Month: March 2017

Олон улсын эмэгтэйчүүдийн баярын өдрийг тохиолдуулан Улсын Их Хурлын Тамгын газрын удирдлага өнөөдөр /2017.03.07/ УИХ-ын Тамгын газар, УИХ-ын даргын ажлын алба, УИХ дахь намын бүлгийн ажлын алба болон УИХ-ын Тамгын газарт ажиллаж байгаад гавьяаны амралтад гарсан эмэгтэйчүүдэд баяр хүргэж, хүндэтгэл үзүүллээ.

Жил бүр уламжлал болгон зохион байгуулдаг уг арга хэмжээг УИХ-ын Тамгын газрын Ерөнхий нарийн бичгийн дарга Ц.Цолмон нээж хэлсэн үгэндээ, Олон улсын эмэгтэйчүүдийн баяр гэдэг бол төрийн болон төрийн бус байгууллага төдийгүй бүх гэр бүл, хамт олны эмэгтэйчүүддээ хүндэтгэл үзүүлдэг баяр хэмээн онцолж, чин сэтгэлийн халуун мэндчилгээ дэвшүүлэн, ажлын амжилт, эрүүл энх, аз жаргал, баяр баясгалан бүхнийг хүсэн ерөөлөө гэж УИХ-ын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.

Улсын Их Хурлын гишүүн, Төрийн байгуулалтын байнгын хорооны дарга Н.Энхболд өнөөдөр Бүгд Найрамдах Беларусь Улсаас Монгол Улсад суугаа Онц бөгөөд Бүрэн эрхт Элчин сайд Станислав Владимирович Чепурнойг хүлээн авч уулзав.

Уулзалтын эхэнд Элчин сайд С.В.Чепурной, Беларусь, Монгол Улс бол хамтын ажиллагааны олон арван жилийн түүхэн уламжлалтай орон. Сүүлийн жилүүдэд хоцрогдонгуй байгаа худалдаа, эдийн засгийн болон бусад салбарын хамтын ажиллагааг өргөжүүлэх шаардлагатай байна. Мөн улс төрийн өндөр, дээд түвшний харилцан айлчлалыг сэргээн тогтворжуулах, парламент хоорондын харилцааг идэвхжүүлж, гишүүдийг харилцан айлчлуулах нь чухал гэж үзэж байгаагаа онцлов. Беларусь, Монголын Засгийн газар хоорондын комиссын хуралдаанаар хэлэлцэн тохирсон хамтын ажиллагааны төсөл хөтөлбөрүүдийг хэрэгжүүлэх, худалдаа, эдийн засгийн хамтын ажиллагааг өргөжүүлэн, гүнзгийрүүлэх асуудлыг хөндлөө.

Тэрээр Беларусийн хууль тогтоох байгууллага буюу Үндэсний хуралд 12 гишүүнтэй Беларусь, Монголын парламентын бүлэг байгуулагдан ажиллаж байна гээд Монгол Улсын Их Хуралд ийм бүлэг байгуулагдана гэдэгт найдаж байгаагаа илэрхийлэв. Түүнчлэн Элчин сайд С.В.Чепурной, Улаанбаатар хотын нийтийн тээврийн үйлчилгээ, хөдөө аж ахуйн салбар, үүн дотор сүү, сүүн бүтээгдэхүүний үйлдвэрлэл, хүнд машин механизм, уул уурхай зэрэг олон салбарт хамтран ажиллах боломж байгааг тэмдэглэж, нэгэнт хэлэлцэн тохирсон ажил, арга хэмжээг бодит ажил хэрэг болгож үр дүнд хүргэх нь чухал байна гэдгийг онцлов.

