Month: June 2018

Хөдөө аж ахуйн биржийн тухай хуулийн хэрэгжилтийг хангуулах чиглэл өгөх, биржийн арилжааны зах зээлд оролцогчдын үйл ажиллагаанд хяналт тавих, зөвлөмж, дүгнэлт гаргах чиг үүрэг бүхий Биржийн зохицуулах зөвлөлийн хурал өнөөдөр боллоо. Уг зөвлөлийн бүрэлдэхүүнийг Засгийн газрын 2016 оны 179 дүгээр тогтоолоор шинэчлэн баталсан бөгөөд төрийн захиргааны төв байгууллагын 6, төрийн бус байгууллагын 7 төлөөлөл багтаж байна.

Хурлын эхэнд, Биржийн зохицуулах зөвлөлийн бүрэлдэхүүний 100 хувийн саналаар зөвлөлийн даргаар ХХААХҮ-ийн дэд сайд Ж.Саулег сонголоо. Тэрбээр, “Хөдөө аж ахуйн гаралтай бараа, түүхий эдийн биржийн тухай хуулийн хэрэгжилтийг хангуулах, биржийг олон улсын жишигт нийцүүлэн сонгодог утгаар нь хөгжүүлэхийн төлөө Зөвлөл ажиллана. Цаашид гурил буудайн үнийг бирж болон зах зээлийн үнэ дээр тогтсон шинэ зөв зарчимд оруулах нь зүйтэй. Түүхий эдийн боловсруулалтыг сайжруулж, эцсийн бүтээгдэхүүн үйлдвэрлэл, экспортыг нэмэгдүүлэх үйл ажиллагааг дэмжих нь чухал” гэдгийг онцолсон.

Өнөөдрийн хурлаар “Хөдөө аж ахуйн бирж” ХХК-ийн 2017 оны үйл ажиллагааны танилцуулга, 2018 онд хийх ажлын төлөвлөгөө, Хөдөө аж ахуйн гаралтай бараа, түүхий эдийн биржийн тухай хуулийг хэрэгжүүлэх ажлыг эрчимжүүлэх тухай, Биржээр арилжаалах бараа, бүтээгдэхүүний нэр төрөл, тоо хэмжээг нэмэгдүүлэх тухай гэсэн гурван асуудал хэлэлцсэн.

Эдгээр асуудлыг хэлэлцсэний дараа, Биржээр арилжсан болон экспортод гарсан ХАА-н гаралтай бараа, түүхий эдийн талаарх цахим мэдээллийг Гаалийн ерөнхий газарт тогтмол хүргүүлж байх, биржээр арилжих барааны нэр төрлийг нэмэгдүүлж, арьс ширний туршилтын арилжаа хийх, хүнсний буудай, тосны ургамал, мал арилжих ажлыг зохион байгуулах зэрэг хэдэн хэдэн чиглэлийг Хөдөө аж ахуйн биржид өглөө.

Дашрамд дурдахад, “Хөдөө аж ахуйн бирж” ХХК нь 2013 онд үүсгэн байгуулагдсан цагаас өнөөг хүртэлх хугацаанд нийт 834 удаагийн арилжаа зохион байгуулж, арилжааны үнийн дүн 2.8 их наяд төгрөгт хүрээд байна. Хөдөө аж ахуйн бараа түүхий эдийн бэлтгэл болон арилжааг зах зээлийн нэгдсэн зохион байгуулалтад оруулах үйл ажиллагаа нь биржийн систем юм. Бирж нь зах зээлд үнэ, чанар болон эрэлт, нийлүүлэлтийн бодит тэнцвэр буюу үнэ шударга тогтох зарчим, үнийн эрсдэлийн удирдлага, бүтээгдэхүүний хөрвөх чадварыг бий болгодог.

Хүнс, хөдөө аж ахуй, хөнгөн үйлдвэрийн яам, Монголын ойчид, мод үйлдвэрлэл эрхлэгчдийн холбоо хамтран “Хамтын ажиллагаа-хөгжлийн тулгуур” сэдэвт Ой, модны үйлдвэрлэл эрхлэгчдийн улсын зөвлөгөөн зохион байгуулж байна. Зөвлөгөөний үеэр ой, модны үйлдвэрлэлийн хөгжлийн боломж, ойн нөөц ашиглалт, модон эдлэл, тавилгын үйлдвэрлэлийн хөгжлийн чиг хандлага зэрэг сэдвээр илтгэл хэлэлцүүлж, тулгамдсан асуудлаа хэлэлцэж байна.

