Month: May 2016

БОНХАЖЯ-ны Газар зохион байгуулалт болон усны нэгдсэн бодлого зохицуулалтын газар, Ногоон хөгжлийн бодлого, стратеги төлөвлөлтийн газраас энэ сарын 25-28-ны өдрүүдэд “Ус- тогтвортой хөгжлийн түлхүүр” сэдэвт чуулга уулзалтыг яамны харъяа 21 сав газрын захиргаадын ажилтан, албан хаагчид, хэрэгжүүлэгч төсөл хөтөлбөрийн удирдлага, мэргэжилтнүүдийн дунд байгууллаа.

Сургалтаар УИХ-аас 2012 оны тавдугаар сарын 17-ны өдөр шинэчлэн баталсан Байгаль орчны багц хууль, УННМ-ийн төлөвлөгөө боловсруулах аргачлал, судалгааг хэрхэн хийх, төлөвлөгөөний хэрэгжилтийг хангах, усны болон бусад хууль тогтомж, түүнийг хэрэгжүүлэх нэгдсэн ойлголтыг бий болгох. Усны нөөцийн нэгдсэн менежментийн хэрэгжилт, талуудын оролцоог нэмэгдүүлэх, цаашдын усны нөөц, хэрэглээ, ашиглалт, хэтийн төлөв болон тулгамдаж буй асуудлыг тодорхойлж хэрэгжүүлэх. Мөн сав газруудын хамтын ажиллагааны уялдаа холбоог сайжруулах, цаашид улс орны тогтвортой хөгжлийг хангахын тулд усны талаар төрөөс авч хэрэгжүүлэх шаардлагатай арга хэмжээг тодорхойлоход оршиж байна.

• Дэлхийн улс орнуудын усны менежментийн шилдэг туршлага дээр үндэслэн боловсруулагдсан Монгол орны Усны нөөцийн нэгдсэн менежментийн үзэл баримтлалыг усны сав газруудад хэрэгжүүлэхэд Усны тухай болон бусад хуулиуд, Ус үндэсний хөтөлбөрт хэрхэн тодорхойлсон талаар нэгдсэн ойлголт,
• Тогтвортой хөгжлийн зорилт, Монгол улсын ногоон хөгжлийн бодлого, үйл ажиллагааны төлөвлөгөө, ногоон эдийн засгийн үзүүлэлт, ногоон эдийн засгийн хөшүүрэг, арга хэрэгсэл, эдийн засгийн гол салбаруудыг байгаль орчинд ээлтэй “ногоон” болгох арга зам, тогтвортой хэрэглээ, амьдралын хэв маяг болон тогтвортой хөгжлийн боловсролын талаарх асуудал,
• Улсын усны мэдээллийн сангийн танилцуулга хийх, мэдээллийн санг түшиглэж орон нутгийн төвшинд ногоон хөгжлийн загвар боловсруулахад усны үнэ цэнэ, тоо баримтыг түлхүүр болгож ашиглах,
• Усны аюулгүй байдлын үнэлгээний талаарх асуудал гэсэн үндсэн дөрвөн хэсгээс бүрдсэн юм.

Мөн энэ үеэр “Азийн аманзонка-Амар мөрөн” баримтат шинэ киноны нээлтийг хийсэн. Энэхүү баримтат кино, уран бүтээл нь Монгол орны байгалийн үзэсгэлэнт газар нутаг, уул ус, гол мөрөн, биологийн төрөл зүйл, байгалийн нөөцийн тогтвортой ашиглалт, уур амьсгалын өөрчлөлтийн нөлөө, хүн байгальтай шүтлэлцэн амьдрах талаар олон нийтэд танин мэдэхүйн чиглэлээр мэдээлэл өгөх, тогтвортой хөгжлийн боловсролд үнэтэй хувь нэмэр оруулах, усны үнэ цэнийг ойлгуулах сургалт, сурталчилгаанд ашиглах, мэдлэгийг түгээн дэлгэрүүлэхэд чухал ач холбогдолтой кино болсон юм.

Сургалтад нийт 250 гаруй хүн хамрагдаж сав газрын мэргэжилтнүүдийн чадавх, мэдлэг дээшилж гэрчилгээгээ гардан авлаа.

Олон улсын хүүхдийн эрхийг хамгаалах өдрийн хүрээнд Богд хааны ордон музейн зүгээс “Хүүхдэд ээлтэй музей” хөтөлбөрийг зохион байгуулахаар төлөвлөн ажиллаж байгаа юм байна. Уг хөтөлбөрийн хүрээнд хүүхдэд зориулсан музейн боловсролын ажил болон сайн үйлсийн аянг зохион байгуулах аж.

Сайн үйлсийн аянд нэгдэх хүмүүс музей үзэхдээ хүүхдийн тоглоом болон ном, CD зэрэг зүйлсийг хандивласнаар Богд хааны ордон музейг үнэ төлбөргүй үзэх боломжтой юм. Тавдугаар сарын 31, зургадугаар сарын 1-ний өдрүүдэд хандиваар цугларсан зүйлсийг хүүхдийн төв, асрамжийн газруудад бэлэг болгон тараах юм байна. Түүнчлэн сонирхолтой тэмцээн, олон төрлийн бүтээлч үйл ажиллагаа явагдах юм байна.

