Month: May 2018

Жижиг, дунд үйлдвэр, үйлчилгээг дэмжих тухай хуулийн төслийг УИХ-аар хэлэлцэх эсэх талаар яригдаж байна. Үүнтэй зэрэгцэн Мишээл экспо төвд “Жижиг дунд үйлдвэрийн бүтээгдэхүүн үйлчилгээ технологи -2018” олон улсын үзэсгэлэн нээлтээ хийлээ. Ирэх Ням гарагийг хүртэл үргэлжлэх юм. Үзэсгэлэнд 100 орчим жижиг дунд үйлдвэрлэл эрхлэгчид хүрэлцэн иржээ. Эдэн дунд хэд хэдэн гадаад үйлдвэрлэгчдийн бүүт харагдаж байв. Монголын үндэсний худалдаа аж үйлдвэрийн танхимын удирдах зөвлөлийн дарга Б.Лхагважав “БНСУ, Пакистан улсын нийт 14 компани, 20 бүүт бий” гэв.

Үзэсгэлэнгийн бүүтүүдээр гар урлал, хүнсний үйлдвэрийн бүтээгдэхүүн, гоо сайхан, өргөн хэрэглээний бараа гэх мэт зүйлс байв. Хүнсний үйлдвэрүүдийн бүтээгдэхүүнийг амталж явахад салбарын хүмүүсийн хэлсэн “Дотоодын хүнсний салбар хурдацтай шинэ түвшинд гарж байгаа” гэсэн үг санаанд орлоо.

Энэ үеэр МҮХАҮТ-ын удирдах зөвлөлийн дарга Б.Лхагважав “Жижиг дунд үйлдвэрлэлийн санхүүжилт, хөрөнгө оруулалт, менежмент, шинэ технологийн асуудлыг харъя танхим, яамдууд хангаж өгөх ёстой. Жижиг дунд үйлдвэрлэгчид нийт аж ахуй нэгжийн 90-ээд хувийг эзэлж байгаач дундаж түвшинд очиход хэцүү байна. Ойр ойрхон болж буй хямралууд тэднийг сөхрөөж байна. Уйгагүй ард нь гарч ирж байгаа. Жижиг дунд үйлдвэрлэлийн 20 хувийн зээл гэдэг ойлголт байж болохгүй. Арилжааны банкууд бусад санхүүгийн байгууллагууд хамтран өөр санхүүжилтийг бий болгохгүй бол жижиг дунд үйлдвэрлэгчид туйлдаж ядарч байна” гэв.

Мангар хүмүүсийг энд байлгахгүй гээд хөөдөг. Гэсэн ч бид энд зогсож байна

Эсгийгээр гар урлал хийдэг байсан хөгжлийн бэрхшээлтэй иргэд ноосны үнэ тэнгэрт хадсанаар санхүүгийн эргэлт нь муудсан байна. Гэвч бууж өгөлгүй группын мөнгөө цуглуулж дахин бизнес хийх болсон аж. Тэд өөрсдийн гараар хувцас оёж үндэсний бүтээгдэхүүн хийж байна. Улирал бүрт тааруулж бүтээгдэхүүнүүдээ хийдэг гэв. “Төгсжаргал хөгжлийн бэрхшээлтэй иргэдийн төв”-ийн тэргүүн Э.Долгорсүрэн “Бид зургуулаа. Дулаан цагт өмсөх биед эвтэйхэн хямд үнэтэй хувцаснууд хийж байна. Санхүүгийн дэмжлэг авахаар төсөл бичиж өгөхөөр биднийг хүлээж авдаггүй. Таньдаг мэддэг хүмүүстээ л өгдөг юм шиг байна лээ. Тийм болохоор бид хэд группын мөнгөө бага багаар цуглуулаад үйлдвэрлэлээ эрхэлдэг. Гайгүй ч зарагдаж байна. Эргэлтийн хөрөнгөтэй болохоор л зорьж байна.

Ажлын байр маш хэрэгтэй байна. Байрнуудын подвол түрээслэхээр СӨХ-ийн даргад загнуулна. Мангар хүмүүсийг энд байлгахгүй гээд л. Түрээсийн үнэ нь ч өндөр, элдвээр ч доромжилно. Өвлийн хүйтэнд хүртэл хөөдөг. Энэ асуудал одоог хүртэл шийдэгдэхгүй байна. Гэсэн ч бид үйлдвэрлэлээ зогсоогоогүй. Энэхүү үзэсгэлэнд орж байна” гэв.