Зөвлөгөөнийг нээж, ХХААХҮЯ-ны Төрийн нарийн бичгийн дарга Д.Энхбат хэлсэн үгэндээ, “Бид хүчээ нэгтгэж хамтарч ажиллаж чадвал ойрын хугацаанд үйлдвэрлэлийн хэмжээ нэмэгдүүлж, мод, модон эдлэл, тавилгын дотоодын хэрэгцээг бүрэн ханган, ойгоо цэвэрлэсний үр дүнд эдийн засгийн эргэлтэд оруулж, олон ажлын байр шинээр бий болгох боломж бүрэн байна” гэлээ. Тэрбээр, төр, хувийн хэвшлийн хамтын ажиллагааг бэхжүүлж, ойртон нягтарч, орчин үеийн шинэ, шинэ технологи, өндөр үр ашигтай ой, модны үйлдвэрлэлийн салбарыг хөгжүүлэхийг нийт үйлдвэрлэл эрхлэгчдэд хандан уриалсан юм.

Монгол Улсын ой, модны үйлдвэрлэлийн салбарт 450 орчим үйлдвэр үйл ажиллагаагаа явуулж, энэ салбарт 6000 гаруй хүн ажиллаж, жилдээ 220 гаруй тэрбум төгрөгийн бүтээгдэхүүн үйлдвэрлэдэг. Үүнээс 90 хувь нь 5-10 ажилчинтай жижиг үйлдвэр байгаа бол 10 хувь нь 30-300 хүртэлх ажилтантай дунд аж ахуйн нэгжүүд бий. Үйлдвэрлэлийн чиглэлээр нь авч үзвэл, мод бэлтгэл, зүсмэл материалын 110, барилгын модон хийцийн 24, хавтан, цул модон хийцийн 70, зөөлөн тавилгын 11, гэрийн мод, тавилгын 50, хөгжмийн зэмсгийн 6, шахмал түлшний 16 үйлдвэр, 180 мужаан цехтэй. Эдгээр үйлдвэр, цех нь мод, модон материал, тавилгын дотоодын хэрэгцээний 45 орчим хувийг хангаж байна.

1990 оноос хойш уналтад ороод байсан ой, модны үйлдвэрлэлийн салбарыг сэргээхийн тулд эрхлэгчид хамтарч ажиллан, үйлдвэрлэлээ нэмэгдүүлснээр мод, модон эдлэл, тавилгын дотоодын хэрэгцээгээ бүрэн хангаж чадна гэж ХХААХҮЯ үзэж байна. Энэ ч утгаараа өнөөдөр салбар яамнаас ой, модын үйлдвэрлэлийн хөгжлийн боломж, ойрын болон дунд хугацаанд авч хэрэгжүүлэх арга хэмжээнийхээ талаар танилцуулга хийлээ. Тухайлбал,

Ойрын хугацаанд ойн төв замтай болж, 2018 оны 2 дугаар сард батлагдсан “Үйлдвэржилт 21:100 хөтөлбөр”-ийн хүрээнд ойн аж ахуйн цогцолборыг Сэлэнгэ, Хөвсгөл, Булган, Дархан-Уул аймгуудад байгуулахыг зорьж байна. Мөн модлог шахмал хавтангийн, шахмал түлшний болон мод боловсруулах жижиг үйлдвэр байгуулах төлөвлөгөөтэй ажиллаж байна гэж ХХААХҮЯ-ны Хөнгөн үйлдвэрийн бодлогын хэрэгжилтийг зохицуулах газрын дарга Б.Батхүү илтгэлдээ дурдлаа.

Авто замын ангиллаар ойн зам нь ойн санд замын сүлжээг үүсгэж, ой модны аж ахуйн хэрэгцээ шаардлагыг ханган, ойн менежментийн нэгж, ашиглагчийг ойн сангийн тодорхой хэсэгт хүргэх үүрэг бүхий зам юм. Ашиглалтын зонхилох хэлбэрээс нь хамаарч ойн замыг ойн аж ахуйн, мод тээврийн, түймрийн зэргээр ангилдаг. Ойн замын сүлжээг хөгжүүлснээр ойд явуулах аж ахуйн үйл ажиллагаанаас үүдэлтэй сөрөг нөлөөлөл буурч, байгалийн нөөц ашиглалт сайжирч, агро-ойн аж ахуйн хөгжих нөхцөл бүрдэнэ гэж ШУТИС-ийн Ой модны сургалт, судалгааны хүрээлэнгийн эрдэмтэн нарийн бичгийн дарга, доктор Ч.Болдбаатар хэлж байлаа.

