Month: March 2017

Зохиолч, сэтгүүлч Бямбаагийн Сарантуяагийн гурав дахь түүхэн сэдэвт роман “Самар хатан” номын нээлт өчигдөр “Аз хур” номын дэлгүүрт боллоо. Хөл хөдөлгөөн ихтэй, ирсэн хурсан зочид зохиолчид баяр хүргэн сэтгэлийн үгээ дэлгэсэн халуун дотно уур амьсгалтай нэгэн номын үдэш болж өнгөрөв. Б.Сарантуяа урт бор торгон дээл өмсөж үеийн хэдэн эмэгтэй зохиолчидтойгоо зургаа татуулан инээмсэглэн зогсоно. Номын нээлт 18:00 цагт товлогдон нэлээд орой болтол үргэлжилсэн юм.

Зохиолч найз нөхөдөө дуудан “Алив ном авсан уу, хэн нэгэнд номоо өгөлгүй гомдоогоод явуулчих вий дээ…” гэж сандран ирсэн хүн болгон гарын үсгээ зуран номоо өгөх нь хэзээний л номын нээлт хийгээд сурчихсан аргагүй л буурь суурьтай зохиолч хүн шиг харагдана. Сайхан инээмсэглэлийнх нь цаана энгийн даруу эгэлхэн мөртлөө гэгээлэг агуу их хүсэл мөрөөдөлтэй бяцхан охин байгаа ч юм шиг санагдан номын эхний хэдхэн хуудсыг дэлгэн уншихад л зохиолын гол баатар Самар охины гэнэн томоогүй хэрнээ хэрсүү мөртөө зоримог шийдэмгий дүр өмнө минь хөвөрнө.

Түүний “Сайн Бат хаан” зохиол нь ч тэнгэр газрыг нийлүүлэн хур бороо орж ер бусын байдлаар олныг алмайруулан эхэлдэг бол “Самар хатан” роман ч мөн л адил тэнгэрээс нэгэн сайхан дагина бууж ирж байгаагаар эхэлнэ. Тэр бол Самар хатан ажгуу. Ингээд зохиолын эхний хэдэн мөрийг та бүхэндээ толилуулъя.

Сарьдаг өндөр уулсын оройг тэгнэн буусан хөвөгч цагаан үүлсийн дундаас уянгалаг хоолой сонсогдоно. “Тэнгэрийн хаалга газрын үүдэн нээгдлээ. Алив дүү минь гараа өгөөрэй” хэмээгээд үзэсгэлэн төгс бүсгүй дэргэдэх залуу охины баруун гараас нь атгаха, “Айж гэрэвших хэрэггүй ээ. Эгч нар нь энд бууж хүйс голчийг эзэгнэсэн хөлгүй цэнхэр нууранд цэнгэх дуртай. Сарьдагийн оройд эгэл хүн хөлөө тавихгүй тул санаа амгалан байж болно” гэж хэлээд өөр нэгэн бүсгүй зүүн гараас нь хөтлөн, охиныг дагуулсаар үүлсийн завсраар доошлон буув. Эргэн тойрон ой тайга бүрхсэн өвч их уулсын халзан зулай дээр хөлөө тавих агшинд чанга хатуу газрын хөрс чимчигнүүлэн өлмийг нь өвтгөх ч хэд хэд алхсаны дараа хөл нь аяндаа дасаж, сэрвэлзүүлэн илэх өвс ногоод нь гижиг хүрэм адтай халиуран найгаж байв…

О.ӨНӨР

“Өдрийн сонин”-ы лхагва гаригийн дугаар 20 нүүрээр хэвлэгдэн, захиалагчдадаа хүрлээ. Энэ өдрийн дугаарт гарсан нийтлэл, сурвалжлага, ярилцлага, мэдээ мэдээллээс онцолж, тоймлон хүргэж байна.

“Өдийн сонин” эхний нүүртээ Олон улсын эмэгтэйчүүдийн баярт зориулан “Сайхан монгол ээж” арга хэмжээнээс төрсөн есөн алдартан ээжийн тухай нийтэллээ. Энэхүү арга хэмжээнд УИХ-ын дарга М.Энхболд, Ерөнхий сайд Ж.Эрдэнэбат нар оролцож ээж нарт шагнал өргөмжлөл гардуулсан юм.

Улс төрийн 2-р нүүрт УИХ-ын гишүүн Г.Мөнхцэцэгтэй хийсэн ярилцлага нийтлэгдлээ. Тэрбээр соёлын тухай хуулийг батлуулахын төлөө идэвхтэй ажиллаж байна хэмээн ярьжээ. Мөн малын удмын сангийн хуулийг ч анхаарч эдгээр хуулиудыг Их хурлаар яаралтай батлуулахын төлөө ажиллах болно хэмээжээ.