Юм мэддэг хүмүүс үнэ цэнийг нь ойлгодог

1989 онд арьсан жижиг эдлэл, цүнх, бүс, түлхүүрийн оосор хийж гараагаа эхэлж байсан Т.Энхжаргалын бүтээгдэхүүнүүдтэй танилцлаа. Тэрээр 30 гаран жил арьсан эдлэл хийж байгаа аж. Яг л гадаадад үйлдвэрлэсэн юм шиг өөгүй хийцтэй хийсэн цүнхнүүд нь аргагүй миний харааг булааж хэсэг саатуулсан юм. Тэрээр “Юм мэддэг хүмүүс миний цүнхнүүдийг хараад үнэ цэнийг нь ойлгодог юм. Цэвэр үхрийн ширээр чанарын өндөр түвшинд хийж сурах гэж өдий хүрлээ. Хамгийн гол нь хүмүүсийн хэрэгцээнд тохируулж хийх нь чухал. Нурууны хамгаалалттай бүс, Тэлээнд зүүж ашигладаг түлхүүрний оосор гэх мэт.

Одоогоор “Агсарган” гэх брэнд үүсгээд ажиллаж байна. Өөрсдийн гэсэн үнэнч үйлчлүүлэгчидтэй болсон. Гэхдээ борлуулалтын асуудал хүнд хэвээр л байна. Олон жил сурсан юм болохоор арьсан эдлэлээ хийчихэж байгаа юм. Хүмүүсийн захиалгаар ямар ч хийцээр асуудалгүй хийж байна” гэлээ.

Дэлхийн брэндүүдээс чанар нь ялгаагүй шүү дээ

Монголын эрт үеийн хатдын зурагтай түрүүвч, цүнх гэх мэт эдлэл хэрэглэл нүдэнд туслаа. Тэд бол 13 жилийн өмнө чанарыг эрхэмлэн үйлдвэрлэлээ эхэлсэн “Энхжин сувинер” ХХК юм. Үхрийн арьсаар бүтээгдэхүүн үйлдвэрлэгчид аж. Тэд арьсан дээр зураг хэвлэх технологийг 2008 онд Монголд анх нэвтрүүлсэн байна. 30 нэр төрлийн бүтээгдэхүүнтэй бөгөөд бүгд collect-оор гардаг аж. Хамгийн анх “Монголын нэг өдөр” collect-оо гаргаж байсан байна. Энэ талаар “Энхжин сувинер” ХХК-гийн борлуулагч А.Амарзаяа “Монголчуудын эртний өв уламжлал, соёлыг бараанууддаа зургаар шингээж өгсөн. Үүгээрээ гадаадын жуулчид, хөрөнгө оруулагчдад сурталчлан таниулах зорилготой. Мэргэжлийн зураачид ажилладаг.

Манай борлуулалт маш сайн. Үнээ барьж чаддаг. Худалдан авагчид үргэлж буцаж ирдэг. Америк Улсын Чикаго хотод дэлгүүртэй. Гадаад бүтээгдэхүүнээс үнээрээ ялгарна. Гадаадын брэнд бүтээгдэхүүнүүд маш үнэтэй байдаг. Чанар нь ялгаагүй шүү дээ. Манай компани гадаад хэрэглэгчид ихтэй. Хүндрэлтэй тал нь тоног төхөөрөмж дутмаг байдаг. Гадаад орнуудад арьсан дээр хэвлэх машин улам л хөгжөөд томроод байдаг. Үүнийг оруулж ирж чаддаггүй” гэв.

Б.АМАРТҮВШИН

Өнөө маргаашдаа ихэнх нутгаар бороо орохгүй, өдөртөө дулаан байна. Харин тавдугаар сарын 19-нөөс зарим нутгаар бороо, цас орно гэж ЦУОШГ-аас мэдээллээ.

Тавдугаар сарын 19-23-ныг хүртэлх цаг агаарын урьдчилсан төлөв:

19-нд нутгийн зарим газраар бага зэргийн бороо, 20-нд баруун аймгуудын ихэнх нутаг, төвийн аймгуудын нутгийн хойд хэсгээр, 21-нд ихэнх нутгаар, 22-нд зүүн аймгуудын нутгийн зүүн хэсгээр бороо, нойтон цас орно. Салхи 19-нд Алтайн уулсаар, 20-нд баруун болон төвийн нутгаар, 21-нд ихэнх нутгаар секундэд 18-20 метр хүртэл ширүүсч шороон болон цасан шуурга шуурна.