УИХ-ын гишүүн, Төрийн байгуулалтын байнгын хорооны дарга Н.Энхболд, хоёр орны найрсаг харилцаа хамтын ажиллагааг бүх салбарт гүнзгийрүүлэн хөгжүүлэх нь чухал бөгөөд ийм боломж бий гэдэгт санал нэг байгаагаа тэмдэглэв. Тэрбээр, Монгол Улсын эдийн засгийн өнөөгийн нөхцөл байдлын талаар танилцуулаад энэ хүндрэлтэй байдлыг энэ онд багтаан тогтворжуулах, цаашид ойрын 1-2 жилдээ багтаан даван туулах боломжтой гэж үзэж байгаагаа хэлсэн юм. Мөн Монгол Улсын Их Хуралд хоёр орны парламентын бүлэг удахгүй байгуулагдана гэж найдаж буйгаа илэрхийллээ гэж УИХ-ын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.

Боловсрол соёл, шинжлэх ухаан, спортын яамны албан ёсны сайтад өнөөдөр “Хариу хүргүүлэх тухай” гэсэн мэдээлэл гарчээ. “Шинжлэх ухааны байгууллагуудын

Үйлдвэрчний эвлэлийн нэгдсэн хороонд” хаягласан Боловсрол соёл, шинжлэх ухаан,спортын сайд Ж.Батсуурийн уг хариунд маш олон тайлбар хийсний эцэст “Баянзүрх дүүргийн 13 дугаар хороо, Энхтайваны өргөн чөлөө-63-т байрлах барилга байгууламжийг Шинжлэх ухааны академийн харьяа Палеонтологи, геологийн хүрээлэнгийн үндсэн хөрөнгөд хэвээр хадгалан үлдээх талаар Шинжлэх ухааны байгууллагуудын Үйлдвэрчний эвлэлийн нэгдсэн хороотой санал солилцон, хамтран ажиллах саналтай байна” хэмээн төгсгөжээ. Харин үүнээс өмнө дараах тайлбаруудыг хийж, түүх сөхсөн байна.

“Шинжлэх ухааны академийн харъяа Палеонтологи, геологийн хүрээлэн нь шинжлэх ухааны 2 том чиглэл болох палеонтологи, геологийн салбарт судалгаа боловсруулалтын ажлыг эрхлэн явуулж, мэргэжлийн өндөр чадвартай боловсон хүчинг бэлтгэх ажлыг гүйцэтгэдэг манай улсын тэргүүлэх хүрээлэнгүүдийн нэг. Уг хүрээлэнгийн үйл ажиллагаа, судалгааны ажлын цар хүрээтэй уялдуулан эрдэм шинжилгээний ажилтны тоог нэмэгдүүлж, чадваржуулах бодит шаардлага байсаар байна. Гэсэн хэдий ч Палеонтологи, геологийн хүрээлэн улс эх орны санхүү, эдийн засгийн хүндрэлтэй нөхцөл байдлыг харгалзан үзэж, цөөн орон тоотойгоор өөрсдийн судалгааны ажлын цар хүрээ, чанар, үр дүнг алдагдуулахгүйгээр үйл ажиллагаагаа үргэлжлүүлж байгаа билээ.

Баянзүрх дүүргийн 13 дугаар хороонд байрлах Шинжлэх ухааны академийн 8-р байр буюу Палеонтологи, геологийн хүрээлэнгийн байранд тус хүрээлэнгийн Геологийн салбар бүхэлдээ, мөн Палеонтологийн салбарын “Урьд кембр-палеозойн судалгааны хэсэг, мезо-кайнозойн нуур усны амьтан ургамлын хэсгийн судлаачид нийт 48 хүн ажилладаг. Тус хүрээлэнгийн региональ геологи ба тектоникийн лаборатори, магматизм ба металлогений лаборатори, шлиф хийх, дээж бутлах цехийн геологийн судалгааны багаж төхөөрөмжийг энэ байранд байрлуулсан байдаг. Мөн Монгол улсын эртний ургамлын сан, сээр нуруугүй амьтдын, геологийн суурь судалгааны, боловсруулагдаагүй чулуун дээжний сан хөмрөг /фонд/, агуулах зэрэг судалгааны анхдагч болон эталон материал тус байранд хадгалагддаг байдаг болно.