Баримт, үзэл бодлын 3-р нүүрт нэрт нийтлэлч Баабарын “Шүүхийн шийдвэр” нийтлэл хэвлэгдлээ.

Баянзүрх дүүргийн Засаг даргыг өнгөрсөн пүрэв гаригт хууль бусаар томилсонтой холбогдуулж, иргэд эсэргүүцлээ илэрхийлсэн билээ. Тухайн үед цагдаа нар иргэд рүү нулимс асгаруулагч цацаж, албадан хөөсөн. Энэ талаар хуульч О.Алтангэрэлээс тодруулсан ярилцлагыг 7-р нүүрнээс уншаарай.

Хониний сүүлээр саван зэрэг эко гоо сайхны бүтээгдэхүүн үйлдвэрлэж буй “Lhamour”брэндийн үүсгэн байгуулагч Д.Хулантай хийсэн ярилцлагыг өнөөдрийн дугаараас сонирхон уншаарай.

Мөн Германд Монголын иргэн онц ноцтой цуврал аллага үйдсэн талаарх сэтгэл сэрдхийлгэм мэдээллийг мөн энэ дугаараас уншаарай. Энэхүү аймшигт хэргийн талаар Германы хэвлэл мэдээллүүдээр гарчээ. Тэрээр гурван бүсгүйн амийг хөнөөснөө хүлээсэн байна.

Эдгээр болон бусад мэдээллүүдийн дэлгэрэнгүйг уншихыг хүсвэл дараах линкээр бүртгүүлнэ үү. https://admin.dnn.mn/plugins/news/login/

Эдгээр болон бусад цаг үеийн мэдээ мэдээлэл, ярилцлагуудыг “Өдрийн сонин”-ы лхагва гаригийн дугаараас уншаарай.

Эрхэм уншигч та, манай сонины өнөөдрийн дугаарыг “Монгол шуудан” компанийн нийслэл Улаанбаатар дахь 35 салбар, “Түгээмэл” шуудан, “Улаанбаатар”, “Скай” шуудангийн салбаруудаас очиж авч болох ба сонин борлуулах бүхий л цэгүүд, Хэвлэлийн биржээс худалдан авах боломжтой юм. Мөн “Мөнгөн завъяа” дахь сонин борлуулах цэг, Сансрын үйлчилгээний төв дэх сонин борлуулах цэг, Хан-Уул дүүргийн 19 дүгээр хорооллын үйлчилгээний төвд байрлах сонин борлуулах цэг, Саппорогийн “Миний дэлгүүр” дэх сонин борлуулах гол гол цэгүүдээс худалдах авч болохыг дуулгая. “Өдрийн сонин”-ы өөрийн байранд ирж худалдан авч бас болно.

“Өдрийн сонин”-той холбоотой бүхий л мэдээллийг Мэдээлэх эрхийн утас 19001987-гоос лавлаж болох ба захиалга өгөхийг хүсвэл 9911-2954, 8811-1375 дугаарт холбогдоно уу. Хэрэв цахим хэлбэрээр нь захиалахыг хүсвэл 88071920 дугаарт холбогдож дэлгэрэнгүй мэдээллийг лавлаарай.

“ӨДРИЙН СОНИН” ӨГЛӨӨ БҮХЭН ТАНТАЙ ХАМТ

АТГ-аас УИХ-ын гишүүн асан Н.Батбаяр, Б.Гарамгайбаатар нарыг хоёрдугаар сарын 22-ны өдөр баривчилж, цагдан хорих 461-р ангид саатуулаад байсан билээ. Тэднийг сэжигтнээр тооцон түр саатуулах хуулийн хугацаа өнөөдөр дуусгавар болжээ. Тэгвэл Сүхбаатар дүүргийн эрүүгийн хэргийн анхан шатны шүүхээс Б.Гарамгайбаатарыг өчигдөр сулласнаа дуулгасан. Харин өнөөдөр Н.Батбаярыг суллах шийдвэр гаргасан байна.