Дархадын хотгор, Завхан голын эх, Хүрэн бэлчир, Алтай, Хангай, Хөвсгөл, Хэнтийн уулархаг нутаг, Идэр, Тэс голын хөндийгөөр шөнөдөө 3-8 градус, өдөртөө 17-22 градус, говийн бүс нутгаар шөнөдөө 13-18 градус, өдөртөө 29-34 градус, бусад нутгаар шөнөдөө 8-13 градус, өдөртөө 23-28 градус дулаан байна.

20-нд баруун аймгуудын нутгаар, цаашдаа ихэнх нутгаар эрс сэрүүснэ. 20-21-нд шилжих шөнө газар тариалангийн бүс нутгаар хөрсөн дээр цочир хүйтэрнэ.

Азийн Хөгжлийн банк нь 1966 онд байгуулагдсан. Дэлхийн 67 оронд үйл ажиллагаа идэвхтэй явуулдаг 3000 давсан ажилчин, албан хаагчтай. НҮБ-ын Ази, Номхон далайн бүс нутгийн Эдийн засаг, нийгмийн комиссын гишүүн байгууллага юм. Гол зорилго нь Ази, Номхон далайн орнуудын эдийн засаг нийгмийн хөгжлийг дэмжих, хөгжиж буй буурай орнуудад хөнгөлөлттэй зээл тусламж үзүүлэх, мэргэжлийн боловсон хүчин болон техник төхөөрөмжийн дэмжлэг үзүүлэх, тухайн оронд тулгамдаж байгаа асуудал дээр тусламж дэмжлэг үзүүлэх, жишээ нь цэвэр усны нөөц, байгаль орчин, дэд бүтэц, агаарын бохирдол, ажилгүйдэл гэх мэт. Үүнээс гадна боловсрол, эрүүл мэнд, хөгжиж байгаа оронд жендерийн тэгш бус орлогын асуудал ч гардаг гэнэ. Энэ бүх асуудалд тухайн орон нутгийн удирдлага, засгийн газруудтай бодлогын түвшинд харилцан ойлголцож хамтран ажиллаж чаддаг байна. Манай улсын хувьд Азийн Хөгжлийн Банкны гишүүнээр 1991онд элссэн. Тэр цагаас хойш Азийн Хөгжлийн Банкнаас Монгол Улсад нийт 1.55 тэрбум ам.долларын засгийн газрын зээл, 96 сая ам.долларын засгийн газрын бус зээл, 229 сая ам.долларын буцалтгүй тусламж, 138 сая ам.долларын техникийн туслалцааны төслийг батлан хэрэгжүүлсэн юм байна. Энэ байгууллага нь арилжааны банкны үйл ажиллагаа явуулдаггүй. Зөвхөн улс орнуудын Засгийн газарт зээл олгодог юм.

2017 онд нүүрсний экспорт, уул уурхайн хөрөнгө оруулалт сайжирснаар Монголын эдийн засгийн өсөлт хүчтэй явагдсан. Энэ өсөлт 2018, 2019 онуудад үргэлжилнэ хэмээн Азийн Хөгжлийн Банкны Монгол дахь суурин төлөөлөгч Ёланда Фернандез Ломмен хэлээд “Уул уурхайн салбар дахь хөрөнгө оруулалтыг үргэлжлүүлэх нь өсөлтийн эрчийг хэвээр хадгалах үндэс болно. Эдийн засгийн гүйцэтгэл Олон улсын валютын сангийн хөтөлбөрт төсөөлснөөс илүү сайн байгаа нь хөрөнгө оруулагчдын итгэлийг сэргээх, макро эдийн засгийн тогтвортой байдлыг сайжруулахад дэмтэй байна. Уг хөтөлбөрийг Засгийн газрын зүгээс үргэлжлүүлэн дэмжих нь ирээдүйд макро эдийн засгийн нөөц, бодлогын орон зай бүрдүүлэхэд төдийгүй Монголын мөчлөг дагасан савлагаа, эмзэг байдлыг бууруулахад чухал үүрэг гүйцэтгэнэ” гэж хэлсэн юм.