2017 оны байдлаар Монгол орны ойгоор бүрхэгдсэн талбайн хэмжээ 12,3 сая га байгаа бол ойн сан бүхий газар 18,6 сая га талбайг эзэлж байна. Ойн нөөцийн тухайд авч үзвэл, 1,2 тэрбум шоо метр ургаа мод, 170 сая шоо метр хатсан мод, 248 сая шоо метр унанги модны нөөцтэй. Нийт нөөцийн 80,7 хувийг шинэс мод эзэлдэг. Монгол орны ой эмзэг хэдий ч сэргэн ургах чадвар сайтай. Гэтэл 1990-иэд оноос хойш төрөөс ойг зөвхөн хамгаалахад чиглэсэн бодлого хэрэгжүүлж байв. Нөхөн сэргээгддэг энэхүү баялгийг зүй зохистой ашиглах нь цаг болсон.

Манай улсын хувьд модны жилийн бодит хэрэгцээ нь 3,6 сая шоо метр мод байхад одоогоор дөнгөж жилдээ 800,0 мянган шоо метр мод бэлтгэж байгаа юм. Тиймээс ойн тогтвортой менежмент хэрэгжүүлж, байгаль орчинд ээлтэй технологиор ойн аж ахуйг эрхэлж, ойгоос бэлтгэх модны хэмжээг нэмэгдүүлэх бодлогыг Байгаль орчин, аялал жуулчлалын яам баримталж байна гэдгийг тус яамны Ойн бодлого зохицуулалтын газрын дарга Б.Оюунсанаа мэдээлсэн юм.

Зөвлөгөөнд Дархан-уул, Сэлэнгэ, Хөвсгөл, Увс, Хэнтий, Дорнод, Архангай, Булган, Завхан, Төв аймаг зэрэг 11 аймаг, нийслэлийн ой, мод, тавилгын үйлдвэрлэл эрхлэгч аж ахуйн нэгжүүд болон төрийн болон төрийн бус байгууллагын 150 орчим төлөөлөл оролцож байна. Төлөөлөгчид салбарын тулгамдсан асуудлаа нээлттэй хэлэлцэж байгаа юм. Монголын ойчид, модны үйлдвэрлэл эрхлэгчдийн холбооноос салбарын хэрэгжүүлэгч агентлагийг дахин байгуулах, салбар дундын хамтын ажиллагааг сайжруулах, хоршиж хамтран ажиллах төлөвлөгөө боловсруулах шаардлагатай байна гэдгээ Монголын ойчид, модны үйлдвэрлэл эрхлэгчдийн холбооны тэргүүн, Монгол Улсын зөвлөх инженер Д.Баасанбямба илэрхийллээ.

Ой, модны үйлдвэрлэл эрхлэгч компаниуд мод бэлтгэл, зүсмэл материалын үйлдвэрлэл, барилгын модон хийц, цул модон болон хавтан хийцийн тавилга, зөөлөн тавилга, модон хаалга, цонх, гэрийн мод, хөгжмийн зэмсэг, паркетан шал, дотор дизайн тохижолтын чиглэлээр төрөлжин ажиллаж байна. Тэр дундаа барилгын хаалга, гал тогооны тавилга, зөөлөн хийцийн тавилга зэрэг зарим нэр төрлийн бүтээгдэхүүнийг 100 хувь дотооддоо үйлдвэрлэх боломж бүрджээ.

Хэрэглэгчид тавилга сонгохдоо үнэ, чанар, хэмжээ загвар, өнгө, брэндийн нэр хүнд, олон үйлдэлт ухаалаг эсэх, баталгаат хугацаа, хүргэлтийн үйлчилгээ гээд олон хүчин зүйлийг харгалзан үздэг. Тиймээс импортын тавилгатай өрсөлдөхүйц үнэ санал болгож, чанар, хийц загвартаа онцгой анхаарч, хамтарч ажиллаж чадвал Монголынхоо зах зээлд байр сууриа эзэлж, улмаар экспортод бүтээгдэхүүнээ гаргах боломжтой гэж “Бест буйдан” ХХК-ийн ерөнхий захирал Ү.Батбаяр үйлдвэрлэл эрхлэгчиддээ хандан хэллээ.

Сүүлийн жилүүдэд төр засгаас тус салбартай холбоотой “Төрөөс ойн талаар баримтлах бодлого”, “Ойн цэвэрлэгээ”, “Үйлдвэржилт 21:100” хөтөлбөр зэрэг бодлогын баримт бичиг батлан гаргаж, дотоодын зах зээлээ хамгаалах, төрийн худалдан авалтыг нэмэгдүүлэх бодлого барьж байна. 2014-2017 онуудад тус салбарын 65 иргэн, аж ахуйн нэгж байгууллага Засгийн газрын бондын хөрөнгө, Жижиг, дунд үйлдвэрийг хөгжүүлэх сангаас 33 тэрбум төгрөгийн хөнгөлөлттэй зээл олгож, 8 орчим тэрбум төгрөгийн хөрөнгө оруулалтыг өөрийн хөрөнгөөр хийн, олон үйлдвэр техник технологио шинэчилжээ.