Н.Батбаярт Эрүүгийн хуулийн тусгай ангийн 263 дугаар зүйлийн 263.2, 264 дүгээр зүйлийн 264.2, 150 дугаар зүйлийн 150.3-т зааснаар сэжигтнээр тооцон шалгаж байсан бол УИХ-ын гишүүн асан Б.Гарамгайбаатарыг Халзан бүргэдэй, Солонготын давааны чиглэлийн замын гүйцэтгэл 38 орчим хувьтай байхад тухайн газарт дахин шинээр зам тавих нэрээр Хөгжлийн банкнаас нэмж нийт 43.6 тэрбум төгрөг гаргуулж, “Монроуд” компанид шууд шилжүүлж өгсөн гэж буруутгаж буй юм.

Олон Улсын Эмэгтэйчүүдийн эрхийг хамгаалах өдрийг тохиолдуулан “Сайхан монгол ээж” эмэгтэйчүүдийн чуулга уулзалт өнөөдөр Төрийн ордонд боллоо. Уулзалтад УИХ-ын дарга М.Энхболд, Ерөнхий сайд Ж.Эрдэнэбат болон УИХ, Засгийн газрын эмэгтэй гишүүд оролцлоо. Монгол Улсын Ерөнхий сайд Ж.Эрдэнэбат чуулганд оролцсон ээжүүдэд мэхийн ёсолж хүндэтгэл үзүүлж, үг хэллээ.

Ерөнхий сайд Ж.Эрдэнэбат,

-Уудам эх орны минь өнцөг булан бүрт өргөө гэрээ хатан ухаанаар залж, үр хүүхдүүдээ хүмүүжлээр тойлж, улс орныхоо хөгжилд үнэлж баршгүй хувь нэмрээ оруулан суугаа Монгол эхчүүд, эмэгтэйчүүд та бүхэндээ Монгол Улсын Засгийн газрын нэрийн өмнөөс болон хувиасаа Олон Улсын эмэгтэйчүүдийн эрхийг хамгаалах өдрийн халуун баярын мэндийг дэвшүүлж, та бүхнийхээ амьдралд аз жаргал, ажил үйлсэд тань өндөр амжилт, эрүүл энх, сайн сайхан бүхнийг хүсэн ерөөж мэндчилье.

Улс орны хөгжлийг түүчээлж, эх орныхоо төлөө эрэлхэг гавьяа байгуулсан хатан зоригт Монгол эмэгтэйчүүдийн баатарлаг үйлсийн тухай түүх өдгөө Монгол угсаатнуудын дунд мөнхрөн үлджээ. Тэдгээр гайхамшигт хатдын үргэлжлэл өнөө цагийн Монгол эмэгтэйчүүд Та бүхэн маань ажиллаж буй салбартаа амжилт бүтээлийг шаглан, эх орныхоо хөгжлийн товчийг зангидан байгаа нь сайшаалтай.

Монгол Улсын Засгийн газар эмэгтэйчүүдийнхээ хөдөлмөр эрхлэлтийг дэмжих, тэдний нийгмийн баталгааг хангах, тэгш эрхээр хангагдсан хүчирхийлэлгүй тайван орчинд амьдрах нөхцөлийг бүрдүүлэх зэрэг тулгамдсан асуудлуудыг шийдвэрлэхээр 2016-2020 оны үйл ажиллагааны хөтөлбөртөө тодорхой заалтуудыг тусган оруулж, хэрэгжүүлж байна. Тухайлбал,

Олон хүүхэд төрүүлж, өсгөсөн ээжийн улсад ажилласан жил, тэтгэвэр бодуулах хувийг өндөр байлгахын тулд өсгөсөн хүүхдийн тоогоор улсад ажилласан жил, нийгмийн даатгал төлсөн жилийг нь 1.5 жилээр нэмэгдүүлэн тооцохоор боллоо.

Хүүхдээ гурван нас хүртэл нь өөрөө асарч буй эхчүүдийн нийгмийн даатгалын шимтгэлийг ажил олгогч төлж, сайн дурын даатгалд даатгуулсан бол нийгмийн даатгалын шимтгэлийг Нийгмийн даатгалын сангаас буюу Тэтгэмжийн сангаас төлдөг байхаар зохицууллаа.

Жирэмсний болон амаржсаны тэтгэмжийг албан журмын даатгалд даатгуулсан ээж 100 хувь, сайн дурын даатгалд хамрагдсан нь 75 хувиар авдаг байсныг болиулж, 100 хувиар олгохоор тусгасан. Мөн жирэмсний амралттай байх хугацаандаа хоёр, гурав дахь хүүхдээ төрүүлсэн бол амаржсаны болон жирэмсний тэтгэмжийг олгохоор боллоо.