Энэ жил Азийн Хөгжлийн Банкнаас 2018 оны төлөв тайланд 2017 онд 5.1 хувьтай байсан Монгол Улсын дотоодын нийт бүтээгдэхүүн (ДНБ)-ий өсөлтийн хурд 2018 онд саарч 3.8 хувь болох ч, 2019 онд эргээд бага зэрэг нэмэгдэж 4.3 хувь болно гэсэн таамаглал гаргасан юм байна. ДНБ-ий өсөлт 2016 онд 1.2 хувьтай байсан бол, уул уурхайн салбарын хөрөнгө оруулалт, нэн ялангуяа Оюу толгойн далд уурхайн хөгжүүлэлт нь эдийн засгийн өсөлтийг дэмжих гол хөдөлгүүр хэвээр байх болно. Гэвч тээвэрлэлтийн саад бэрхшээлээс улбаалан нүүрсний экспортын хэмжээ 2017 оны гүйцэтгэлд хүрээгүй, харин 2019 онд асуудал тодорхой хэмжээгээр шийдэгдэнэ гэж үзэж байгаа юм байна.

Онцгой албан татвар нэмэгдэж, төгрөгийн ханш 2016 онд 24.7 хувиар суларсан нь импортын үнэд нөлөөлсөн, мөн гантай байснаас хөдөө аж ахуйн бүтээгдэхүүний үнэ өссөн зэргээс шалтгаалж 2017 онд инфляцийн түвшин 4.3 хувьтай гарсан юм байна. Харин энэ түвшин 2018 онд нэмэгдэж 8 хувь, 2019 онд 7 хувь болно гэж Азийн Хөгжлийн Банкны нөхдүүд таамаглажээ. Дотоодын эрэлт нэмэгдэж, газрын тос, хүнсний үнэ олон улсын зах зээл дээр өсөхийн зэрэгцээ 2017 онд хэрэгжүүлсэн мөнгөний зөөлөн бодлогын нөлөөгөөр 2018 онд инфляци бага зэрэг өсөх аж. Харин газрын тосны үнэ буурч, дотоодын эрэлт саарахын хэрээр эдгээрийн үр нөлөө 2019 онд саармагжих төлөвтэй байна гэнэ. Монгол Улсын төсвийн алдагдал 2017 онд ДНБ-ий 3.9 хувьтай тэнцэж байсан бол 2018 онд ДНБ-ий 6.4 хувь, 2019 онд 5.1 хувь болно гэж тооцоолжээ. Энэ нь нийгмийн даатгал, нийгмийн хамгаалал, тоног төхөөрөмжийн зардал нэмэгдэхийн хажуугаар жижиг, дунд үйлдвэрүүдийн татварын ачаалал, тайлангийн шаардлагыг бууруулах шийдвэр хэрэгжиж эхэлснээр төсвийн орлогын бүрдүүлэлт хумигдах магадлалтай байгаагаар тайлбарлагдаж байгаа юм байна. Гадаадын шууд хөрөнгө оруулалт эрс сэргэсэн, олон улсын хөгжлийн түншүүд санхүүгийн дэмжлэг үзүүлсэн, худалдааны нөхцөл сайжирсан зэргээс гадаад өрийн томоохон хэсгийг дахин санхүүжүүлэх боломж бүрдсэн. Нийт нөөц хоёр дахин нэмэгдэж 5.5 сарын импортыг санхүүжүүлэх хэмжээнд хүрсэн. Эдгээрээс шалтгаалан төгрөгийн ханш ам.долларын эсрэг 2.5 хувиар чангарсан юм. Урсгал дансны алдагдал 2018 онд буурч 6.3 хувь, харин 2019 онд 7 хувь болно гэж тооцоолсон юм байна.