Цаашид Ойн тухай хуульд нэмэлт, өөрчлөлт оруулах, “Мэргэжилтэй ажилтан” хөтөлбөрийг боловсруулан батлуулж хэрэгжүүлэх, “Ойн цэвэрлэгээ” хөтөлбөрийн хэрэгжилтийг эрчимжүүлэхийг зорьж байгаа юм. Түүнчлэн мод бэлтгэлийн үйлдвэрлэлд шинэ техник технологи нэвтрүүлж, ойн зам барьж байгуулан, үйлдвэрүүдийг хөнгөлөлттэй зээл, лизингийн үйлчилгээнд хамруулж, татварын бодлогоор дэмжих, төрийн худалдан авалтыг нэмэгдүүлэх зэргээр үйлдвэрлэгчдэд чиглэсэн арга хэмжээ авахаар ажиллаж байна.

Зөвлөгөөн нээлттэй хэлэлцүүлгээр үргэлжилж байгаа бөгөөд оролцогчид санал нэгдсэн асуудлаараа зөвлөмж гаргах юм.

Монголд анх удаа сайхан бүсгүй шалгаруулах уралдаан зохион байгуулж эхэлсний 30 жилийн ойг угтан Монголын эмэгтэйчүүдийн “Хатан эрдэнэ” холбооноос “Монголын сайхан бүсгүй-2018” 15 дахь удаагийн гоо сайхны тэргүүн наадмыг “Эмэгтэйчүүд гар гараасаа” уриан дор зохион байгуулах гэж байна. Энэ нь Монголын сайхан бүсгүй шалгаруулах уламжлалт уралдаан эргэн ирлээ гэсэн үг. 11 жил завсарласан уг тэмцээнийг сэргээж буй зохион байгуулагчид наадмын хугацааг зарлаж, алтан эрдэнийн өргөмжлөлт бүсгүйн хүртэх титмийг танилцууллаа.

Монголын эмэгтэйчүүдийн “Хатан эрдэнэ” холбооноос Монголын сайхан бүсгүй шалгаруулах уралдааны болон бусад ижил төстэй уралдааны хүрээнд нэгэн чухал өөрчлөлт, шинэчлэлтийг авчирчээ. Энэ нь “Монголын сайхан бүсгүй-2018” 15 дахь удаагийн гоо сайхны тэргүүн наадмаас эхлэн уралдааны шалгуурын нэгэн төрөл болох “Усны хувцастай гараа”-г бүрэн халах шийдвэр юм. Эмэгтэй хүний эрхэмсэг нандин гоо байдлыг хадгалж, гадаад өнгө үзэмж, хэлбэр байдалд бус бүсгүйчүүдийн мэдлэг боловсрол, дотоод мөн чанар, хүмүүнлэг, цогц сайхан байдлыг тодотгон ирсэн уламжлалт уралдааны нэр хүндэд дээрх өөрчлөлтийг нийцнэ гэж зохион байгуулагчид үзэж байгаа аж. Энэ нь ч оролцогч охид, үзэгч, дэмжигчдэд таалагдаж байгаа нь гарцаагүй. Ирээдүйн эмч, багш, удирдагч, манлайлагч, ирээдүйн ээж болох охид, бүсгүйчүүдийг усны хувцастай дүр төрхтэйгөөр нийтэд таниулж үлдээхээс орчин үеийн ижил төрлийн уралдаанууд татгалзах болсныг Монголын “Хатан эрдэнэ” холбоо дэмжин, ийм шийдвэр гаргасан байна. Тухайлбал, АНУ өнгөрсөн жилээс мөн гоо бүсгүйн уралдааныхаа усны хувцастай үзүүлбэрийг хассан билээ.

ГОО САЙХНЫ ТЭРГҮҮН НААДМЫН УРИАЛГА

Зөв бодол
Зөв үг
Зөв үйлдэл
Зөв хандлага

Өв тэгш хойч ирээдүй, төв тэгш бүсгүйчүүдийг нээн, уг наадмаар дамжуулан төлөвшүүлэх. Бүсгүй хүний нандин, ухаалаг, нинжин сэтгэлийг гоо үзэсгэлэн, мэдлэг боловсролтой хослуулан хөгжүүлэхийг хүсдэг Монголын охид, бүсгүйчүүдийг нэгтгэн, тэдний оюун билэг, авьяас чадварыг таниулан, нийгэмд байр суурь эзлэхэд нь хөшүүрэг болох, алдаршуулах, хүмүүнлэг үйлсэд дуу хоолойгоо өргөхөд нь дэмжлэг болохыг зорьжээ.

“МОНГОЛЫН САЙХАН БҮСГҮЙ” УРАЛДААН ЯМАР ТҮҮХТЭЙ ВЭ?

