Month: September 2017

Өнгөрсөн долдугаар сарын 1-нээс Зөрчлийн тухай хуулийг мөрдөж эхэлсэн. Гэвч гурван сарын хугацаа өнгөрсөн байхад хуулийн хэрэгжилт, хяналт төдийлөн мэдрэгдэхгүй байгаа юм. Тухайлбал, гудамж талбайгаар явж буй иргэд нус, шүлсээ хаях тохиолдол өдөр бүр, нүдний өмнө ил байхад тэдэнд хариуцлага тооцож байгаа зүйл ер харагдахгүй байгаа аж.

Уг нь хуулиндаа олон нийтийн эзэмшил талбайд нус, цэрээ хаясан, бие зассан бол 10000 төгрөгөөр торгоно гэж заасан байдаг. Гэвч хууль хэрэгжиж эхэлснээс хойш энэ төрлийн зөрчил гаргасан дөрвөн иргэнийг торгож, хариуцлага хүлээлгэсэн гэж Замын цагдаагийн алба мэдээллээ.

Хот хоорондын замд үйлдэгддэг гэмт хэрэг, зөрчлөөс урьдчилан сэргийлэх, иргэдийн аюулгүй зорчих нөхцөлийг бүрдүүлэх зорилгоор цагдаагийн байгууллагаас энэ сарын 11-ний өдрөөс эхлэн улсын чанартай автозамд байрлах 13, орон нутгийн 19 хяналтын цэг 24 цагийн байнгын ажиллагаатай болгож, үйл ажиллагааг нь эрчимжүүлж эхэлсэн.

Тухайлбал, Төв аймгийн Баянчандмань сумын постод үүрэг гүйцэтгэж байсан хэсгийн төлөөлөгч, цагдаагийн дэслэгч Г.Гантүшиг, замын цагдаагийн зохицуулагч, цагдаагийн дэслэгч Х.Мөнх-эрдэнэ, цагдаа зохицуулагч, цагдаагийн ахлагч Э.Болдбаатар, Б.Эрдэнэтунгалаг нар 18-20 насны залуус мансууруулах төрлийн өвс тээвэрлэж явсныг илрүүлсэн байна. Улаанбаатар хотод оршин суух хаягтай 19 настай Н, 20 настай Т, 18 настай Н нарын таван залуу “Тоёото спасио” маркийн автомашинд “Каннабис” гэх мансууруулах төрлийн өвс тээвэрлэж явсныг илрүүлж, Эрүүгийн цагдаагийн алба шалгаж эхэлжээ.

Санхүүгийн зохицуулах хорооны өчигдрийн хуралдаанаар хэд хэдэн байгууллагын тусгай зөвшөөрлийг цуцалсан байна. Тодруулбал, 2015 оны хоёрдугаар хагасаас хойш санхүүгийн тайлан ирүүлээгүй, үзлэг, шалгалтад санаатайгаар хамрагдаагүй, хуулийн дагуу шаардлага, сануулга өгч, үйл ажиллагааг нь гурван сар хүртэл хугацаагаар түдгэлзүүлсэн боловч зөрчил дутагдлаа арилгаагүй

“Бага хээр ҮЦК”

“Бумбат шигтгээ ҮЦК”

“Превалент ҮЦК” ХХК

“Сэлэнгэ түмэн ҮЦК”

“Финанс линк групп ҮЦК”

“Говийн ноён нуруу ҮЦК”,

Би Би Эс Эс ҮЦК,

Зюс капитал ҮЦК

Эм Даблью Ти Эс ҮЦК ХХК-уудын үнэт цаасны зах зээлд зохицуулалттай үйл ажиллагаа эрхлэх, “Капитал эстимэйт” ХХК-ийн даатгалын хохирол үнэлэгчийн үйл ажиллагаа эрхлэх тусгай зөвшөөрлийг хүчингүй болгожээ.

Мөн хорооноос хөрөнгө оруулалтын менежментийн тусгай зөвшөөрөл авснаас хойш 1-гурван жилийн хугацаанд хөрөнгө оруулалтын сангаа байгуулаагүй буюу үйл ажиллагаа огт явуулаагүй “Агниста инвест менежмент”, Бодь инвест менежмент ХХК-уудын болон зохистой харьцааны шалгуур үзүүлэлт болон дагаж мөрдөх үзүүлэлтийг хангаж ажиллаагүй, 2016, 2017 оны санхүүгийн тайлан ирүүлээгүй “Сити инновэйшн”, “Монголын багш нарын хөгжил”, “Ундрах актив” ХЗХ-дын тусгай зөвшөөрлийг гурван сар хүртэл хугацаагаар түдгэлзүүлжээ.