Азийн Хөгжлийн Банк болон Монгол Улсын Засгийн газар хамтран эдийн засгийн хүндрэлтэй үед боловсролын чанар ба хүртээмжийг тогтвортой байлгах, хөгжлийн бэрхшээлтэй иргэдийн нийгмийн оролцоог нэмэгдүүлэх, Улаанбаатар хотын агаарын чанарыг сайжруулах замаар иргэдийн амьдралын чанарыг дээшлүүлэх зорилго бүхий нийт 207 сая ам.долларын санхүүжилттэй гурван зээл, нэг буцалтгүй тусламжийн гэрээнд гарын үсэг зуржээ. Мөн Ногоон уур амьсгалын сангаас Монгол Улсад олгох 50 сая ам.долларын буцалтгүй тусламж, 95 сая ам.долларын хөнгөлөлттэй зээлийг Улаанбаатар хотын гэр хороололд 100 га талбай бүхий эко хороолол барих болон төлбөрийн чадварт нийцсэн 10000 айлын ногоон орон сууц барьж байгуулах Азийн Хөгжлийн Банкны төслийг дэмжихэд хэрэглэнэ гэсэн байна. Эко хороолол нь нүүрстөрөгч ялгаруулалт бага, уур амьсгалын өөрчлөлтөд тэсвэртэй, амьдрахад таатай байхаар төлөвлөгдөж байгаа бол төлбөрийн чадварт нийцсэн ногоон орон сууц нь эрчим хүчний хэмнэлттэй, сэргээгдэх эрчим хүч хэрэглэдэг юм байна.

Өнгөрсөн жил гэхэд Азийн Хөгжлийн Банк Монголын Засгийн газрын хооронд 2020 он хүртэл тогтвортой эдийн засаг, хүртээмжтэй эдийн засгийн өсөлт буюу Монголын хүн амын цөөн хэдэн хувь нь уул уурхайгаас хагартлаа баяжих бус, нийгмийн бүх салбар ижил түвшинд эдийн засгийн өсөлтийг дэмжих, эдийн засгийн үр өгөөжийг Монгол Улсын иргэн бүрт тэгш хүртээнэ гэсэн хөтөлбөр хэрэгжүүлэхээр гарын үсэг зурсан юм. Манайх шиг уул уурхайгаас хамааралтай эдийн засагтай оронд бусад салбараа дэмжиж, эдийн засгийг хоёр тулгууртай болгоход Хөдөө аж ахуйн салбар тун чухал гэдгийг Азийн Хөгжлийн Банкны эдийн засагчид хэлээд байгаа. Манай урд хөрш бол дэлхийн хамгийн олон хүн амтай, хамгийн хүчирхэг эдийн засагтай орон. Хөдөө аж ахуйн салбараа стандартын дагуу хөгжүүлээд мах, махан бүтээгдэхүүн, сүү, тараг гэх мэт бүтээгдэхүүнүүдээ экспортолоход валютын урсгал нэмэгдэнэ. Мөн Хөдөө аж ахуйн салбараа сайн хөгжүүлэхэд хэд хэдэн асуудал аяндаа шийдэгдэнэ гэж харжээ. Нэгдүгээрт, ажлын байр олноор бий болно, тэрийгээ дагаад ажилгүйдэл багасна. Хоёрдугаарт, хот руу чиглэсэн хөдөлгөөн буурна, тэрийгээ дагаад Улаанбаатарын утаа багасах болно, мөн Улаанбаатарын иргэдийн орлого хөдөө амьдарч байгаа иргэдийн орлого ижил түвшинд хүрнэ. Мэдээж дэд бүтцийг нь шийдэх хэрэгтэй, дагуул хотууд бий болно, тэгээд энэ салбараа бодлоготойгоор дэмжээд өгөхөд асуудалгүй гэнэ. Тэр ч байтугай жендерийн асуудал дээр хүртэл анхаарч ажилладаг юм байна.

Азийн Хөгжлийн Банкны Монгол дахь суурин төлөөлөгч хатагтай Ёланда Фернандез Ломмэн хэлэхдээ “Монголын Засгийн газар бол манай хэрэглэгч, Азийн Хөгжлийн Банк бол Монголын хамгийн том, олон талт хөгжлийн түнш байгууллага юм. Бид урт замыг хамтдаа туулсан“ гэж хэлсэн байдаг. Тэгэхээр хэрэглэгчээ хөөдөггүй, хэрэглэгчээ “хаан“ гэж үздэг ийм олон улсын том банк санхүүгийн байгууллагатай бид хөгжлийн тухай ярихад найдвартай, итгэлтэй санагдаж буй нь гарцаагүй. Гол нь Монгол Улсын иргэн бүр хариуцлагатай, хичээл зүтгэлтэй байх хэрэгтэй.

М.БАЯНБУЛАГ

Баян-Өлгий, Увс аймгийн Онцгой байдлын газрын алба хаагчид харилцан туршлага солилцох, байгууллагуудын хамтын ажиллагааг сайжруулах зорилгоор нөхөрсөг уулзалтыг Баян-Өлгий аймагт зохион байгууллаа.