Анхны уралдааныг 1989 онд зохион байгуулсан. Анхны сайхан бүсгүйгээр Н.Биндэрьяа тодорч байв. “Монголын сайхан бүсгүй” уралдаан нь гоо зүй, загвар, урлаг соёлын хүрээнд хамгийн нэр хүнд бүхий улсын чанартай уралдаан байж ирсэн. Тус уралдааны оролцогч бүсгүйчүүд өдгөө Монголын улс төр, нийгэм, соёл боловсрол, бизнес, эрүүл мэнд, хүмүүнлэгийн салбарт манлайлж, үлгэр жишээ болж яваа нь энэхүү наадмын цар хүрээ, үнэ цэнийг илтгэдэг. 2007 оны Монголын сайхан бүсгүй шалгаруулах 14 дэх удаагийн наадмаас хойш уралдааныг түр завсарласан бөгөөд энэ оноос дахин сэргээн зохион байгуулж байна.

АЛТАН ЭРДЭНИЙН ӨРГӨМЖЛӨЛТ, МОНГОЛЫН САЙХАН БҮСГҮЙЧҮҮД

1989 он Г.Биндэрьяа (Улаанбаатар хот)
1990 он Н.Мөнхцэцэг (Улаанбаатар хот)
1991 он Ч.Мичидмаа (Улаанбаатар хот)
1992 он Ч.Чулуун-Эрдэнэ (Улаанбаатар хот)
1993 он Ц.Сарантуяа (Дархан-Уул аймаг)
1994 он О.Оюунтуяа (Дархан-Уул аймаг)
1995 он С.Бүрэнжаргал (Дархан-Уул аймаг)
1997 он Б.Түмэнхүслэн (Улаанбаатар хот)
1998 он Ц.Сансармаа (Улаанбаатар хот)
2001 он Ё.Нямжав (Завхан аймаг)
2002 он Д.Уянгалянхуа (Увс аймаг)
2003 он П.Ариунбилэг (Улаанбаатар хот)
2004 он А.Сарнай (Булган аймаг)
2007 он Г.Гантуяа (Орхон аймаг)

ИЖИЛ ТӨРЛИЙН ШАЛГАРУУЛАЛТААС ЯМАР ЯЛГААТАЙ ВЭ?

Монголын анхны гоо сайхны наадам. Сайхан гэдэг үгээр дотоод агуулга, гадаад хэлбэр хоорондын зохистой нийлэмжийг илэрхийлдэг. Тийм ч болохоор уралдааныг онцлог, уламжлалынх нь дагуу гадаад үг хэллэг, илэрхийллээс татгалзах хэлбэрээр нэршиж байгаа. Монголын охид, бүсгүйчүүдийн гоо үзэсгэлэн, оюун билэг, авьяас, нийгэмд нөлөөлөх давуу талыг нээн дэмжихэд зохион байгуулагчдын зүгээс анхаарал хандуулна. Бүсгүйчүүдийн өв тэгш байдал, хүмүүжил, төлөвшилд бодлогоор дэмжлэг үзүүлдэг. Ирээдүйн ээж, эмч, багш, удирдагч болох эмэгтэйчүүд, бүсгүйчүүдийг хүмүүнлэгийн үйлсэд нэгтгэн, тэднийг нийгэмд үлгэр жишээ үзүүлэх хөтөлбөрт хамруулахаараа ач холбогдолтой. Бүсгүй хүн бүр хүмүүнлэг нийгмийн элч, түүчээ байдаг билээ.

ЕСӨН ЭРДЭНИЙН ӨРГӨМЖЛӨЛ ЭРГЭН ИРЛЭЭ

“Монголын сайхан бүсгүй-2018” тэргүүн наадмын явцад Оюунлаг, Хүмүүнлэг, Авьяаслаг номинацийн эздийг шалгаруулна. Төгсгөлийн шатны шалгаруулалтад есөн эрдэнийн өргөмжлөлт бүсгүйчүүд тодорно.

АЛТАН ЭРДЭНЭ: Тэргүүн байрын эзэн “Алтан Эрдэнэ”-ийн өргөмжлөл, мөнгөн титэм, эрдэнийн шигтгээт “Мөнгөн Од”, 20 сая төгрөгийн мөнгөн шагнал.

МӨНГӨН ЭРДЭНЭ: Дэд байр буюу “Мөнгөн Эрдэнэ”-ийн өргөмжлөл, шигтгээт мөнгөн титэм, эрдэнийн шигтгээт “Мөнгөн од” , 10 сая төгрөгийн мөнгөн шагнал.
ЗЭС, ШҮР, СУВД, ОЮУ, НОМИН, ТАНА, ГАН эрдэнийн өргөмжлөлт сайхан бүсгүйчүүд тус бүр 5 сая төгрөгийн мөнгөн шагнал хүртэнэ.