Гэвч өмнөх Засгийн газар 2016 оны 5-р сарын 23-ны өдөр 270 дугаар тогтоолыг тус хүрээлэнгийн харьяалах байгууллага болох Боловсрол, соёл, шинжлэх ухааны яам /тухайн үеийн/, Шинжлэх ухааны академиас ямар нэгэн санал авалгүйгээр батлан гаргасан байна. Тухайн үед Боловсрол, соёл, шинжлэх ухааны яам нь Шинжлэх ухааны академи, Палеонтологи, геологийн хүрээлэн, Шинжлэх ухааны байгууллагуудын Үйлдвэрчний эвлэлийн нэгдсэн хорооны төлөөлөгчидтэй уулзаж зөвшилцөж хамтран ажилласны үр дүнд уг тогтоолыг эргүүлэн татах шийдвэрийг Засгийн газрын хэрэг эрхлэх газар гаргасан болно.

Засгийн газрын хэрэг эрхлэх газрын 2016 оны 11 сарын 23-ны өдрийн “Засгийн газрын 2016 оны 270 дугаар тогтоолыг хэрэгжүүлэх тухай” албан бичиг гарсантай холбогдуулан тус яамнаас мөн арга хэмжээ авч, Засгийн газрын хэрэг эрхлэх газрын дэд дарга У.Бямбасүрэнд 2016 оны 2/4505 тоот албан бичиг хүргүүлсэн байдаг. Уг бичигт Шинжлэх ухааны академийн харьяа Палеонтологи, геологийн хүрээлэнгийн үндсэн хөрөнгөд бүртгэлтэй Баянзүрх дүүргийн 13 дугаар хороо, Энхтайваны өргөн чөлөө-63-т байрлах барилга байгууламжийг Баянзүрх дүүргийн прокурорын газарт балансаас балансад шилжүүлэх асуудлыг түр хойшлуулах, Боловсрол, соёл, шинжлэх ухаан, спортын яам тус барилга байрлаж буй газарт судалгааны лаборатори, албан конторын зориулалт бүхий 17 давхар барилгыг шинээр барьж байгуулах ажлыг гүйцэтгэх, Шинээр ашиглалтад орох тус барилгад Шинжлэх ухааны академийн харьяа хүрээлэнгүүд, тэр дундаа Палеонтологи, геологийн хүрээлэн болон Баянзүрх дүүргийн прокурорын газар байрлан, үйл ажиллагаагаа явуулах боломжтой талаар дурдсан.

Улмаар Төрийн өмчийн бодлого, зохицуулалтын газрын даргын 2017 оны 02 дугаар сарын 09-ний өдрийн А/24 тоот тушаалаар Баянзүрх дүүргийн 13 дугаар хороо, Энхтайваны өргөн чөлөө-63-т байрлах барилга байгууламжийг Баянзүрх дүүргийн Прокурорын газарт хүлээлгэн өгөх ажлын хэсэг байгуулагдсан. Энэхүү ажлын хэсэгт БСШУСЯамнаас ШУТБГазрын даргын үүрэг гүйцэтгэгч Т.Ган-Эрдэнэ, ИӨТХэлтсийн даргын үүрэг гүйцэтгэгч Д.Одгэрэл нар оролцож, эсрэг байр суурь илэрхийлсэн хэдий ч ажлын хэсгийн олонхийн шийдвэрээр тус байрыг Баянзүрх дүүргийн Прокурорын газарт хүлээлгэн өгөх ажлыг гүйцэтгэхээр болсон байна” гэжээ.

Монгол Улсын Их Хурлын дарга М.Энхболд Олон улсын эмэгтэйчүүдийн өдрийг тохиолдуулан төр, засгийн өндөр албан тушаал хашиж байгаа эмэгтэйчүүдийн төлөөллийг хүлээн авч, баяр хүргэв.

