Гэгээн хайрыг магтан дуулагч “Цагаан Уул” шүлгийн наадам 19 дэх жилдээ зохион байгуулахтай холбогдуулж яруу найрагчдын бүтээлийг энэ сарын 15-наас ирэх сарын 10-ныг хүртэл Монголын Залуучуудын холбооны байранд бичгээр болон файлаар хүлээн авч эхэллээ.
Орон нутгаас оролцох найрагчид бүтээлээ тухайн аймаг дүүргийн Залуучуудын холбооны тодорхойлолтын хамт event.mzkh@gmail.com хаягаар шүлгээ илгээх боломжтой. “Цагаан уул” наадмыг Монголын залуучуудын холбоо 1991 оноос өдийг хүртэл тасралтгүй зохион байгуулжээ. Энэ жилийн наадмын хамтран зохион байгуулагчаар Монголын Зохиолчдын Эвлэл, МҮОНТ ажиллаж байна. Наадмын зорилго нь залуу уран бүтээлчдийг дэмжих, тэдний уран бүтээлийг үнэлж, олон нийтэд сурталчлах явдал юм.
“Цагаан Уул” шүлгийн наадамд тавигдах шаардлага нь ухамсар, санаа, бодол,мөрөөдөл, итгэл, сэрэл, хүсэл, ухаан, суу, мэдрэмж, заль гэх үгийг оролцуулан шүлгээ бичих юм байна.
Тус наадам уламжлал ёсоор 4 шаттай байх ба шат бүр тодорхой сэдвийн хүрээнд явагдана. Тухайлбал хоёрдугаар шат “Унаган хайр”, гуравдугаар шат “Эцэг эхийн хайр”, дөрөвдүгээр шат “Эх орноо хайрлах хайр” гэсэн сэдвийн хүрээнд болох аж
Наадмын анхны цомын эзнээр сэтгүүлч Ц.Оюундарь тодорч байсан бол яруу найрагч А.Эрдэнэ-Очир, Г.Мөнхцэцэг, Л.Өлзийтөгс, Г.Аюурзана, Д.Оюундэлгэр, Л.Ганзул, Ю.Болдхуяг, Л.Моломжамц нар дараа дараагийн тэргүүн байрын эздээр шалгарч байжээ.
Дашрамд дуулгахад нэгдүгээр шатнаас хоёрдугаар шатандаа шалгарсан яруу найрагчид Монгол Үндэсний дээлтэй оролцох юм байна.
Б.ҮРЖИГ
Монголчууд СҮГ гэдэг товчилсон үгийг хэдийнэ андахгүй болсон. Байнга л засаг огцорч, хөдөлгөөнтэй байдаг болохоор байсхийгээд СҮГ-үүд гараад л ирдэг. Тийм болохоор огцорсон Засгийн газрын гишүүдийг сайдын үүрэг гүйцэтгэгч буюу СҮГ-үүд гэж товчилсон үгээр хэлээд хэвшсэн. Сүүлийн хэдэн жил сонгуульд хугацаандаа буюу бүтэн дөрвөн жил тасралтгүй ажилласан Засгийн газар байсангүй. Монголд хамгийн удаан тогтвортой байсан Засгийн газар нь хоёр жил гаран болсон байдаг. Өмнөх парламентад Н.Алтанхуяггийн Засгийн газар 2012 оны наймдугаар сараас 2014 оны арваннэгдүгээр сарын 5-ны өдрийг хүртэл ажилласан. Дараа нь Ч.Сайханбилэгийн Засгийн газар 2016 оны УИХ-ын сонгууль хүртэл ажилласан юм. Энэ удаад Ж.Эрдэнэбатын Засгийн газар ч ялгаагүй жил гаруйхан хугацаанд ажиллаад уналаа. Түүний танхимыг энэ сарын 6-ны өдөр УИХ-ын ээлжит бус чуулганы хуралдаанаар огцруулсан. Дараагийн Засгийн газрыг 30 хоногийн дотор эмхлэн байгуулах хуулийн заалттай. Тиймээс одоо СҮГ-үүд ажиллаж байна. Тэд Засгийн газрын хоёр ч удаагийн хуралдаанаар хэд хэдэн шийдвэрүүдийг гаргаад авав. Тухайлбал, өнгөрсөн долоо хоногт есдүгээр сарын 13-ны хуралдаанаар Ноён уул, Тост, Тосон бумбын нуруу орчим дахь тусгай зөвшөөрлийг цуцлахаар шийдвэрлэлээ. Мөн цагдаагийн алба хаагчид тэтгэмж, тусламж олгох журмыг баталсан. НДШ төлөхөд баримтлах хөдөлмөрийн хөлсний дээд хэмжээг тогтоов. СҮГ-үүд өчигдөр засгийн хуралдаанаар ч хэд хэдэн асуудлуудыг шийдвэрлэнэ лээ. Сүрьеэгийн тасгийн ажилтнуудад 30 хувийн нэмэгдэл олгоно, цалинг ур чадвар, гүйцэтгэл, мэргэшлийн зэрэгтэй уялдуулахаар болов. Мөн хүүхдийн хөгжилд чиглэсэн хөтөлбөрийг баталж, эрчим хүч хэмнэх хөтөлбөр хэрэгжүүлнэ гэлээ. Түүнчлэн энэ онд төсөв зардал ихтэй хоёр томоохон наадмыг Монголд зохион байгуулахыг СҮГ-үүд дэмжжээ.
Антибиотикт тэсвэртэй нянгууд нэмэгдэх болсон өнөө үед дэлхий дахин шинэ антибиотикийн ноцтой гачигдалд ороод байна гэж Дэлхийн эрүүл мэндийн байгууллага /ДЭМБ/ анхааруулахын сацуу шинэ антибиотик гаргаж авах судалгаа шинжилгээ хийхэд анхаарлаа хандуулахыг эрдэмтэн судлаачид болон улс орнуудад уриалсныг Хятадын “Шиньхуа” агентлаг уламжилжээ.
Нийслэлийн Замын сангийн хөрөнгө оруулалтаар барьж буй Сонгинохайрхан дүүргийн нэгдүгээр хороо, Нарангийн голоос Орбит хүртэлх 1.3 км авто замын ажлын явц 55 хувийн гүйцэтгэлтэй байгааг Нийслэлийн авто замын хөгжлийн газраас мэдээлэв.
“Авьяаслаг монголчууд-2016” шоуны шилдэг оролцогчдын нэг латин бүжгийн “Moon dance” хамтлаг өчигдөр Буянт-Ухаа спорт цогцолборт болсон “Бүжгийн спортын Улсын аварга шалгаруулах тэмцээн-2017” дархан аварга болж, Дэлхийн аварга шалгаруулах тэмцээнд эх орноо төлөөлөн оролцох эрхээ авлаа.
Монгол-Японы Хүний Нөөцийн Хөгжлийн Төвөөс ирэх сарын 07-08-нд “Японд суралцах тухай танилцуулга болон Мэдээллийн яармаг -2017” арга хэмжээг зохион байгуулах болжээ.