МОНГОЛЫН САЙХАН БҮСГҮЙ ТОДРОХ ӨДӨР

Финалын шалгаруулалт 2018 оны зургадугаар сарын 30-ны 18:00 цагт “Зайсан хилл” цогцолборт болно. Наадмын тасалбарын орлого “Нарны хүүхдүүд” асрамжийн төвийн “Монгол өв, соёл, гэр” төсөлд зориулагдана.

МОНГОЛЫН ЭМЭГТЭЙЧҮҮДИЙН “ХАТАН ЭРДЭНЭ” ХОЛБОО

Энэхүү наадмын Ерөнхий зохион байгуулагч Монголын эмэгтэйчүүдийн “Хатан эрдэнэ” холбоо 1992 онд байгуулагдсан. Эх хүн, эмэгтэй хүний гоо үзэсгэлэн, оюун билгийг дээдэлж ирсэн монгол уламжлалыг сэргээн хөгжүүлж, түгээн дэлгэрүүлэх эрхэм зорилготой. Холбооны ерөнхийлөгч Д.Энхсайхан. Монголын сайхан бүсгүй шалгаруулах уралдааныг анх санаачилсан, гол зохион байгуулагч. Өнгөрсөн хугацаанд “Miss World University” уралдааны анхны шагналын цом, Олон улсын шүүгчийн анхны цом, Олон Улсын Соёлын холбооны Энх тайваны шагналыг тус тус хүртсэн.

Холбооны үйл ажиллагааны нэг чухал хэсэг нь хүүхэд, эхчүүд, эмэгтэйчүүдийн эрхийг хамгаалах тэдний эрүүл аюулгүй амьдрах орчин нөхцөлийг сайжруулах, орон гэргүй, сургууль завсардсан хүүхэд, асрамжийн газар, Эх нялхсын эрүүл мэндийн төвд тусламж дэмжлэг үзүүлэн, хамтран ажилласаар ирсэн. Цаашид ч энэ санаачилгууд үргэлжилсээр байх болно. Улирал бүр хүмүүнлэгийн үйлс өрнүүлдэг уламжлалтай. “Монголын сайхан бүсгүй-2018” тэргүүн наадмын хүрээнд мөн хэд хэдэн хүмүүнлэгийн болон нийгэмд тустай ажлуудыг хийхээр төлөвлөсөн ба тэдгээр нь бидний хойч ирээдүй болсон хүүхдүүдэд Монголын уламжлалт өв соёлыг уламжлуулан өвлүүлэх, хүүхэд, эмэгтэйчүүдийн эрүүл мэндэд чиглэсэн санаачилга, төслүүд байх болно.

Монгол банкнаас мэдээлснээр, өнгөрсөн сард 700 орчим зээлдэгч ипотекийн зээлд хамрагджээ. Засгийн газраас тавдугаар сард ипотекийн санхүүжилтийн эх үүсвэрт 436 зээлд 30.15 тэрбум төгрөг олгоод байна. Тэгвэл Монголбанкнаас 248 зээл 16.3 тэрбум төгрөгийн эх үүсвэр олгосон аж.

Монгол-Солонгосын эмч нарын хамтарсан ходоодны хорт хавдрын тухай олон улсын хоёр дахь удаагийн хурлыг энэ сарын 23-ны өдөр Чингис зочид буудалд зохион байгуулахаар болжээ. Хуралд БНСУ-ын Ходоодны хорт хавдрын холбооны тэргүүлэх профессор, Сөүлийн их сургуулийн мэс заслын тэнхимийн профессорууд оролцох юм байна.

Монголчууд ходоодны хорт хавдрын өвчлөлөөр дэлхийд хоёрдугаарт, нас баралтын тоогоор нэгдүгээрт орж байна. 2017 оны байдлаар энэ төрлийн өвчлөлийн 890 шинэ тохиолдол бүртгэгджээ. Өнгөрсөн хугацаанд тус 890 хүний 600 гаруй нь энэ өвчний улмаас нас барсан байна. Энэ тоо жил тусам өсөх хандлагатай байгааг мэргэжилтнүүд онцолж байна.

Тиймээс Хавдар судлалын үндэсний төвөөс ходоодны хорт хавдрын эрт илрүүлгийн ажлыг зохион байгуулж уг ажилд чиглэсэн тодорхой хөтөлбөрийг хэрэгжүүлэхээр болжээ. Тодруулбал, “Элэг бүтэн Монгол” хөтөлбөрийг ходоодын хавдартай тэмцэх ажлаар үргэлжүүлэхээр ажиллаж байгаа юм байна. “Элэг бүтэн Монгол” хөтөлбөрийн хүрээнд элэгний хавдрыг эрт илрүүлэх, вирусын эмийг нь өгөх, элэг шилжүүлэн суулгах хагалгааг эх орондоо хийдэг болсон. Тэгвэл “Элэг бүтэн Монгол хөтөлбөр” ходоодны хорт хавдартай тэмцэх ажлаар үргэлжилж байгаа нь энэ аж.