Уулзалтаар Увс аймгийн Онцгой байдлын газрын алба хаагчид Баян-Өлгий аймгийн Онцгой байдлын газрын болон бие бүрэлдэхүүний өдөр тутмын үйл ажиллагаатай танилцаж, харилцан туршлага судалсан юм.

ОБЕГ-ын харьяа Аврах тусгай ангийн агаарын ажиллагааны салбараас шүхэрчин аврагчдын дадлага буултыг Сонгино хайрхан дүүрэгт байрлах Хүй долоо худагт зохион байгууллаа. Шүхрийн зааварлагч, шүхэрчин аврагч, десантчин аврагч, нисэх төхөөрөмжийн нисгэгч нарын ур чадварыг дээшлүүлэх, бэлтгэл, бэлэн байдлыг хангах зорилготой дадлага буултанд 20 орчим алба хаагч хамрагдсан юм.

Энэ удаагийн дадлага сургуулийг МИ-171 нисдэг тэргээр зохион байгуулж, аврагчид нийт 110 удаагийн шүхрийн буултыг хийлээ гэж Онцгой байдлын ерөнхий газраас мэдээллээ.

Тээврийн прокурорын газраас гэмт хэрэг зөрчлөөс урьдчилан сэргийлэх чиглэлээр Замын цагдаагийн алба, дүүргүүд дэх Замын цагдаагийн хэлтэстэй хамтран тусгай зориулалтын ачиж зөөвөрлөх автомашин, тээврийн хэрэгсэл түр саатуулах байрны үйл ажиллагааг удирдамжийн дагуу шалгасан байна.

Нийслэл хотод автозамын түгжрэлийг багасгах, замын хөдөлгөөний аюулгүй байдалд сөргөөр нөлөөлөх үйлдлийг таслан зогсоох, замын хөдөлгөөнд оролцогчдын хэвийн аюулгүй зорчих нөхцлийг бүрдүүлэх, замын хөдөлгөөний аюулгүй байдлыг хангах, иргэд холбогдох хууль, тогтоомжийн заалтыг чанд сахих зориллгоор тээврийн хэрэгсэл түр зогсохыг хориглосон газраас тээврийн хэрэгслийг зөөж, шилжүүлэн, түр саатуулж байна.

Дээрх үйл ажиллагааны талаар иргэдээс санал, шүүмжлэл багагүй гаргаж байгааг үндэслэн тухайн ажиллагаа хүний өмчлөх эрхийг зөрчиж байгаа эсэх, холбогдох хууль тогтоомжийн хүрээнд явагдаж байгаа эсэх, зөөж шилжүүлж байгаа тээврийн хэрэгслийн техникийн бүрэн бүтэн байдлыг холбогдох хууль тогтоомжуудыг удирдлага болгон шалгахдаа Нийслэлийн Засаг даргын Тамгын газар, Авто замын хөгжлийн газартай гэрээ байгуулсан, зөөж шилжүүлэх, түр саатуулах үйл ажиллагаа эрхэлдэг 15 аж ахуйн нэгжийн ачигч, чирэгч зориулалтын 49 тээврийн хэрэгслийг хамруулжээ.

Шалгалтаар дээрх аж ахуйн нэгжүүдийн тээврийн хэрэгсэл бүрд үзлэг хийн, техникийн бүрэн бүтэн байдал, гадна өнгө үзэмж, нэмэгдэл тоног төхөөрөмж, гэрэлтүүлэх хэрэгслийн хэвийн ажиллагаа, дагалдах хэрэгслийн иж бүрдэл, жолооч, техникийн ажилтнуудын бичиг баримт, тээврийн хэрэгслийг түр саатуулах байранд хөтлөгдөж байгаа бүртгэл судалгаа, зөөж шилжүүлсэн тээврийн хэрэгслийг тухай бүр нэгдсэн бүртгэлийн 1800-1200 утсанд мэдээлэл өгч байгаа эсэх зэргийг үзэхэд дараах нийтлэг зөрчлүүд илэрчээ. Тухайлбал:

