Монголын хамгийн анхны клип, рекламыг анх гаргаж байсан гэдгээр нь “On’n Off” продакшныг рок попын төдийгүй урлаг сонирхогчид андахгүй сайн мэднэ. Тэгвэл тус продакшн өөрсдийн 20 жилийн ойгоо удахгүй хийх нь ээ.
Тэдний 20 жилийн ой арванэгдүгээр сарын 29-нд 17.00 цагт Соёлын төв өргөөнд 20 жилийн ойн баяраа нижгэр тэмдэглэхээр зэхжээ. Тэдний ойн баярын тоглолтонд Юнескогийн биет бус соёлын өвд бүртгэлтэй монголын язгуур урлагийн дээжис, орчин үеийн болон сонгодог урлагийн шилдэг төлөөлөл оролцон тоглох аж.
Ойн тоглолтонд Төрийн хошой соёрхолт хөгжмийн зохиолч Н.Жанцанноров, Хөгжмийн зохиолч, Төрийн шагналт, Урлагийн гавьяат зүтгэлтэн Б.Шарав, Ц.Намсрайжавын нэрэмжит Улсын филармони, Дуу бүжгийн эрдмийн чуулгын бүжигчид, Монгол Улсын Морин хуурын чуулга, Бүх цэргийн дуу бүжгийн эрдмийн чуулгын найрал дуучид, Үлгэр жишээ үлээвэр найрал хөгжим, “Харанга”, “Инээмсэглэл”, “Камертон” хамтлагууд, Урлагийн гавьяат зүтгэлтэн Б.Батчулуун, Гавьяат жүжигчин, Дуурь бүжгийн эрдмийн театрын гоцлол дуучин Э.Амартүвшин, Ө.Уянга, Урлагийн гавьяат зүтгэлтэн, хийлч Ч.Чинбат, Ардын жүжигчин, морин хуурч Ч.Батсайхан, Төрийн соёрхолт, дуучин Д.Болд, Гавьяат жүжигчин, поп дива Б.Сарантуяа, Т.Ариунаа, хийлч Ч.Дэлгэрцэцэг, төгөлдөр хуурч, хөгжмийн зохиолч Б.Чинбат, дуучин С.Наран зэрэг уран бүтээлчид оролцон тоглоно.
Эдийн засгийн хямралыг давахын тулд үндэсний үйлдвэрлэлээ хөгжүүлэх, тэднийг дэмжих бодлогыг төр засгаас хэрэгжүүлж байгаа. Үүний хүрээнд Үндэсний үйлдвэрлэлийн худалдааны төв ирэх арванхоёрдугаар сард үүдээ нээхээр болжээ. Өөрөөр хэлбэл, “Нарантуул” захын ойролцоо байдаг “Шөнийн зах”-ыг үндэсний үйлдвэрлэлийн худалдааны төв болгон өөрчлөх юм байна. Одоогоор 50 гаруй аж ахуйн нэгж, үйлдвэрүүд гэрээгээ хийгээд байгаа аж.
Машинаа хараа хяналтгүй газар удаан орхисноос үүдэн эд зүйлсээ алдах тохиолдол буурахгүй байгаа юм. Тухайлбал, Баянзүрх дүүргийн 30-р байрны гадна тавьсан автомашинд хулгайч орсон байна гэсэн мэдээллийг цагдаагийн байгууллага хүлээн авч шалгахад, тус байрны иргэн М-ийн эзэмшлийн Bighorn маркийн автомашины зөв талын хаалганы жижиг шилийг хагалж, эд зүйлсийг нь хулгайлж байсныг газар дээр нь илрүүлсэн байна. 
Япон улсын “Nihon Kohden” корпораци, Монгол улс дахь албан ёсны төлөөлөгч Си-Ай-Ти ХХК хамтран энэ сарын 21-ний өдөр Хавдар судлалын үндэсний төвийн эрчимт эмчилгээний тасагт нийт 300 сая төгрөгийн үнэтэй, өндөр хүчин чадал бүхий хяналтын мониторууд бэлэглэжээ. Энэ үеэр Эрүүл мэндийн дэд сайд Ж.Амарсанаа, Япон улсын ЭСЯ-ын эрүүл мэндийн зөвлөх Ш.Токүмото нар баяр хүргэж үг хэлсэн байна. 
БНСУ-ын Чежү хотноо боксын эмэгтэйчүүдийн дэлхийн аварга шалгаруулах найм дахь удаагийн тэмцээн болж өчигдөр өндөрлөлөө. ДАШТ-д 67 орны 280 гаруй эмэгтэй боксчин өрсөлдөж аваргуудаа тодруулжээ. 
АНУ-ын Кливленд хотод тоглоомын талбайд тоглоомон буу барин гарч ирсэн 12 настай хүүг цагдаа буудан, аминд нь хүрчээ. Хоёр цагдаа хэргийн газарт очин, гараа өргөх тушаалыг биелүүлээгүй хүүг цагдаагийн нэг албан хаагч хоёр удаа буудсан байна. “Нэг хүү буугаар хүмүүсийг айлгаж байсан. Гэхдээ жинхэнэ буу эсэхийг мэдээгүй” гэж хэргийн газарт байсан эх сурвалж мэдээлжээ. Хүү рүү буудсан хоёр цагдаагийн нэг нь тус хотод анхны жилээ ажиллаж байгаа бол, нөгөө нь 10 гаруй жил ажилласан албан хаагч гэнэ.
Монголбанк өнөөдөр болсон гадаад валютын дуудлага худалдаагаар арилжааны банкуудаас ирүүлсэн саналуудыг үндэслэн 1891.10 төгрөгийн хаалтын ханшаар 16.0 сая ам.доллар, 308.10 төгрөгийн хаалтын ханшаар 49.0 сая юань тус тус худалдлаа.
Сэлэнгэ аймгийн Сайхан сумын Цагдаагийн хэсгийн эрүүгийн төлөөлөгчөөр ажиллаж байсан Ц.Ууганжаргал энэ оны нэгдүгээр сард согтуугаар машин жолоодож яваад замын хажуугаар явж байсан иргэн М-ыг дайрч, амь насыг нь хохироож хэргийн газраас зугтсан билээ. Хэргийг шалгаад хэрэгтэнд гурван жил, нэг сар хорих ял оноосон. Харин тэрбээр уг ялыг эсэргүүцэн давж заалдсан бөгөөд өчигдөр Давж заалдах шатны IX шүүх хэлэлцэн анхан шатны шүүхээс оноосон ялыг хэвээр үлдээжээ. 
“Монгол хурандаа” нийгэмлэг ТББ-аас санаачлан анх удаа хурандаа нарын анхдугаар нэгдсэн чуулганыг зохион байгуулахаар болжээ. Чуулганд Зэвсэгт хүчин, Тагнуул, Цагдаа, Шүүхийн шийдвэр гүйцэтгэх байгууллага, Шүүхийн шинжилгээний үндэсний хүрээлэн, Авлигатай тэмцэх газар, Онцгой байдлын ерөнхий газар зэрэг цэргийн болон тусгай чиг үүрэг хэрэгжүүлэгч байгууллагад одоо ажиллаж буй болон алба хааж чөлөөндөө гарсан хурандаа, дэд хурандаа нар оролцох юм байна. 
УИХ-ын гишүүн С.Ганбаатарыг Лондон хотноо уул уурхайн салбарынхны уулзалтад оролцох үед Ерөнхий сайд томилогдсон учраас санал бодлоо илэрхийлж амжаагүй аж.