Month: October 2016

“Өргөө” амаржих газрын тааз энэ сарын 5-нд нурсан. Тэгвэл тус компаны таазыг гүйцэтгэсэн “Цаст” констракшны зүгээс зураг төслийн дагуу гүйцэтгэсэн хэмээж буй. Иймд дээрх асуудлын эзэн холбогдогчийг тодруулах үүднээс Цагдаагийн байгууллагад хандсан байна.

Нийслэлийн “Өргөө” амаржих газар нь одоогоос гурван жилийн өмнө ашиглалтад орсон юм. Эмэгтэйчүүдийн мэс заслын №3 өрөөний давхар тааз нурсан учраас эмнэлгийн зүгээс үйл ажиллагаа явуулах боломжгүйд хүрсэн. Тиймээс Төлөвлөгөөт болон яаралтай мэс заслыг бүрэн зогсоожээ. Харин хагалгаанд орох өвчтөнүүд хүлээлтийн байдалтай байгаа аж.Барилгын тааз нурсантай холбогдуулан эмнэлгийн удирдлага, эмч нар мэдээлэл хийж, өргөтгөлийг гадаадын тусламжаар 7.2 сая төгрөгөөр “Цаст констракшн” компани гүйцэтгэсэн хэмээсэн юм. Өнөөдрийн байдлаар мэс засал хийх 44 сая төгрөгийн өртөгтэй унтуулгын аппарат, 23.5 сая төгрөгийн мэс заслын таазны гэрэл нийт 69.2 сая төгрөгийн бодит хохирол учирчээ.

Албан бус дүгнэлтээр мэс заслын өрөөний таазыг шаардлага хангахгүй бэхэлгээ материалаар хийсэн гэх дүгнэлт гарсан. Гэтэл гүйцэтгэгч компани болох “Цаст” констракшны зүгээс таазыг зураг төслийн дагуу хийж гүйцэтгэсэн гэх байр суурьтай байгаа юм.

Өнөөдрийн байдлаар яаралтай тусламжийн үйлчилгээг ЭХЭМҮТ-д хүлээн авч байхаар зохицуулсан байна.

Байгаль орчин, аялал жуулчлалын яамнаас Засгийн газрын 100 хоногийн хүрээнд хийж хэрэгжүүлсэн ажлынхаа талаар танилцуулжээ.

Энэ хугацаанд тус яам дараах ажлуудыг хийсэн байна.

-Монгол Парисын хэлэлцээрт нэгдэн орсон,

–Орхон гол, Ганга нуурыг аврах чиглэлд тодорхой ажлуудыг хийж эхэлсэн,

-Нүүдлийн аялал жуулчлалыг хөгжүүлэх бодлогын талаар хэлэлцсэн зэрэг ажлуудыг хийж гүйцэтгэжээ.

Түүнчлэн манай улс 2030 он гэхэд уур амьсгалын өөрчлөлтийн гол шалтгаан болсон хүлэмжийн хийн ялгарлыг 14 хувиар бууруулах зорилго тавин ажиллаж байгаа юм байна.

БОНХАЖ-ын сайд Д.Оюунхорол агаарын бохирдлыг бууруулах санг эргэн сэргээх төлөвлөгөөтэй байгаа бөгөөд түүнд нийт 5 тэрбум төгрөг төсөвлөхөөр болсноо мэдэгджээ.

Дашрамд, Орхон голын ойр орчимд ашиглалт олборлолт явуулдаг уул уурхайн компаниудын үйл ажиллагааг зогсоох арга хэмжээг авахаар болсон байна.

Нийслэлийн Засаг даргын Дэд бүтэц, гэр хорооллын хөгжлийн асуудал хариуцсан орлогч П.Баярхүү Дэлхийн банкны Хотын нийтийн тээврийн мэргэжилтэн Яанг Чен болон холбогдох албаны хүмүүсийг хүлээн авч уулзлаа. Уулзалтаар Улаанбаатар хотын төлөвлөлт, нийтийн тээврийн ухаалаг үйлчилгээ чанарыг дээшлүүлэх тал дээр хэрхэн ажиллаж нийтийн тээврийн салбарын ажилчдын мэдлэг чадварыг дээшлүүлэх чиглэлээр санал солилцлоо. Дэлхийн банкны нийтийн тээврийн мэргэжилтэн Яанг Чен “Бид танай хотын тээврийн асуудалтай холбоотой тулгамдаад байгаа хэд хэдэн асуудал дээр хамтран ажиллаж өөрсдийн туршлага мэдлэгээ хуваалцаж дэмжин ажиллах саналтай байна. Манай баг сүүлийн гурван жил Улаанбаатар хоттой хамтран ажиллаж хэд хэдэн төслийг амжилттай хэрэгжүүлээд байгаа. Дэлхийн банк нь дан ганц санхүүжүүлэхээс гадна тус салбарын ажилтан, мэргэжилтнүүдийн чадавхыг дээшлүүлэх сургалт зохион байгуулж өөрсдийн төслийн үр дүнг сайжруулах тал дээр байнга анхааран ажилладаг. Дэлхий ихэнх улсууд нийтийн тээврийн үйлчилгээний талаарх мэдээллийг ил тод нээлттэй тавьдаг болсон. Энэ нь нийтийн тээврийн ажилчид болон зорчигч, иргэдэд нийтийн тээврийн үйлчилгээг ойртуулж илүү хялбар болгож өгдөг. Бид энэ үйлчилгээг Улаанбаатарт нэвтрүүлэх бүрэн боломжтой гэж үзэж байна. Эхний ээлжид 300 мянган ам долларын хөрөнгө оруулалт шийдээд байна. Энэ танай улсад буцалтгүй тусламж хэлбэрээр үлдэнэ гэлээ.