Уг ажлын хүрээнд Монгол-Солонгосын эмч нарын хамтарсан ходоодны хорт хавдрын тухай олон улсын хоёр дахь удаагийн хурлыг энэ сарын 23-ны өдөр Чингис зочид буудалд зохион байгуулахаар болжээ. Энэ хуралд БНСУ-ын Ходоодны хорт хавдрын холбооны тэргүүлэх профессор, Сөүлийн их сургуулийн мэс заслын тэнхимийн профессорууд оролцож, тус улсын ходоодны хорт хавдартай тэмцсэн туршлагаас хуваалцаж, уг өвчний орчин үеийн менежментийн чиг хандлага, мэс заслын орчин үеийн арга техникүүдийг танилцуулцах юм байна. Мөн Монгол улсын тэргүүлэх эмч мэргэжилтнүүд болон судлаачид эмч нар оролцож өөрсдийн мэдлэг туршлагаас хуваалцах аж.

Түүнчлэн ходоодны хорт хавдрын эрт илрүүлгийн ач холбогдол, урьдчилан сэргийлэлт, урьдал өвчний оношилгоо эмчилгээний арга, хожуу шатны хорт хавдар өвчтэй өвчтөнд энтерал ба парентерал тэжээлийг хэрэглэх нь зэрэг чухал сэдвүүдийг хөндөх бөгөөд нэг ба хоёрдугаар шатлалын эмч нарт зориулсан тусгай сургалтыг зохион байгуулах юм байна.

Нийслэлийн авто замын хөдөлгөөний нэвтрүүлэх чадварыг нэмэгдүүлэх, түгжрэлийг бууруулах зорилгоор нийслэлийн гол гудамж, замын уулзварын өргөтгөл шинэчлэлтийн ажил ид өрнөж байна. Үүний зэрэгцээ Улаанбаатар хотын гадна тойруугийн авто замын сүлжээг хэсэгчлэн гүйцэтгэж байгаа юм. Энэхүү ажлын 4-р хэсэг болох Дарь-Эхийн уулзвараас Ганц худаг, Цагаан даваа чиглэлд 3 км авто зам барих ажил амжилттай хэрэгжиж, өнөөдөр нээлтээ хийлээ.

Нээлтэд Нийслэлийн Засаг дарга бөгөөд Улаанбаатар хотын Захирагч С.Батболд, нийслэлийн Засаг даргын орлогч П.Баярхүү, УИХ-ын гишүүн Б.Саранчимэг, НАЗХГ-ын дарга Ж.Тогтохбаяр, УБЗЗАГ-ын дарга Ж.Чинзориг болон холбогдох албаны хүмүүс, тухайн хэсгийн оршин суугчид оролцов.

Нийслэлийн Засаг дарга бөгөөд Улаанбаатар хотын Захирагч С.Батболд “Нийслэлийн бүтээн байгуулалтын ажлыг өнгөрсөн хоёрдугаар сараас эхлүүлсэн. Ингэснээр бид хамгийн эхний замын бүтээн байгуулалтын ажлыг тавдугаар сарын эхээр хүлээн авч байсан. Урд нь зам, барилгын ажлыг намар 9, 10 дугаар саруудад цас орж байгаатай зэрэгцэн дуусгаж, хүлээлгэн авдаг байсан. Бид урин дулаан цагийг ашиглаж, бүтээн байгуулалтын ажлыг хурдан явуулах зорилго тавин, хоёрдугаар сард тэндэрээ зарлаад, дөрөвдүгээр сард дүгнэж, наадмын өмнө гол зам, барилгуудаа хүлээж авна гэсэн зарчим барьж ажиллаж байгаа.

Нийслэлийн Засаг даргын болон Засгийн газрын мөрийн хөтөлбөрт гадна тойруугийн зам барина гэж тусгагдсан байгаа. Гадна тойруугийн хамгийн ачаалалтай зам нь Дарь-Эхийн уулзвараас Ганц худаг, Цагаан даваа чиглэл. Бид хотын баруун хойд талаас зүүн хойд тал руу явахын тулд төвийн замыг сонгон явдаг байсан бол гадна тойруугийн зам ашиглалтад орсноор ачааллыг өөр дээрээ авах болно. Энэ зам бүтэн ашиглалтад орох нь Сэлбэ гол дээгүүр барьж буй гүүрээс хамаарна. Гүүрийн ажил үндсэндээ дууссан. Хайлааст, Дарь-Эхийн уулзварыг холбох хоёр талын газар чөлөөлөлтийн ажил удаашралтай байгаа ч наадмын өмнө чөлөөлж дуусгана.