Н.ГАН

Хууль сахиулах салбарын гадаад болон дотоодын эрдэмтэн судлаачид Хууль сахиулахын их сургуульд чуулж байна. Хоёр дахь өдрөө үргэлжилж буй тус хурал энэ жил “Хууль сахиулах үйл ажиллагаа онол практикийн тулгамдсан асуудал” сэдэвтэйгээр 7 дахь удаагаа зохион явагдаж байна. Энэ үеэр тус сургуулийн Онцгой байдлын сургуулийн Эдийн засаг нөөцийн удирдлагын тэнхимийн эрхлэгч, доктор /Ph.D/, дэд хурандаа Х. Мягмаржав “Улаанбаатар хотын хөрсний хүнд металлын агууламжийн өнөөгийн байдал” сэдэвт илтгэл хэлэлцүүлсэн нь олны анхаарлыг татав.

Тэрбээр судалгааны хүрээнд гэр хорооллын болон төв автозамын ойр цэгүүд болох 12 цэгээс дээж авч хөрсний никель, хром, хар тугалга, цайр, зэс, зэрэг хүнд металлуудын агууламжийг тодорхойлсон байна.

Судалгааны дүнгээр Улаанбаатар хотын хөрсний хүнд металлын агууламж түүний дотроос хар тугалгын агууламж зөвшөөрөгдөх хэмжээнээс 2.7-3.4 дахин их, цайрын агууламж зөвшөөрөгдөх хэмжээнээс 29 мг/г-аар илүү, зэсийн агууламж 29.5 мг/г –аар илүү байгаа нь тогтоогджээ.

Тодруулбал, Улаанбаатар хотын хөрсний ерөнхий бохирдолтын төвшин Улаан­чулуут, Дарь-эхийн хогийн цэг, Хотын цэвэрлэх байгууламж, Нарантуул зах, Шархадны автомашины зах, III-IV цахилгаан станц, Дэнжийн мянга, Хайлаастын ам, Шарга морьтын зуслангийн адаг, 100 айл орчим зэрэг газруудад онцгой их буюу хотын дундаж агууламжаас их байж, “хэт их бохирдолттой” зэрэглэлд багтдаг гэсэн судалгаа гарчээ. Зөвхөн хотын захын хөрсний бохирдол хэрээс хэтэрсэн гэж үзэж болохгүй. Учир нь хотын төв хэсгийн газар бүхэлдээ хотын дундаж дэсвгэр агууламжаас 3-8 дахин (Zc = 3.0-8.0) их буюу “бохирдолттой” гэсэн зэрэглэлд багтсан аж.

Улаанбаатар хотын хувьд үйлдвэр аж ахуйн газруудын нягтаршил, хүн амын хэт төвлөрөлтөөс сүүлийн жилүүдэд хотын экологи орчин бохирдож эхэлсний нэг жишээ нь агаарын болон хөрсний хэт бохирдол юм.

Улаанбаатар хотод өнөөгийн байдлаар 300 гаруй мянга орчим авто тээврийн хэрэгсэл тоологддогийн 80 хувь нь хуучин машинууд аж. Тухайн тээврийн хэрэгслийг түүвэрлэх аргаар шалгахад 52.5 хувь нь ялгарч буй угаарын хий, азотын дутуу ислийн хэмжээ монгол улсад мөрдөгддөг стандартын шаардлагаас дээгүүр гэсэн үзүүлэлттэй гарсан байна.

Нийслэлийг бүхэлд нь төдийгүй улс орныг эрчим хүчээр хангадаг 3 том цахилгаан станц жилд 5 сая тн нүүрс, гэр хороолоын 200 гаруй мянган өрх 900 гаруй мянган тн нүүрс, 3400 гар халаалтын нам даралтат зууханд 180.000тн түүхий нүүрс , мөн 237.0 м. куб мод шатааж, тэдгээрийн хорт утаагаар агаарт 260.0 мянган тн орчим хорт бодис агаарт цацагдсанаар хотын нэг оршин суугчид 317.8 кг хорт бодис ноогдож байгаа гэсэн судалгааг ХСИС-ийн эрдэмтэд 2007 онд гаргасан байдаг.

Агаарын бохирдол нь иргэдийн эрүүл мэндэд сөргөөр нөлөөлснөөс сүүлийн жилүүдэд амьсгалын замын болон харшлын гаралтай өвчлөлүүд ихэсч, Улаанбаатар хотод хорт хавдар болон уушгины өвчлөлөөр нас барагсадын тоо өссөөр байгааг тогтоосон байна.

Дээрх судалгаанд хамаарагдсан цэгүүдээс Сонгино хайрхан дүүргийн 11 дүгээр хорооны нутаг дэвсгэрт хар тугалганы агууламж хамгийн их буюу 340 мг/г байгаа нь МNS5850:2008 –аас 3.4 дахин их байна. Энэ хэсэгт нийт хар тугалгын агууламжийн 55% нь тус дүүргийн 65 дугаар сургуулийн орчимд байгаа нэлээд ноцтой үзүүлэлт юм.

