УИХ-ын чуулганы өнөөдрийн нэгдсэн хуралдаанаар Эд хөрөнгийн эрхийн улсын бүртгэлийн тухай хуулийн шинэчилсэн найруулгын төслийн анхны хэлэлцүүлгийг хийлээ.
Эд хөрөнгийн эрхийн улсын бүртгэлийн тухай хуулийн төслийн хэлэлцүүлгийн эхэнд УИХ-ын гишүүн Ц.Мөнх-Оргил, “Хуулийн төслийг хэлэлцүүлэгт бэлтгэх ажлын хэсгээс хэд хэдэн зарчмын зөрүүтэй санал боловсруулсан. Тухайлбал, хуулийн төсөлд иргэн газраа өмчилсөн тохиолдолд улсын бүртгэлийн байгууллагаас гэрчилгээ олгох, үрэгдүүлсэн тохиолдолд гэрчилгээг дахин олгохтой холбоотой зохицуулалтыг нэмэх болсон. Мөн газар эзэмших, ашиглах эрхийг улсын бүртгэлд бүртгүүлэх үйлчилгээг иргэнд аль болох хүнд суртал, чирэгдэлгүй хүргэх зорилгоор 28 дугаар зүйлийг өөрчлөн найруулсан. Мөн уг хуулийг зөрчсөн хуулийн этгээдэд хүлээлгэх хариуцлагын заалтыг нэмэх зэрэг 25 зарчмын зөрүүтэй санал бэлтгэсэн” гэлээ.
Гэр хорооллын иргэд өмчилсөн газартаа байшин барьж, түүнийгээ үйлчилгээний зориулалтаар ашиглахыг хуулиар хориглодог. Үүнийг шийдвэрлэх тодорхой заалт орсон эсэхийг Ж.Ганбаатар гишүүн тодрууллаа. Газар өмчлөлийн тухай хуульд иргэд өмчилсөн газраа зориулалтын дагуу ашиглах ёстой. Өөрөөр хэлбэл, иргэд 0.7 га газраа гэр бүлийн хэрэгцээний зориулалтаар өмчилсөн тохиолдолд зориулалтыг өөрчилж, үйлчилгээ эрхлэх боломжгүй гэдгийг Ажлын хэсэг хариулав.
Мөн М.Билэгт гишүүн иргэн, аж ахуйн нэгжид эзэмших, ашиглах зориулалтаар олгосон газрыг хожим нь тухайн эзэмшигчийн хүсэлтийг харгалзан өмчлөх заалт оруулахыг хориглох санал гаргасан. Ингэснээр Монгол Улсын газар нутгийг хамгаалах, гадны иргэн, аж ахуйн нэгжид газар өмчлүүлэхгүй байх боломж бүрдэнэ хэмээн үзэж байгаа. Хуулийн төслийн эцсийн хэлэлцүүлэгт бэлтгэх үед М.Билэгт гишүүний саналыг тусгах чиглэлд анхаарахыг УИХ-ын дарга хэллээ.
Ийнхүү чуулганы хуралдаанаар ажлын хэсгийн боловсруулсан зарчмын зөрүүтэй санал тус бүрээр санал хураалт явуулж, эцсийн хэлэлцүүлэгт бэлтгүүлэхээр Хууль зүйн байнгын хороонд шилжүүллээ.
Үндэсний их баяр наадам тэмдэглэн өнгөрүүлэхтэй холбогдуулан Дорнод аймгийн Засаг даргын 2018 оны 06 дугаар сарын 11-ний өдрийн “Баяр наадам тэмдэглэх хугацааг тогтоох тухай” А/237 тоот захирамж гарлаа.