Тэрбээр тэдэнд эрүүл энх, баяр баясгалан, аз жаргал, ажлын амжилтыг хүсээд “Манай монгол бүсгүйчүүд нийгмийн бүхий л салбарт амжилттай ажиллаж хөдөлмөрлөж, алдар гавьяагаа дархалсаар ирсэн билээ. Тэдний нэг хэсэг нь төрийн бүх шатны байгууллагад ажил хөдөлмөр эрхэлж байгаа бүсгүйчүүд юм. 2016 оны байдлаар төрийн байгууллагын нийт ажиллагсдын 59.4 хувь нь эмэгтэйчүүд байна. Тэгэхээр монгол төрийн албан хаагчдын 60 шахам хувь нь бүсгүйчүүд байна гэсэн үг. Та бүхнээр уламжлан Монголынхоо бүх эмэгтэйчүүд, ээж нарт чин сэтгэлийн мэндчилгээ өргөн дэвшүүлж байна” гэлээ.

Эл арга хэмжээнд УИХ-ын гишүүн, Засгийн газрын гишүүн Д.Оюунхорол, УИХ-ын гишүүн Г.Мөнхцэцэг, З.Нарантуяа, Д.Сарангэрэл, Б.Ундармаа, Эрүүл мэндийн сайд А.Цогцэцэг, Дэд сайд Б.Батцэцэг, Х.Булгантуяа, Л.Бямбасүрэн, Ж.Сауле, Засгийн газрын Хэрэг эрхлэх газрын тэргүүн дэд дарга Ш.Солонго, УИХ-ын даргын зөвлөх Т.Ганди, Боловсрол, соёл, шинжлэх ухааны яамны Төрийн нарийн бичгийн дарга Б.Баярсайхан нарын зэрэг төрийн түшээ бүсгүйчүүд хүрэлцэн ирсэн байв.

Уулзалтад УИХ-ын Тамгын газрын Ерөнхий нарийн бичгийн дарга Ц.Цолмон байлцлаа гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.

Засгийн газар 2017.03.07-ны өдөр хуралдан доорхи асуудлуудыг хэлэлцэн шийдвэрлэлээ

Мансууруулах болон сэтгэцэд нөлөөт эмтэй холбоотой хэрэгт 1112 хүн холбогджээ

Мансууруулах эм, сэтгэцэд нөлөөт бодисын хууль бус эргэлттэй тэмцэх үндэсний хөтөлбөрийг Засгийн газрын хуралдаанаар хэлэлцэн баталлаа.

Хөтөлбөрийг хэрэгжүүлснээр хар тамхи, мансууруулах бодисын хэрэглээнд тавих хяналт, хууль бус эргэлт, хэрэглээтэй тэмцэх, таслан зогсоох, гэмт хэргийн шалтгаан нөхцлийг тогтоох замаар урьдчилан сэргийлэх, донтсон хүнийг сайн дурын болон албадан эмчлэх нэгдсэн тогтолцоо бий болох юм.

Сүүлийн 10 жилд мансууруулах болон сэтгэцэд нөлөөт эм, бэлдмэл, бодисыг хууль бусаар бэлтгэх, олж авах, хадгалах, тээвэрлэх, илгээх, борлуулах, улсын хил нэвтрүүлсэн хэрэг 388 удаа бүртгэгдэж 1112 хүн шалгагджээ.

Дээрх бодисыг хилээр нэвтрүүлэх арга, хэлбэр улам нарийсч, олон улсын шуудан илгээмж, цахилгаан бараа, ахуйн болон хүнсний өргөн хэрэглээний бүтээгдэхүүнд нуух, бусдад дайх хэлбэрээр илгээх, товлосон газарт нууж үлдээх, төлбөр хийхдээ бусдын дансыг ашиглах болсон байна. 2014-2015, 2016 оны эхний 10 сарын байдлаар эрүүгийн 131 хэргийг шүүх хэлэлцэн шийдвэрлэж, 189 хүнийг гэм буруутайд тооцон, баривчлах, хорих ялаар шийтгэжээ.