Монгол улсад бүртгэгдсэн химийн бодисын аюулын үнэлгээгээр их аюултай бодисын ангилалд багтдаг бодис болох цайрын агууламж тус хэсэгт хамгийн их буюу хүлцэх хэмжээнээс 29.0 мг/г-аар илүү байна.

Мөн химийн онцгой аюултай бодис болох кадмийн агууламж Сонгинохайрхан дүүргийн 11 дүгээр хорооны нутаг дэвсгэрт 2.3 мг/г буюу нийт агууламжийн 75% болж байгаа нь эрдэмтдийн санааг зовоож буй аж. Учир нь кадми нь хорт хавдар үүсгэдэг төдийгүй нөхөн үржихүйн систем болон эхийн урагт хортойгоор нөлөөлдөг бодис юм.

Харин Чингэлтэй дүүргийн нийт кадмийн агууламжийн 64% нь 11 дүгээр хорооны нутаг дэвсгэрийн Нуурын орчимд тархсан байна.

Баянзүрх дүүргийн нутаг дэвсгэрийн никелийн тархалтын 58%, хромын агууламжийн 44%, хар тугалгын тархалтын 35%, зэсийн тархалтын 37% нь 3 дугаар хорооны нутаг дэвсгэр буюу “Да хүрээ” техникийн захын орчмоос илэрсэн байна. Тус дүүргийн нутаг дэвсгэрт тархсан хар тугалгын тархалтын 57%, цайрын тархалтын 76%, зэсийн тархалтын 63% нь 8 дугаар хорооны нутаг дэвсгэрээс илэрсэн байна.

“Хууль сахиулах үйл ажиллагаа онол практикийн тулгамдсан асуудал” сэдэвт дээрх хуралд төрийн байгууллага, яамд, хууль сахиулах байгууллага, их, дээд сургууль, хүрээлэн, төв, төрийн бус байгууллагын 250 гаруй эрдэмтэн, судлаач, мэргэжилтэн, практикийн ажилтан, ОХУ, Буриад, Австрали, БНСУ зэрэг орны 20 гаруй эрдэмтэн, судлаач, хүндэт зочин, төлөөлөгчид, Монгол Улсад суугаа дипломат байгууллага, олон улсын байгууллагын төлөөлөгч оролцож байна.
Хууль сахиулахын их сургууль 2012 оноос Улсын Их Хурлын Хууль зүйн байнгын хороо, Хууль зүй, дотоод хэргийн яам, Боловсрол, соёл, шинжлэх ухаан, спортын яам, ХБНГУ-ын Ханнс-Зайделийн сантай хамтран жил бүр тодорхой сэдвээр эрдэм шинжилгээний хурлыг амжилттай зохион байгуулж ирсэн уламжлалтай. Энэ жил VII дахь удаа олон улсын эрдэм шинжилгээний хурлыг амжилттай зохион байгуулж байна.

Гэр бүлийн хүчирхийлэлтэй тэмцэх тухай хууль болон 2017 оны 07 дугаар сарын 1-ний өдрөөс мөрдөгдөж эхэлсэн Зөрчлийн тухай хууль, Эрүүгийн хууль, Эрүүгийн хэрэг хянан шийдвэрлэх тухай хуулийн хэрэгжилтийг хангах, гэр бүлийн хүчирхийлэлд өртсөн, хохирсон насанд хүрээгүй хүн болон эмэгтэйчүүдтэй уулзах, зөвлөгөө өгөх, мэдүүлэг авах “Уулзалтын өрөө”-г бий болгон тохижуулах зорилгоор Дэлхийн зөн олон улсын байгууллага, дүүргийн Засаг даргын тамгын газартай хамтран тохижилтод шаардагдах төсөв, хөрөнгийн судалгааг гарган шийдвэрлүүлж “Насанд хүрээгүй хүн болон эмэгтэйчүүдээс мэдүүлэг авах өрөө, “Хяналтын өрөө”-г тус тус тохижуулан өнөөдөр нээлтийн арга хэмжээг зохион байгуулан хүлээн авч ашиглалтад орууллаа.

Нээлтийн арга хэмжээнд “Дэлхийн зөн” олон улсын байгууллагын Н. Цэрэнлхам, дүүргийн Засаг даргын тамгын газраас Засаг даргын орлогч Н.Нарангэрэл, тус хэлтсийн дэд дарга, цагдаагийн дэд хурандаа Б.Лхагваням, мөрдөн байцаах тасгийн дарга, цагдаагийн дэд хурандаа Д.Даваасүрэн, хэрэг бүртгэх тасгийн дарга, цагдаагийн ахмад С.Амартайван болон албаны бусад хүмүүс оролцлоо гэж ЦЕг-аас мэдээллээ.