Нийслэлийн мэргэжлийн хяналтын газрын Цөмийн болон цацрагийн хяналтын хэлтсээс Япон улсаас импортлон борлуулж буй автомашинуудад цацрагийн хэмжилт хийж эхэлжээ. Учир нь манай иргэд ОХУ-ын хилээр өөрийн эзэмшлийн авто машинаар нэвтэрч байгаа бөгөөд заримаас нь цацрагийн бохирдол илэрч байгаа аж.

Үүнтэй холбогдуулан дээрх хяналтыг тавьж эхэлсэн бөгөөд Япон улсаас автомашин импортлохдоо цацрагийн бохирдлын хэмжилт, цацрагийн гэрчилгээтэй авто машиныг сонгон худалдан авахыг анхаарууллаа. Цацрагийн бохирдолтой авто машин оруулж ирэх нь хэрэглэгчийн эрүүл, аюулгүй орчинд амьдрах нөхцөлийг алдагдуулж болзошгүй бөгөөд төрийн байгууллагуудын үйл ажиллагаанд хүндрэл учруулж, бизнес эрхлэгчдэд үр ашиггүй зардал гарч буйг албаныхан мэдээлжээ.

Өчигдөр буюу энэ сарын 26-ны орой “Мунзуй” хочит Г.Нямдоржийг УМБГ-ын Зохион байгуулалттай гэмт хэрэгтэй тэмцэх хэлтсээс баривчилжээ. Түүнийг Баянгол дүүргийн нутаг дэвсгэр, гуравдугаар хороололд байрладаг “Rich Hill” зочид буудалд бусдыг барьцаалан мөнгө дээрэмдэж байхад нь үйлдэл дээр нь баривчилсан аж.

Цагдаагийн байгууллагын эх сурвалжийн мэдээлж байгаагаар Г.Нямдорж нь Т гэх иргэнийг “Rich Hill” зочид буудалд 10 хоногийн турш хорьж, нохойгоор уруулахыг завдаж, хоёр сая орчим юань шилжүүлэн авсан байжээ.

Барьцаалагдсан иргэн Т-ийн эхнэр А “Нийтийн эрхийг хамгаалах холбоо”-ны хуульч, өмгөөлөгч Г.Батбаярт хандаж тусламж хүссэнээр Г.Нямдоржийн үйлдлийг хуулийн байгууллага ийнхүү үйлдэл дээр нь таслан зогсоожээ.

“Guys” хамтлагийн дуучин Х.Бат-Ундрал Замын-Үүдийн гаалиар их хэмжээний хар тамхи оруулж ирэх гэж байгаад тагнуулынханд баривчлагдсан билээ. Түүнийг энэ сарын 24-ний өдөр саатуулсан бөгөөд ШШГЕГ-ын харьяа урьдчилан хорих 461-р ангид саатуулан эрүүгийн хэрэг үүсгэн шалгаж байна.

Өмнөговь аймгийн төвөөс улсын нийслэлтэй холбогдсон замын шар тээгийн уулзвараас Цогтцэций сум хүрэх 59,6 км авто замын ажлыг өчигдрөөс эхлүүллээ. Тус замыг концессын гэрээгээр байгуулж буйгаараа өмнөговьчуудад ашигтай болж байгааг онцолж байлаа. Цогтцэций, Даланзадгадыг холбосон замыг 2017 оны аравдугаар сарын 30 гэхэд дуусгаж хүлээлгэн өгөх юм байна

Монгол Улсын Засгийн газрын 2015 оны 200 дугаар тогтоолоор Хөвсгөл аймгийн Тариалан суманд Гал түймэр унтраах, аврах 46 дугаар ангийг байгуулсан. Шинээр байгуулагдаж байгаа Гал түймэр унтраах, аврах ангид ажиллах бие бүрэлдэхүүнийг сонгон шалгаруулж, сургаж дадлагажуулах ажлыг зохион байгуулан Тариалан сумаас найм, бусад сумдаас 16 иргэн мэргэжлийн анхан шатны сургалтад хамрагдаж ажилдаа томилогдон ажиллаж байна.

Ангийн нээлтийн арга хэмжээнд ОБЕГ-ын дарга, бригадын генерал Т.Бадрал, Хөвсгөл аймгийн Засаг А.Эрдэнэбаатар, Тариалан сумын засаг дарга Ц.Хөвсгөлдалай, Онцгой байдлын газрын дарга, онцгой байдлын хурандаа Г.Нэргүй нар оролцлоо. Шинээр Гал түймэр унтраах, аврах анги байгуулагдсанаар Тариалан сумын ард иргэдийг болзошгүй аюул, ослоос авран хамгаалаад зогсохгүй нутгийн зүүн хэсгийн сумдыг ой, хээрийн түймрээс урьдчилан сэргийлэх, гамшгаас хамгаалах төрийн үйлчилгээг иргэдэд шуурхай хүргэх боломж бүрдэж байгаа юм.

Мөн тус ангид ажиллах 39 албан хаагчийн 90 хүртэлх хувь нь Тариалан сумын иргэд томилогдон ажиллаж байгаа нь орон нутагт ажлын байр нэмэгдэж байгаа давуу талтай. Гал түймэр унтраах, аврах 46 дугаар ангийн үйл ажиллагааг одоогоор түр байранд эхлүүлсэн бөгөөд зориулалтын галын депо барих төсвийн асуудлыг 2017 оны улсын төсөвт суулгах юм.