Иймээс мансууруулах эм, сэтгэцэд нөлөөт бодисын хууль бус эргэлтэд хяналт тавих, эрх зүйн орчныг боловсронгуй болгох, алба хаагчдыг мэргэшүүлэх, бодисын хор хөнөөлөөс хүн амыг хамгаалах зорилгоор хөтөлбөрийг баталлаа.

Хөтөлбөрийг хэрэгжүүлэхэд шаардагдах хөрөнгийг жил бүрийн улсын төсөвт тусгаж, хандивлагч орон, олон улсын байгууллагын зээл,тусламжид хамруулах, хувийн хэвшлийн хөрөнгө оруулалтыг татаж санхүүжүүлэхийг холбогдох сайд нарт даалгав.

Газар хөдлөлтийн аюулаас сэргийлэх, таниулах өдөртэй боллоо

Жил бүрийн 03 дугаар сарын дөрөвдэх лхагва гарагийг “Газар хөдлөлтийн аюулаас урьдчилан сэргийлэх, таниулах өдөр” байхаар Засгийн газрын хуралдаанаас шийдвэрлэлээ.

Энэ өдөр урьдчилан сэргийлэх, эрсдлийг бууруулах, бэлэн байдлыг хангах, аврах үйл ажиллагаанд иргэдийг сургаж бэлтгэх, таниулах арга хэмжээг орон даяар хийх юм.

Манай орны нийт нутаг дэвсгэрийн 55 гаруй хувь нь газар хөдлөлтийн 7-8 ангилалд, 9 ба түүнээс дээш баллын ангилалд 20 орчим хувь нь хамрагддаг. Сүүлийн 50 гаруй жилийн хугацаанд хот, суурин газрын 75 орчим хувь нь газар хөдлөлтийн 7 ба түүнээс дээш, 12 сум, суурин газар 9 ба түүнээс дээш баллын газар хөдлөлийн чичирхийллийн бүс нутагт байна.

2016 онд улсын хэмжээнд 28 мянга орчим чичирхийлэл бүртгэгдсэн бөгөөд Монгол-Алтайн нуруу, Чуй, Цагаан шувуут, Үүрэг нуур, Бүсийн гол, Хангайн өргөгдлийн бүс, Могодын газар хөдлөлтийн голомтын бүс, Улаанбаатар хот орчмын Гүнжийн ам, Авдар уул, Эмээлт, Хустайн нуруу зэрэг газарт газар хөдлөлтийн чичирхийлэл идэвхтэй хэвээр байна. 2000 онд Улаанбаатар хот орчимд жилд 200 гаруй удаа чичирхийлэл бүртгэгдэж байсан бол 2016 онд 1800 гаруй удаа бүртгэгджээ.

Идэвхжил бүхий газарт 6.6-7.6 магниутдын хүчтэй газар хөдөлвөл хотын барилга, байгууламжийн 22-50 хувьд эвдрэл гэмтэл, нуралт болж, 30-аас дээш хүн нэрвэгдэж болзошгүй гэсэн тооцоо гарсан байна. Энэ нь гамшгаас урьдчилан сэргийлэх, бэлэн байдлыг хангах, эрсдлийг бууруулах тогтолцоог сайжруулах, гамшгаас хамгаалах үндэсний чадавхийг бэхжүүлэх шаардлагатай байгааг харуулж байгаа юм.

“Эх, хүүхэд, нөхөн үржихүйн эрүүл мэнд” үндэсний хөтөлбөрийг баталлаа

Хөтөлбөрийг хэрэгжүүлэх арга хэмжээг жил бүрийн үндсэн чиглэл, шаардагдах хөрөнгийг ул болон орон нутгийн төсөвт тусгаж, олон улсын зээл, тусламжид хамруулах замаар санхүүжүүлэхийг холбогдох сайд, аймаг, нийслэлийн Засаг дарга нарт үүрэг болгов.

