Нийслэлийн ЗДТГ, БОАЖЯ хамтран зохион байгуулж буй “Агаарын бохирдлыг бууруулахад иргэн таны оролцоо” технологийн үзэсгэлэн хоёр дахь өдрөө МҮХАҮТ-д үргэлжилж байна. Энэхүү үзэсгэлэнд 50 гаруй аж ахуй нэгж оролцож байна. Цахилгаан халаагуурууд 1.7-4.5 сая төгрөгийн үнэтэй худалдаалагдаж байгаа аж.
Олон төрлийн халаагуур, төхөөрөмжийг дэлгэн үзүүлснээс ХБНГУ-ын “Ultra sonic” компанийн халаагуурыг энэ удаад та бүхэндээ танилцуулж байна. Энэ компанийн халаагуурыг худалдан авснаар инженерүүд нь гэрт тань ирж суурилуулж өгөхөөс гадна 30 жилийн баталгаа өгч байгаа юм байна. Мөн энэ халаагуур нь 600 цельс дулааныг хадгалах чадвартай гэнэ. Нэг ийм халаагуур нь 25 м.кв талбайг өлхөн халаах боломжтой. Нэг халаагч нь 2.5 кватт тог ашиглах учир гэртээ 3-г суурилуулбал 7.5 кватт тог ашиглах цахилгааны утас, кабель цаанаас нь өгөх аж.
“Ultra sonic” халаагуур нь вольт, хүчин чадлаасаа шалтгаалаад 800 мянгаас нэг сая 600 мянган төгрөгийн ханштай байна. Иргэдийн амжиргаа муу байгаатай холбогдуулан Ерөнхий сайд өчигдөр энэхүү технологийн үзэсгэлэнг үзэх үеэрээ банктай холбоотой ажиллаж, зардлыг хөнгөлөх боломж, шийдлийг хайна гэсэн юм.
Гадаад харилцааны сайд Ц.Мөнх-Оргил АНУ-ын Мянганы сорилтын корпорац (МСК)-ийн Европ, Ази, Номхон далай, Латин Америкийн орнуудыг хариуцсан захирал Жонатан Брүүкс тэргүүтэй төлөөлөгчдийг өчигдөр хүлээн авч уулзав.
Оны шилдэг яруу найрагчийг тодруулдаг “Болор цом” наадам энэ жил Дорнод аймагт болно. 34 дэх удаагаа зохион байгуулагдах тус наадмыг энэ жил “Эрээнцавын эвдрээгүй яруу найрагч” хэмээн алдаршсан Данзангийн Нямсүрэн агсны 70 жилийн ойн хүрээнд болно.
Хотын төв хэсэгт Дуурийн театрын зэргэлдээ байрлах “Централ таур”-т гадаадын иргэн тэсрэх бөмбөг тавьсан гэж сүрдүүлсэн хэрэг өчигдөр орой гарсан билээ. Улмаар ойр орчмын 200 м газрыг тусгаарлан цагдаа, түргэн, үнэрч нохой гээд иргэдээ аврах бүхий л арга хэмжээг авч ажилласан. Харин сэжигтэн этгээд нь Дани хүн биш Америк хүн болох нь тогтоогджээ. Тэрээр 51 настай М хэмээх хүн байсныг цагдаагийнхан тогтоожээ. Тус хэргийг Цагдаагийн байгууллага Тагнуулын ерөнхий газарт шилжүүлсэн байна. Тус байрнаас ямар ч тэсрэх дэлбэрэх бодис олдоогүй гэнэ.
АНУ-ын 45 дахь Ерөнхийлөгчөөр сонгогдоод буй Дональд Трамп өчигдөр цахим худалдааны сайт “Alibaba” компанийн захирал Жак Матай уулзсан талаар “www.dailymail.co.uk” сайт мэдээллээ.
ОХУ-ын нийслэл Москва хотноо сүүлийн жилүүдэд болоогүй хүйтэн өвөл болж буй талаар тус улсын Цаг уурын хүрээлэнгээс мэдээлж байна.
Монголын утга зохиолын оны шилдэгүүдийг тодруулдаг “Алтан өд” наадам өчигдөр болж өндөрлөлөө. Энэхүү наадам төгсөшгүй үргэлжлэхийн бэлгэдэл болсон МЗЭ-ийн 88 жилийн ойн босгон дээр болж буйгаараа онцлог юм. Зохиолчдын хүсэн хүлээж жилийн хөдөлмөрөө үнэлүүлдэг энэ наадам бусад салбарын наадмуудын шалгаруулалтыг бодвол шударга болдог. Яагаад гэвэл уран бүтээлчдийн сэтгэлийн охиор тэжээгдсэн тэр жилийн бүтээлүүдэд нь гадны хир буртаг орох ёсгүй юм. Үе үеийн шилдэг зохиолчдын ариун шүншиг оршсон МЗЭ хэмээх энэ байгууллага ч үүргээ ухамсарлан наадмыг нэр төртэй ёстой зохион байгууллаа.
Төмөр замын вагон холбогч ажлаа хийж байгаад нас барсан хэрэг гарлаа. Энэхүү хэрэг өчигдөр “Амгалан өртөө”-ний хоёрдугаар зам дээр болжээ. Талийгаач нь Л нь 52 настай байсан бөгөөд туршлагатай холбогч байсан гэнэ. Тэрээр хүнд гэмтэл аваад эмнэлэгт хүргэгдсэн ч гэмтлээ даалгүй нас барсан байна. Мөн тус өртөөний ойролцоо 15 настай охин вагонд шүргүүлсэн мэдээллийг эх сурвалж хэллээ. Түүний биеийн байдал маш хүнд байгаа гэнэ.