Үндэсний оношилгоо, эмчилгээний төвийн барилгын шав тавих ёслол Улсын хоёрдугаар төв эмнэлгийн хашаанд болж, Монгол Улсын Ерөнхий сайд Ч.Сайханбилэг, Эрүүл мэнд, спортын сайд С.Ламбаа, Ерөнхий сайдын зөвлөх Б.Ургамалцэцэг, Бүгд Найрамдах Солонгос Улсын Элчин сайд У Сун болон эмнэлгийн ажилтан, албан хаагчид оролцлоо.
Шинэчлэлийн болон шийдлийн Засгийн газрын 2012-2016 оны “ЭРҮҮЛ МОНГОЛ ХҮН” хөтөлбөрийн гол цөм нь Эрүүл мэндийн салбарт техник технологийн шинэчлэл хийх зорилт юм. Энэ зорилтыг хэрэгжүүлэхийн тулд өнөөдрийг хүртэлх хугацаанд эмчилгээ оношилгоонд орчин үеийн дэвшилтэт техник, технологийг нэвтрүүлэхэд анхаарч ажиллалаа. Үүний үр дүнд 11 аймгийн нэгдсэн эмнэлэг, бүсийн оношилгооны төвд 23 тэрбум төгрөгийн хөрөнгө оруулалтаар өндөр хүчин чадалтай тоног төхөөрөмж бүхий оношилгооны төв байгуулсан гэж Ерөнхий сайд Ч.Сайханбилэг тэмдэглэсэн юм.
Мөн Япон улсын 130 гаруй тэрбум төгрөгийн буцалтгүй тусламжаар барих Анагаахын шинжлэх ухааны үндэсний их сургуулийн нэгдсэн эмнэлгийн бүтээн байгуулалтын ажлыг саяхан эхлүүлсэн. Австрийн Засгийн газрын 28 сая еврогийн хөнгөлөлттэй зээлээр Улсын нэгдүгээр төв эмнэлэг, Хавдар судлалын үндэсний төв, Эх хүүхдийн эрүүл мэндийн үндэсний төв, Цэргийн нэгдсэн эмнэлгүүдэд хамгийн сүүлийн үеийн оношилгоо эмчилгээний тоног төхөөрөмжийг нийлүүлсэн. Эрдэнэт уулын баяжуулах үйлдвэрийн 70 гаруй тэрбум төгрөгийн хөрөнгө оруулалтаар баригдаж Японы менежмэнтээр ажиллах “МЕДИПАС” оношилгооны төв сарын өмнө ашиглалтад орж нээлтээ хийсэн. Долоо хоногийн өмнө Белгийн Засгийн газрын хөнгөлөлттэй зээлээр Ховд аймаг дахь Бүсийн оношилгоо эмчилгээний төвд 6.5 сая еврогийн тоног төхөөрөмж нийлүүлэх төслийн баг ажилдаа орлоо. Хувийн хэвшлийн байгууллагуудын санаачилга, хөрөнгө оруулалтаар “Грандмед”, “Интермед” зэрэг томоохон эмнэлгүүд сүндэрлэн бослоо гэдгийг Ерөнхий сайд дурдаад Үндэсний оношилгоо, эмчилгээний төвийн барилгын шав тавих ёслолд оролцож байгаадаа баяртай байгаагаа илэрхийлсэн юм.
Оношилгоо эмчилгээнд орчин үеийн өндөр хүчин чадалтай техник, технологийг нэвтрүүлэх гэсэн бидний эцсийн зорилго бол эрүүл мэндийн тусламж үйлчилгээний хүртээмж, чанарыг дээшлүүлж улмаар асар өндөр зардлаар гадаадад оношилгоо, эмчилгээ хийлгэхээр явж буй иргэдийнхээ тоог бууруулж, тэднийг эдийн засгийн бэрхшээлээс гаргахад оршиж байгаа юм гэдгийг тэрээр онцолж байв.
БНСУ-ын 110 гаруй тэрбум төгрөгийн хөнгөлөлттөй зээлээр баригдах олон улсын стандартад нийцсэн барилга байгууламж бүхий өндөр хүчин чадалтай 233 нэр төрлийн тоног төхөөрөмжөөр тоноглогдсон энэхүү оношилгоо, эмчилгээний төв хэд хэдэн давуу талтай юм. Нэгдүгээрт,Монгол Улсад анх удаа эмнэлгийн зориулалттай цөмийн шугаман хурдасгуур буюу изотопын бэсрэг үйлдвэрийг энэ төвд байгуулж, оношилгооны FIT ситиг суурилуулна. Ингэснээр иргэд оношилгоогоо баталгаажуулахаар гадаад улсыг зорих шаардлагагүй болно. Хоёрдугаарт, “Үндэсний оношилгоо, эмчилгээний төв”-д эмнэлгийн мэдээллийн систем суурилуулж, зайн оношилгооны нэгдсэн тогтолцоог бүрдүүлж, төрөлжсөн мэргэжлийн болон нэгдсэн эмнэлгүүдтэй холбоно. Гуравдугаарт, зайн оношилгооны тусгай зориулалт бүхий төхөөрөмжөөр тоноглогдсон авто машинуудаар алслагдсан сум суурины иргэдэд хурдан шуурхай эмнэлгийн тусламж, үйлчилгээ үзүүлэх боломж бүрдэнэ. Дөрөвдүгээрт, тус төвд ажиллах эмч сувилагч, инженер техникийн ажилтнуудыг Бүгд Найрамдах Солонгос Улс болон Монгол Улсад сургалтад хамруулж мэргэшүүлнэ гэлээ.