Түүнчлэн Улаанбаатар хотыг дайран өнгөрч байгаа тээврийн хэрэгслийг шулуун гаргадаг хурдны замууд шаардлагатай байгаа. Үүнийг хийхээр төлөвлөж байна. Мөн хотын дундуур өнгөрч байгаа төмөр замыг хэрхэн шийдэх вэ гэдэг асуудал байна. Ажлын хэсэг төмөр замын доогуур гүүрэн гарц хийхээр төлөвлөж байна. Зөвхөн жижиг авто машин бус автобус, том оврын авто машин явах боломжтой иж бүрэн инженерийн байгууламж барих бодолтой байгаа. Бидний судалгаагаар 13 хэсэгт ийм гүүрэн гарц хийж болохоор байгаа юм. Эхний ээлжинд 3-4 гүүрэн гарцын ажлыг энэ намраас эхлүүлье гэж төлөвлөж байна” хэмээлээ.

Өнөөдрийн нээж байгаа зам НАЗХГ-ын захиалгаар УБЗЗАГ хийж гүйцэтгэжээ. Нийтдээ 3 км урт, зорчих хэсгийн урт нь 7 метр, хоёр талаараа явган хүний замтай юм гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.

08.00 цагт ИНЕГ-т автомат, /агаарын/ ажиглалтын “ADS-B” системийг нэвтрүүлэх нээлтийн ёслол болно. Ази, Номхон далайн бүсийн орнуудаас Монгол Улс уг системийг нэвтрүүлсэн анхны орон болох юм. Утас:91912343

08.00 цагт ХНХЯ-ны гадна талбайд Монголын эрүүл мэндийн ажилтны үйлдвэрчний эвлэлийн холбооноос С.Чинзориг сайдыг огцрохыг шаардаж, эсэргүүцлийн суулт хийнэ.

09.00 цагт “Баянгол” ресторанд “Сувилахуйн боловсролын талаар баримтлах бодлого, агуулга, арга зүйн шинэчлэл” сувилахуйн багш нарын анхдугаар чуулган болно.

09.30 цагт “Корпорэйт Конвеншн Центр”-т Монгол Улсад хөдөө аж ахуйн эдийн засгийн дээд боловсролтой мэргэжилтэн бэлтгэж эхэлсний 60 жилийн ойн хурал болно.

11.00 цагт БОАЖЯ-нд Тусгай хамгаалалттай газар нутгийн удирдлагын газар болон Богдхан уулын хамгаалалтын захиргаанаас цаг үеийн асуудлаар мэдээлэл хийнэ. Утас:99153766

11.00 цагт “Blue Mon” төвд “Монгол төрийн сахиусны өргөө” түүхэн гэрэл зургийн үзэсгэлэнгийн нээлт болно.

13.30 цагт “Хөвсгөл” зочид буудалд Сэргээн засалт, сургалт, үйлдвэрлэлийн төв болон БНСУ-ын Дэжон хотын Мэргэжлийн ур чадварыг хөгжүүлэх институтийн хамтын ажиллагааны 10 жилийн ойн баярын хурал болно.

14.00 цагт “Туушин” зочид буудалд Монгол, ОХУ, БНХАУ, БНСУ-ын Сангийн сайд нарын “Их түмэн хөтөлбөр” зөвлөлдөх уулзалт болно.14.00 цагт ХНХЯ-нд хөгжлийн бэрхшээлтэй иргэдийг дэмжих зорилгоор “Түгээмэл хөгжил” төвөөс Улаанбаатар-Төв-Дундговь-Өмнөговь аймаг чиглэлийн “TRY MONGOLIA 2018” нөлөөллийн аялалын хаалтын ёслол болно.

Төрийн ордонд

УИХ-ын чуулган хуралдана.

09.00 цагт УУХҮ-ийн сайд Д.Сумъяабазар УИХ-ын даргад “Эрдэнэс-Тавантолгой” төслийг өргөн барина. Утас: 99089666

13.00 цагт Сайн дурын үйл ажиллагааг дэмжих тухай хуулийн төслийн хэлэлцүүлэг болно.

“Үндэсний мэдээллийн төв”-д

11.30 цагт Монголын шатахуун хэрэглэгчдийн холбооноос хуурамч шатахуун худалдагчид иргэдийг хохироож байгаа талаар мэдээлэл хийнэ.

12.00 цагт Оюутолгойг шалгах ажлын хэсгийн зарим гишүүд цаг үеийн асуудлаар мэдээлэл хийнэ.