Засаг даргын орлогч П.Баярхүү “Нийтийн тээврийн салбарт олон олон төслүүдийг бид судлан үзэж байна. Мөн нийтийн тээврийн асуудал гэдэг нь дан ганц автобусаар зогсохгүй такси үйлчилгээ ч орж байгаа юм. Бид автобус, таксины үйлчилгээг сайжруулах иргэдэд ая тухтай зорчих боломжийг бүрдүүлж өгөхийн тулд анхааран ажиллах хэрэгтэй байна. Олон улсын байгууллагуудтай бид хамтран ажиллах сонирхолтой байдаг. Учир нь хөндлөнгөөс манай нийтийн тээврийн салбарт шинэ санаа, шийдэл, шинэчлэл, боломжуудыг харж дүгнэж Монголд суурьшиж болох оновчтой шийдвэр гаргахад илүү хялбар болох байх гэж найдаж байгаа юм. Та бүхний хийж хэрэгжүүлэх төслийн үр дүн, ажлын зорилгоо тодорхой болгож байж ажлаа эхлүүлэх нь зүйтэй. Энэ уулзалтыг санал солилцох төдий бус тодорхой ажил болгон хэрэгжүүлж үр дүнг нь хүртэх хэрэгтэй гэж бодож байна” гэлээ гэж Нийслэлийн ЗДТГ-ийн Хэвлэл мэдээлэл, олон нийттэй харилцах хэлтсээс мэдээллээ.

Зам тээврийн хөгжлийн яамнаас тээврийн хэрэгслийн улсын дугаарыг цэгцлэхээр болжээ.

Учир нь замын хөдөлгөөнд оролцож байгаа машины улсын дугаарыг стандартын дагуу хэвлээгүйгээс болж, зөрчил гаргасан хүмүүсийг илрүүлэх боломжгүй болсон аж.

Автомашины улсын дугаар үйлдвэрлэдэг 20 гаруй үйлдвэрт дугаарыг стандартын дагуу чанартай үйлдвэрлэл эрхлэх шаардлага тавьсан байна. Мөн цифрийг буруу байрлуулах, тоог нь том жижиг хэвлэх, серид бичигдэж буй үсгийг өөр өөр шрифтээр бичих зэрэг алдаа гарсаар байгаа юм. Тиймээс улсын дугаар үйлдвэрлэдэг газруудад хяналт шалгалт хийж, алдаатай дугаар үйлдвэрлэж буй үйлдвэрүүдийг хаах хүртэл арга хэмжээ авах юм байна.

Гадны 142 иргэнийг Монголоос гарахыг хориглосон шийдвэр байдаг

Гадаадын 15 орны 142 иргэнийг Монголоос гарахыг түдгэлзүүлэх тухай 94 удаагийн шийдвэрийг гаргасан байна. Энэхүү шийдвэрийг Гадаадын иргэний эрх зүйн байдлын тухай хуулийн 34 дүгээр зүйлд зааснаар холбогдох байгууллагын саналыг үндэслэн гаргажээ.

Энэ онд тавигдсан хоригоос өнөөдрийн байдлаар гадаадын есөн орны 88 иргэний хориг хүчинтэй байгаа аж. Тэднээс хамгийн олон буюу 57 нь БНХАУ-ын иргэн бол БНСУ-ын 11, ОХУ-ын 10, БНСВУ-ын 5 иргэнийг Монгол Улсаас гарахыг хоригложээ.

Загас агнах зөвшөөрлийг цахимаар авч болдог болжээ. Тодруулбал,www.ezagas.mn хуудсанд хандан авах боломжтой юм байна. IOS болон Android үйлдлийн системтэй гар утастай хүмүүс тус сайт руу ороод апликейшнийг үнэгүй татаж авч болно.

Энэхүү боломжийг Дэлхийн байгаль хамгаалах сангийн Монгол дахь хөтөлбөрийн газрын санаачилгаар Байгаль орчин, аялал жуулчлалын яам, Хэнтий аймгийн БОАЖГ, тус аймгийн Дадал, Норовлин, Баян-Адрага, Биндэр, Батширээт сумдын Засаг даргын Тамгын газар, Онон голын загас агнуурын бүс нутгийн менежментийг хариуцагч “Онон голын загасчдын клуб” хамтран туршилтаар хэрэгжүүлж эхэлсэн байна. Одоогийн байдлаар зөвхөн Хэнтий аймгийн нутаг дахь Онон голд туршиж байгаа аж. Хэрвээ амжилттай болбол улс орон даяар хэрэгжүүлэх юм байна. Туршилтын шатанд явагдаж байгаа тул хэрэглэгчид санал хүсэлтээ чөлөөтэй илэрхийлж, туршлага солилцох боломжтой аж.

Нэг зөвшөөрөл нь 3 хоногийн хугацаанд хүчинтэй, 10 ширхгээс илүүгүй загас барих эрх олгоно. Харин барьсан загасныхаа биомониторингийн мэдээллийг заавал оруулах ёстой. Учир нь, таны оруулсан мэдээлэл цаашид загасны зүй зохистой ашиглалтын хэмжээг тогтооход ач холбогдолтой суурь мэдээллийг бүрдүүлэхэд нэмэр болох юм.