээ баярлаж байдаг гэдэгийг цохон тэмдэглэхэд таатай байна.

Та бүгд өнгөрсөн хугацаанд хийж бүтээснээ алдаршуулан дурсаж, өнөөдрийн амжилт бүтээл, алдаа оноогоо дүгнэн хэлэлцэж, ирээдүйн хөгжлийн бодлого, чиглэлээ тодорхойлохоор Биеийн тамир, спортын салбарын улсын зөвлөгөөнийг зохион байгуулж байгаа нь сайшаалтай.

Монгол Улсын Засгийн газар 2016-2020 онд хэрэгжүүлэх үйл ажиллагааны хөтөлбөртөө “Үндэсний спортын өв соёлыг дэлгэрүүлэх, өвлөн уламжлуулах, спортын эрдэм шинжилгээ, анагаах ухааныг хөгжүүлэх, тамирчдын бэлтгэл сургуулилт хийх таатай орчин нөхцөлийг бүрдүүлэх, спортыг эдийн засгийн эргэлтэд оруулах, тэмцээн, наадам зохион байгуулах тогтолцоог сайжруулах, салбарын бодлого, эрх зүйн орчинг боловсронгуй болгох,тамирчид дасгалжуулагчдын нийгмийн хамгааллынтогтолцоог бэхжүүлэх”-ээр тодорхой зорилтууд дэвшүүлж, эхнээсээ амжилттай хэрэгжиж байна.

Засгийн газрын тусгай сангийн хуулийн дагуу Биеийн тамир, спортын салбар анх удаа Спортыг дэмжих сантай болсноор иргэдийн дунд нийтийг хамарсан арга хэмжээ нэмэгдэж, зохион байгуулалтын чанар, үр дүн сайжирсан.

Энэ жилээс эхлэн Монгол Улсын Ерөнхий сайдын ивээл дор “Иргэдийн спортын наадам”-ыг анх удаа спортын 5 төрлөөр улс орон даяар нэгэн зэрэг зохион байгуулж байна.

Цаашид Иргэдийн спортын наадмын үр дүнд тулгуурлан хүн бүрийг биеийн тамир, спортоор хичээллэх боломжийг бодлогоор дэмжиж, иргэдийг олноор хамруулах боломжтой спортын төрлүүдийг нэмэх, насны бүлгээр ангилах зэргээр хамрах хүрээг нэмэгдүүлэхэд шаардлагатай арга хэмжээг авч ажиллах нь зүйтэй.

Шинэчлэн батлагдсан Биеийн тамир, спортын тухай хуулиар төрийн байгууллагын зарим чиг үүргийг төрийн бус байгууллагад гэрээгээр шилжүүлэх эрх зүйн орчныг бүрдүүлсэн байгаа.

Иймд холбогдох яам, агентлагийн зүгээс спортын холбоодыг хөгжүүлэх, засаглал, хүний нөөцийн чадавхийг бэхжүүлэх бодлого, эрх зүйн зохицуулалтыг бий болгон хэрэгжүүлэх, төр болон төрийн бус, олон улсын байгууллагын хамтын ажиллагааг өргөжүүлэхэд анхаарч ажиллах ёстой.

Мөн ирэх оноос Эрүүл мэндийн даатгалын тухай хуулиар иргэн магадлан итгэмжлэгдсэн спортын клубд хичээллэвэл эрүүл мэндийн даатгалын сангаас үйлчилгээний төлбөрийг хариуцдаг болох, Гаалийн тариф, гаалийн татварын хуулиар Монгол Улсад үйлдвэрлэдэггүй спортын зориулалтын тоног төхөөрөмж, хэрэгслэлийг гаалийн татвараас чөлөөлөх тухай хуулийн заалтууд хүчин төгөлдөр хэрэгжиж эхлэхтэй холбогдуулан хуулийн хэрэгжилтийг хангуулахад Монгол Улсын Засгийн газраас анхаарал хандуулж ажиллах болно.

Монгол улсын иргэн бүр биеийн тамир, спортоор тогтмол хичээллэж эрүүл, чийрэг, эрч хүчээр дүүрэн байх нь Манай улсын хөгжлийн гол үндэс болох юм.

Энд цугласан Та бид бүгд Эх орныхоо нэрийн өмнөөс Дэлхийд өрсөлдөх сайн тамирчдыг бэлтгэх, ард иргэдээ чийрэгжүүлэн эрүүл мэндийг нь хамгаалах үйл хэрэгт манлайлан ажиллах үүрэг хүлээсэн хүмүүс.

Та бүгд энэ эрхэм үүргээ нэр төртэй биелүүлж чадна гэдэг миний бүрэн итгэж байна.