Сүүлийн 20 жилийн хугацаанд хэрэгжүүлсэн 10 гаруй хөтөлбөрийн дүнд эхийн эндэгдэл өндөртэй орноос дунд зэрэгтэй орны түвшинд шилжсэн. Гэсэн ч эх, хүүхдийн өвчлөл, эндэгдэл тогтвортой буурахгүй, зарим бүс нутаг, аймагт эндэгдлийн харьцаа өндөр хэвээр байна.

2011-2015 эхийн эндэгдлийн харьцаа Баян-Өлгий аймагт 89.5, Баянхонгорт 73.6, Завханд 65.9, Өвөрхангайд 52.3, Төв аймагт 50.9, Хөвсгөлд 49.8, Сэлэнгэд 41.2, Хэнтийд 38.1 хувь байгаа нь улсын дунджаас өндөр гэсэн үг юм.

Эхийн эндэгдлийн шалтгаанд дүн шинжилгээ хийхэд 32.9 хувь нь ажилгүй, 25 хувь нь малчин, 9.9 хувь нь оюутан эх байсан нь амьжиргаа, шилжилт хөдөлгөөн, засаг захиргааны завсардал, эмнэлгийн тусламж, үйлчилгээг оройтож авснаас болсон байна.

Хөтөлбөрийг хэрэгжүүлснээр эх, хүүхэд, нөхөн үржихүйн эрүүл мэндийн тусламж, үйлчилгээний бэлэн байдлыг хангаж, оношлогоо, эмчилгээний дэвшилтэт аргыг нэвтрүүлж, хүний нөөцөө чадавхижуулан эх, хүүхдэд үзүүлэх эрүүл мэндийн тусламж, үйлчилгээний чанар, хүртээмж сайжрах юм.

Товч мэдээ

– Татварын алба, Гаалийн ерөнхий газар, Барилга эхлүүлэх, үргэлжлүүлэх зөвшөөрөл олгох, Барилга байгууламжийг ашиглалтад оруулах дүрэм болон Хот, суурины ус хангамж, ариутгах татуургын ашиглалт, үйлчилгээг зохицуулах зөвлөлийн 2016 оны үйл ажиллагааны төсвийг хавсралтаар баталлаа.

– “Хөшөөтийн уурхайгаас Ховд аймгийн Алтай сум хүртэл 35 кВт-ын цахилгаан дамжуулах агаарын шугам, дэд станц барих төсөл”-ийг “Хөшөөтийн уурхайгаас Ховд аймгийн Үенч сум хүртэл 35 кВт-ын цахилгаан дамжуулах агаарын шугам барих, Үенч дэд станцыг өргөтгөх төсөл” хэмээн өөрчиллөө.

– Хууль тогтоомж, Засгийн газрын шийдвэрийн хэрэгжилтийн 2016 оны жилийн эцсийн дүнг Монгол Улсын сайд, Засгийн газрын Хэрэг эрхлэх газрын дарга Ж.Мөнхбат танилцуулав. Үүнтэй холбогдуулан УИХ-ын болон Байнгын хорооны тогтоол, Ерөнхийлөгчийн зарлиг, Үндэсний аюулгүй байдлын зөвлөл болон Засгийн газрын шийдвэрээр Засгийн газар, сайд, агентлаг, аймаг, нийслэлийн Засаг дарга нарт даалгасан заалт бүрийг хяналтад авч, хэрэгжүүлэх ажлыг төлөвлөгөөтэй, шуурхай зохион байгуулахыг үүрэг болгов. 2016 оны хагас жилийн байдлаар тасарсан болон хэрэгжилт удааширч байгаа үүрэг, даалгаврыг биелүүлэхэд онцгой анхаарахыг даалгалаа.