Энэхүү бүтээн байгуулалтад олон байгууллага, хамт олны хүч хөдөлмөр шингэх бөгөөд богино хугацааны дотор чанартай гүйцэтгэж ашиглалтад оруулна гэдэгт итгэлтэй байгаагаа Ерөнхий сайд илэрхийллээ гэж Засгийн газрын Хэвлэл мэдээлэл, олон нийттэй харилцах албанаас мэдээллээ.
“Найрсаг Улаанбаатар” хөтөлбөрийн хүрээнд аялал жуулчлалын чиглэлээр үйл ажиллагаа явуулдаг албан байгууллага болон иргэдийн бизнес уулзалт “Улаанбаатар” чуулгын байранд өнөөдөр болж байна. Тус уулзалтаар аялал жуулчлалын улирал эхэлж буйтай холбоотой Нийслэлийн Засаг даргын Тамгын газраас шинээр хэрэгжих төслүүдийн талаар мэдээлэл өгч, аялал жуулчлал, соёл урлагийн арга хэмжээнүүдийг танилцуулсан юм.
Жүдо бөхийн олимпийн
Монгол Улсын Ерөнхийлөгчийн зарлигаар томилогдсон Шүүхийн ерөнхий зөвлөлийн шинэ бүрэлдэхүүн анхны хуралдаанаа хийж, гурван асуудал хэлэлцэн шийдвэрлэлээ. Шүүхийн ерөнхий зөвлөлийн даргыг томилуулах тухай саналыг Монгол Улсын Ерөнхийлөгчид өргөн мэдүүлэх, шүүгч, ерөнхий шүүгчийн бүрэн эрхийг түдгэлзүүлэх тухай саналыг Монгол Улсын Ерөнхийлөгчид өргөн мэдүүлэх, Шүүхийн мэргэшлийн хорооны гишүүнээс чөлөөлөх тухай асуудлуудыг тус тус хэлэлцэн шийдвэрлэсний дотор Шүүхийн ерөнхий зөвлөлийн даргаар философийн ухааны доктор, хууль зүйн шинжлэх ухааны доктор, профессор Нанзаддоржийн Лүндэндоржийг гишүүдийн 100 хувийн саналаар томилуулахаар Монгол Улсын Ерөнхийлөгчид өргөн мэдүүлэхээр тогтлоо.
Хөх тэнгэрийн гудамжны авто замын зорчих хэсгийг засварлах ажил эхлээд байна. “Наранбулаг Хан” ХХК уг ажлыг гүйцэтгэж буй бөгөөд Токиогийн гудамж, Сансарын ШТС-аас урагш, Залуучуудын гудамж хүртэл 623 метр авто замыг энэ сарын 27-ны өдрийн 22:00 цагаас 30-ны өдрийн 06:00 цаг хүртэл бүрэн хааж суурь болон өнгө асфальт бетон хучилт хийх аж.
Монголын залуучуудын холбоо, нийслэлийн Хөдөлмөрийн газар хамтран “Төгсөгч-2016” хөдөлмөрийн яармагийг зохион байгуулж байна. Энэ хүрээнд Монголын залуучуудын холбоонд өнөөдрөөс залуусыг 700 ажлын байранд бүртгэж эхэллээ.
УИХ-аас өнгөрсөн оны арванхоёрдугаар сарын 3-ны өдөр Иргэний хуульд нэмэлт, өөрчлөлт оруулж, хуулийг шинэчлэн баталсан билээ. Энэ хууль ирэх есдүгээр сарын 1-нээс Эрүүгийн шинэтгэлийн хуулийн хамтаар хэрэгжиж эхэлнэ. Шинэчлэгдэн батлагдсан Иргэний хуулийн 281 дүгээр зүйлийн хоёр дахь хэсэгт “Мөнгө буюу эд хөрөнгийг зээлдэгчид шилжүүлэн өгснөөр зээлийн гэрээ байгуулагдсанд тооцно”, гурав дахь хэсэгт “Зээлийн гэрээ нь хариу төлбөргүй байна” гэсэн заалтыг нэмэлтээр оруулсан нь иргэд хоорондоо хүүтэй мөнгө зээлэхийг хориглосон юм. Энэхүү хуулийн заалт нь зээл олгох эрх бүхий хуулийн этгээдэд давуу эрх олгож, иргэний эрх зүйн харилцаанд оролцогчдын эрх тэгш, бие даасан байдал, өмчийн халдашгүй байдал, гэрээний эрх чөлөөнд харшлан Үндсэн хуулийн холбогдох заалтыг зөрчсөн гэж үзэн иргэн Р.Очирбал, н.Монгол нар Үндсэн хуулийн Цэцэд гомдол гаргасан юм.
УИХ-ын сонгуульд өрсөлдөх ИЗНН-ын гурван гишүүн АН-д элсэн, гишүүний батлахаа өнөөдөр гардан авлаа. Тэд АН-ын дарга З.Энхболдоос тус намын батлахыг авчээ. Тодруулбал, УИХ-ын гишүүн С.Дэмбэрэл болон Ч.Базар, Р.Булгамаа нар юм. ИЗНН сонгуульд өрсөлдөхгүй учраас дээрх гурван гишүүн намын гишүүнчлэлээсээ татгалзан АН-д элсэж, тус намаас нэр дэвших гэнэ.
Монголын хуульчдын холбооны гишүүд ирэх Баасан гаригт “Иргэдэд тусалъя” нэртэй хууль зүйн үнэ төлбөргүй зөвлөгөө өгөх өдөрлөг зохиох гэж байна. Энэ талаар өнөөдөр мэдээлэл хийлээ.