УИХ-ын чуулганы өнөөдрийн нэгдсэн хуралдаанаар Төрийн өмчийг хувьчлах тухай багц асуудлыг хэлэлцэн шийдвэрлэнэ. Хувьчлагдах төрийн өмчит компаниуд дотор МИАТ, Монгол шуудан ХХК, Хөдөө аж ахуйн бирж багтаж байгаа. Хоёр тэрбум төгрөгийн үндсэн хөрөнгөтэй, жилийн 500 гаруй сая төгрөгийн орлоготой Хөдөө аж ахуйн биржийг хоёр тэрбум төгрөгөөр худалдах гэж байгаа нь ил болсон. Тэгвэл МИАТ компанийг жилийн орлогоос нь бага өртгөөр хувьд шилжүүлэх гэж байгаа тухай зарим эх сурвалжууд мэдээллэж байгаа. Сангийн яамнаас МИАТ-ыг хувьчлах саналаа эргүүлэн татна гэсэн мэдээлэл мөн цацагдаж эхэлсэн. Гэвч МИАТ-ыг хувьчлах сонирхолтой бүлэглэл УИХ-д бий. Өнөөдрийн чуулганаар МИАТ-ын хувьчлах асуудлыг шийднэ.
Нийслэлийн Онцгой байдлын газраас “Гамшгаас урьдчилан сэргийлэхэд хэвлэл мэдээллийн хэрэгслийн оролцоо” сэдэвт сургалт зохион байгууллаа. Гамшгийн эрсдэлийг бууруулахад хэвлэл мэдээллийн байгууллагын оролцоог нэмэгдүүлэх, гамшгаас хамгаалах мэдээ мэдээллийг олон нийтэд шуурхай хүргэхэд сэтгүүлчдийг мэдээллээр хангах, хамтран ажиллах зорилготой тус сургалтад хэвлэл мэдээллийн 30 орчим сэтгүүлч хамрагдсан юм. 
Монголбанк 2018 онд алт худалдан авалтыг нэмэгдүүлэх зорилгоор “Эх орныхоо алтыг Эрдэнэсийн сандаа” аяныг зарлалаа. Аяны нээлтийн ажиллагаа 2018 оны 6 дугаар сарын 13-ны өдөр Төв аймгийн Заамар суманд болж, Уул уурхай, хүнд үйлдвэрийн яам, Монголын алт үйлдвэрлэгчдийн холбоо, Заамар сумын удирдлагууд хамтран зохион байгуулсан бөгөөд тус аймгийн арван сумын иргэдийн төлөөлөл мөн алтны олборлогч уурхайн ажилчид оролцлоо. Энэ үеэр алт худалдан авах үйл ажиллагааны тухай болон тус салбарт төрөөс алтны үйлдвэрлэлийг дэмжихэд чиглэсэн бодлого шийдвэрийн талаар дэлгэрэнгүй мэдээлэл өгч иргэдийн сонирхсон асуултад хариулт өглөө.
Нийгмийн дэг журам, ёс суртахууныг цагдаагийн хүчээр буюу цахилгаан бороохойгоор зохицуулдаг байлаа. Цагдаа байхгүй бол юу ч хийж болдог, байвал эмх журамтай, ёс суртахуунтай байдаг үе байсан. Энэ үеийг цахилгаан бороохойн үе гэж хэлээд байгаа юм. Одоо тийм биш болж цахим бороохойн эрин эхэлж байна. Юу гэсэн үг вэ гэхээр олон нийтийн цахим мэдээллийн хэрэгслийг хэлж буй хэрэг. Орчин үед хаа нэгтээ явахдаа ёс суртахууны доголдол гаргавал хөндлөнгийн хэн нэгэн гар утсаараа зургийг нь авчихдаг болсон. Байшингийн булан тохойд бие засах, машиныхаа цонхоор хог хаях, зүлгэн дээр машинаа байрлуулах тохиолдолд үйлдэл дээрээ баригдана гэсэн үг. Цагдаа байсан, байгаагүй нь ер хамаагүй. Зөрөн өнгөрч байгаа хэн дуртай нь ёс суртахуунгүй аашилж байгааг чинь баримтжуулаад олон нийтэд мэдээлдэг болчихож. Утасныхаа 3G сүлжээг асааж байгаад л твиттер, фэйсбүүк, дуртай вэб хуудсандаа байршуулчихна. Үгүй ядаж л байгууллага бүр утасгүй