Түүнчлэн хүн бүрийг биеийн тамир, спортоор хичээллэдэг болгох зорилгоор төр болон төрийн бус байгууллагын хамтын ажиллагааг тал бүрээр хөгжүүлэх, аж ахуйн нэгж, байгууллагууд нийгмийн хариуцлагаа ухамсарлаж ажилтан, албан хаагчдынхаа дунд биеийн тамир, спортын арга хэмжээг өргөнөөр зохион байгуулж байхыг энэхүү зөвлөгөөний индрээс Та бүгддээ уриалж байна.

Үүгээр “СПОРТ БА ХӨГЖИЛ” Биеийн тамир, спортын салбарын улсын зөвлөгөөн нээснийг мэдэгдэе.

Зөвлөгөөний үйл ажиллагаанд амжилт хүсье

Нийслэлийн Засаг дарга бөгөөд Улаанбаатар хотын Захирагч С.Батболдын 2016-2020 онд хэрэгжүүлэх үйл ажиллагааны мөрийн хөтөлбөрт “Төрийн үйлчилгээг цахим хэлбэрт үе шаттайгаар шилжүүлж, төрийн үйлчилгээний нэр төрлийг нэмэгдүүлнэ”-г бий болгоно хэмээн тусгасан билээ.

Нийслэлийн хэмжээний төрийн өмчитсургуулийн өмнөх боловсролын хүүхдийнуламжлалт цаасан суурьтай мэдээллийн урсгалыг цахим хэлбэрт шилжүүлж цахиммэдээллийн санг үүсгэснээр мэдээллийн чанар, хурд,төрийн байгууллагуудын уялдаа холбоо сайжирчэцэг эх, асран хамгаалагчдыг цэцэрлэгийн өдөр тутмын үйл ажиллагааны мэдээллээр хангах, тэдний хяналт тавих боломжийг бүрдүүлэхээр нийслэлийн Мэдээллийн технологийн газраас “Tsetserleg UB” аппликейшнийг нэмэлт хөгжүүлэлт хийж төрийн өмчийн цэцэрлэгүүдийн хэрэглээнд нэвтрүүлэхээр ажиллаж байна.

Энэхүү аппликэйшнаас цэцэрлэгийн дэлгэрэнгүй танилцуулга, өөрийн хүүхдийн дэлгэрэнгүй мэдээлэл харах, чөлөө авах хүсэлт гаргах, төлөв, түүх, цэцэрлэг болон ангийн арга хэмжээний мэдээлэл, багшийн заасан дуу, шүлэг, үлгэр зэргийг уншиж өгөх, тоглуулах, өдрийн хоолны цэс, орц найрлагын мэдээлэл харах, сургалтын хэрэглэгдэхүүн, үзвэр үйлчилгээ, тоглоомын дэлгэрэнгүй мэдээллийг харах, тухайн цэцэрлэгт санал, хүсэлт, талархал илгээх, санал асуулгад оролцох боломжтой.

Тус газрын зүгээс “Tsetserleg UB” аппликэйшний танилцуулга, удирдлагын вэб системийн сургалтыг нийслэлийн Боловролын газрын сургуулийн өмнөх боловсрол хариуцсан алба хаагчид болон дүүргийн Боловсролын хэлтсийн мэргэжилтэн, 212 цэцэрлэгийн эрхлэгч, аргазүйч, багш нарт 2 өдрийн сургалтыг амжилттай зохион байгууллаа.

Олон нийтийн сүлжээг ашиглан эцэг эхчүүд групп үүсгэж харьцдаг албан бус байдлыг арилгаж, цэцэрлэгийн удирдлага, багш, эцэг эхийн гурвалсан харилцааг албан ёсны мэдээллийн суваг болох “Tsetserleg UB” аппликэйшнээс авах боломжтой юмгэж нийслэлийн Мэдээллийн технологийн газраас мэдээллээ.

3-61 дүгээр гарам, Аргүнт, Аршижир орчмын гэрэл цахилгаангүй болон хүчдэлийн уналттай цахилгаан хэрэглэж байсан айл өрхүүд найдвартай, тасралтгүй хангагдах эрчим хүчтэй боллоо.

Уг ажлыг хоёр жилийн хугацаанд улсын хөрөнгө оруулалтаар “Да хот” компани хийж гүйцэтгэжээ. Гүйцэтгэсэн ажлын тухайд дээрх хоёр байршилд тус бүр 0.4 Кв-ийн 1.73 км агаарын шугам, 10 кВ-ийн 0.28 км агаарын шугам, 100.4 кВ-ийн 400 кВА дэд станцыг 300 гаруй сая төгрөгийн зардлаар бүтээн байгуулсан байна.

Ийнхүү өмнө нь телевизор, хөргөгч, индүү, угаалгын машин гээд амьдралын наад захын хэрэглээгээ хангах цахилгаангүй байсан айл өрхүүд эрчим хүчтэй болсондоо сэтгэл өндөр байгаагаа хэлж байв.