Дээрх үйл ажиллагаа явуулж байгаа байгууллагуудын тээврийн хэрэгслүүдээс хамгаалалтын бүсгүй 9, утаатай 11, дугуйны хээ, боолт дутуу 3, эмийн сангийн иж бүрдэл дутуу 19, стандарт дуут дохиогүй 17, их гэрэл ажиллахгүй 5, оврын болон хажуугийн гэрэлгүй 5, хаалга гэмтэлтэй 4, өргүүрээс тос алдсан 6, урд болон хойд камер ажиллахгүй 4, замын болон шалгах механикийн тэмдэглэлгүй 2, лого нь стандарт бус 7, ажлын байрны галын дүгнэлтийн хугацаа дууссан 2, байгууллага даатгалд хамрагдаагүй 3, нөөц дугуй өргүүргүй 2, галын хоргүй 1, шалгах механикийн шалгасан замын хуудасгүй 5, тээврийн хэрэгслийн даатгалын хугацаа дууссан 2 зэрэг олон тооны зөрчил илэрсэн байна.

Түүнчлэн шалгалтын явцад аж ахуйн нэгжүүд зөөж шилжүүлсэн тээврийн хэрэгслийн бүртгэлийг хөтөлж, хяналт тавих зориуллалттай www.its-aja.com бүртгэлийн программ, 1800-1200 дугаарын утсанд мэдээлэл өгөхгүйгээр үйл ажиллагаа явуулсан зөрчил тогтоогдсон ба энэ нь иргэдийг чирэгдүүлсэн үйл ажиллагаа болж байна.

Дүүргүүдийн Замын цагдаагийн тасгуудаас өөрсдийн нутаг дэвсгэрт үйл ажиллагаа явуулж байгаа аж ахуйн нэгжүүдийн үйл ажиллагаанд хяналт тавьж, удирдлагаар ханган ажиллаж, ажилтан алба хаагчдад хууль тогтоомжийн талаар сургалтуудыг зохих хэмжээгээр зохион байгуулсан боловч гэрээ байгуулсан тал болон тус аж ахуйн нэгжийн удирдлагаас өдөр тутмын үйл ажиллагаанд хяналт тавих ажил хангалтгүй байна гэж дүгнэжээ.

Тээврийн хэрэгслийг зөөж шилжүүлэх, үйл ажиллагааг зөвхөн цагдаагийн алба хаагчийн шийдвэрээр явуулах ёстой байтал цагдаа ажилладаггүй газраас цагдаагийн алба хаагчийн шийдвэргүйгээр ачиж явах, тэдгээрийн гарын үсгийг нөхөж зуруулах, тээврийн хэрэгслийг үзэж шалгасан тэмдэглэлд гарын үсэг зурдаггүй, зарим тохиолдолд бичилт хийгдээгүй тэмдэглэл дээр алба хаагчид урьдчилан гарын үсгээ зурж өгөх зэргээр батлагдсан хууль, тогтоомжийг зөрчсөн зөрчил цөөнгүй илэрсэн ба эдгээр нь иргэд, байгууллага, олон нийтийг чирэгдүүлж, гомдол, санал шүүмжлэл гарахад хүргэж байна.

Мөн аж ахуйн нэгжүүдийн хувьд өөрийн талбай байхгүй бүгд түрээсийн талбайтай байх ба Нийслэлийн Иргэдийн Төлөөлөгчдийн хурлын 2015 оны 33/35 тоот тогтоолоор батлагдсан ,“Нийслэлд тээврийн хэрэгслийг зориулалтын автомашинаар зөөж, шилжүүлэх, түр саатуулах хашаа /байр/ ажиллуулах болон эдгээр үйл ажиллагааны төлбөрийн хувь хэмжээг тогтоох тухай” журамд 2000 м/кв-аас доошгүй байхаар заасан боловч хэрэгжээгүй, нэг талбайд аж ахуйн нэгж, газрууд хамтран үйл ажиллагаа явуулж байна.

Иймд шалгалтаар илэрсэн зөрчил, дутагдлыг арилгуулах, давтан гаргуулахгүй байх чиглэлээр удирдлага зохион байгуулалтын тодорхой арга хэмжээ авахуулахаар Нийслэлийн Авто замын хөгжлийн газар, “Авто хүч” ХХК, “Бат зэв” ХХК, “Сидней Констракшн” ХХКомпаниудад Прокурорын мэдэгдэл хүргүүлж, хуульд заасан хугацаанд хариу ирүүлэхийг даалгасан талаар Тээврийн прокурорын газраас мэдээллээ.