Монгол Улсын Засгийн газраас хийгдэж буй дээрх ажлууд эмэгтэйчүүдийн маань нуруун дээрх ачааг тодорхой түвшинд бууруулж, тэр хэмжээгээр үр хүүхдээ сургаж, улс эх орныхоо гэрэлт ирээдүйг бүтээх их үйлсэд та бүхний маань оруулах хувь нэмэр нэмэгдэнэ гэдэгт миний бие итгэлтэй байна.

Мөн төрөөс хүн ам зүйн талаар баримтлах бодлого болон гэр бүл, нийгмийн халамжийн бодлогодоо бид хүн амын төрөлтийг тууштай дэмжих бодлогыг баримталж, залуу гэр бүл, олон хүүхэдтэй эхчүүдийг дэмжих, тэдэнд санхүүгийн туслалцаа үзүүлэн ажилласаар ирсэн. Уг бодлогуудын үр дүнд жилдээ дунджаар 80,0 орчим мянган хүүхэд шинээр мэндэлж, хүн амын ердийн цэвэр өсөлт 20-22,0 пунктэд хүрч, 2016 оны жилийн эцсийн байдлаар Монгол Улсын хүн амын тоо 3 сая 120 мянга боллоо.

Сүүлийн жилүүдэд улс орны санхүү, эдийн засгийн байдал хүндрэлд орж, УИХ-с Эдийн засгийн тогтворжуулах хөтөлбөр гаргасан, мөн ОУВС-тай хамтран Өргөтгөсөн санхүүжилтийн хөтөлбөрийг тохирон хэрэгжүүлэх зэрэг олон талын арга хэмжээ авч улс орны макро эдийн засгийн тогтворжуулах бодлогыг хэрэгжүүлж байна. Хэдийгээр төсөв, хөрөнгө, санхүүжилтийн хувьд ийм хүндрэл бэрхшээлтэй тулгарч байгаа ч төрөөс эхчүүд, эмэгтэйчүүд, хүүхдүүдэд чиглэгдэж байгаа нийгмийн халамжийн бодлогоо бууруулалгүйгээр хэвээр үргэлжлүүлэх, зарим талаар өргөжүүлэх бодлогыг баримталж ажиллаж байна. Тухайлбал,

2016 оны байдлаар “Эхийн алдар” одонтой эхэд жилд нэг удаа олгох мөнгөн тусламжид 207,0 мянган хүн, жирэмсэн болон нярай, хөхүүл хүүхэдтэй эхийн тэтгэмжид 134,0 мянган хүн хамрагдаж байна.

Мөн Монгол Улсын Засгийн газраас “Эх, олон хүүхэдтэй өрх толгойлсон эцэг, эхэд тэтгэмж олгох тухай” хуулийн төслийг боловсруулж, өнгөрсөн оны 12-р сард УИХ-д өргөн мэдүүлээд байна. Өнөөдөр хуралдсан Засгийн газрын хуралдаанаар “Эх хүүхэд, нөхөн үржихүйн эрүүл мэнд” үндэсний хөтөлбөрийг хэлэлцэн баталсан нь ирэх 4 жилд эх хүүхэд, нөхөн үржихүйн эрүүл мэндийн тэгш, хүртээмжтэй, чанартай тусламж үйлчилгээг бүх нийтэд хүргэж, эрүүл саруул гэр бүл нь Монгол төрийн тулгуур багана болох учиртайг онцлон хэлэхийг хүсэж байна.

Улс орны маань ололт амжилт, хөгжил цэцэглэлт, эрдэмтэн мэргэдийн нээлт бүтээл, уран бүтээлчид, тамирчдын маань Олон Улсын тавцанд үзүүлж буй амжилт бүхэн нь хатан ухаант ээжүүд та нарын маань ач гавьяа билээ. Монголынхоо нийт ээжүүд, эмэгтэйчүүд, охид бүсгүйчүүд та бүхэндээ дахин баярын мэнд хүргэж, цаашдынх нь ажил хөдөлмөр тань сүүн цацал мэт өөдөө, ариун байхыг хүсэн ерөөе!” гэлээ.

Мөн энэ үеэр Улс нийгэмдээ үр бүтээлтэй ажиллаж хөдөлмөрлөхийн зэрэгцээ олон сайхан үр хүүхэд төрүүлж өсгөсөн Шатарбалын Цэрэнхүү, Шагдарын Өлзийбаяр, Маамын Жавзмаа, Баатарын Аръяа, Туяагийн Цогмөнх, Гошошийн Кагазбек, Чимэддоржийн Цэрэнханд, Туулайн Наранцэцэг, Жамъянгийн Насантогтох нарын 9 ээжийг “Сайхан монгол ээж”-ээр нэрлэж өргөмжлөл олголоо гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.