интернэттэй болсон болохоор дурын цайны газар ороод л ёс суртахуунгүй авирлагчийн зургийг тавина. Нэг ёсондоо буруу үйлдэл хийсэн хүнийг эргэж харахын завдалгүй түмэнд зарлачихаж байгаа юм. Иймэрхүү зураг олны анхааралд хүрэхдээ тун хурдан. Захын хүн найз нөхдөдөө түгээж “Энийг хар даа, ичээсэй” гэлцдэг. Бас зургийнх нь дор гаргасан үйлдэлд нь тохирсон муухай үгээр доромжилж, газар дор ортол нь муулж байгаа юм. Хэрэв таньдаг хүн нь байвал утас руу нь залгаад “Ичиж үхээч ээ” гэсээр байж суухын эцэсгүй болгоно. Эргэн тойрных нь байтугай таньж мэдэхгүй хүмүүс энэ мэтээр чичлээд байхаар цагдаа, цахилгаан бороохойгоос долоон дор болж байгаа юм. Ингэж нийгэмд ёс суртахуун, сахилга батыг ил тод зарлачихаар цагдаатай цагдаагүй биеэ зөв авч явахгүй бол болохгүй болжээ. Цагдаа харагдвал хүн зодохоо болиод, байхгүйд нь дээрэлхдэг үе ард хоцорч байна гэсэн үг. Цагдаагийн нүднээс далд хийсэн зүй бус үйлдлийг баримтжуулаад олонд дэлгэдэг цахим бороохойн эрин эхэлж байна. Цахим бороохойн үе нийгмийг сайнаар ч босгож чадна, муугаар ч эргүүлж чадна. Тэгэхээр хувь хүмүүс ёс журамтайгаар биеэ зөв авч явах хэрэгтэй болжээ. Хүн хараагүй байгаа юм чинь гээд ил задгайгаар хогоо хаяж болохгүй болсон байна. Яагаад гэвэл дэргэдүүр чинь хурдтай өнгөрч байгаа автомашин дотроос зургийг чинь авч байгаа. Тэгэхээр үй олон дуран таныг харж байгаа гэж ойлгон биеэ цэнэж яваарай. Тэгэхгүй бол нэг л эвгүй үйлдэл чинь танд муу нэр зүүлгэнэ. Ийм цаг үед амьдарч байгаагаа хүн бүр мэдрэх хэрэгтэй. Одоохондоо олон нийт хараахан бүрэн гүйцэд мэдэрч эхлээгүй байна. Мэддэг, мэдэрдэг болох хэрэгтэй.
Харин манайд нэгийгээ энэ муу ядуу гуйлгачин, чадалгүй амьтан гэж бодоод айхтар дээрэлхэж байгаа харагддаг. Цагдаа, шүүхэд танил тал байхад энэ мууг яасан ч болно гэж сэтгээд аль муухайгаар доромжлоод байна. Бүр насаар нь дээрэлхэж байгаа тохиолдол ч бий. Доромжлуулж байгаад нь нээрээ л санаж, сарвайх хүн байхгүй. Залуу нь хөгшнөө, хөгшин нь хүүхдээ амандаа орсон аль муухай үгээр гутаан доромжилж болоод байна. Одоо харин ийм цаг өнгөрчээ. Бусдад уурласан уураа дорой нэгэнд гарган элдвээр хашгирч байвал хажууд байгаа хүн чинь гар утсаараа бичиж аваад “Youtube” хуудсанд байрлуулчихна. Албан тушаалаараа сүрдүүлэн ажилтнаа цохиод авбал хэдхэн хормын дараа л таныг олон нийт харааж зүхнэ. Энэ бол гар буунаас ч аюултай “зэвсэг”. Нэг ёсондоо иргэн бүр цахим гар буутай болчихлоо гэсэн үг. Үүнийг ойлгож биеэ зөв авч явахаас өөр аргагүй цаг үе иржээ. 
Олон жилийн насжилттай, хотыг ногоон харагдуулж байгаа моддын дийлэнх нь улиас. Улаанбаатар хотын есөн дүүргийн хэмжээнд 13,956 ширхэг улиас мод байдаг ба тэдгээрийн 50 хувь нь эм улиас. Модны цагаан хөвөн буюу унгарил зөвхөн эм улиаснаас гардаг.