“Дэлхийн терроризмын индекс-2014”-т өнгөрсөн онд өмнөх жилийнхээс 44 хувиар өссөн буюу 10 мянга орчим террорист халдлага болсон гэж бичжээ. Терроризмд хамгийн ихээр нэрвэгдсэн улс нь Иран юм байна. Харин Монгол Улс террорист халдлага болоогүй 39 улсын тоонд багтжээ.
Олон улсын терроризмын талаарх судалгаанаас үзвэл, 2012-2013 онд дэлхий дахинд терроризмын улмаас амь үрэгдсэн хүмүүсийн тоо 61 хувиар нэмэгджээ. “Лалын улс”, “Аль-Каида”, “Боко Харам”, “Талибан” гэсэн босогчдын цэрэгжсэн дөрвөн бүлэглэлийн халдлагад олон хүний амь үрэгдсэн байна. “Эдийн засаг, энх тайвны төлөө хүрээлэн” олон улсын ашгийн бус байгууллагын мэдэгдсэнээр, 2013 онд террорист халдлагуудад 18 мянга орчим хүн амиа алджээ.
АТГ-ын Мөрдөн шалгах хэлтсээс эрүүгийн хоёр хэрэгт гурван хүнийг эрэн сурвалжилж эхэлжээ. Нэг нь төрийн бус байгууллагын албан тушаалтан эрх мэддээ урвуулан ашигласан, татвараас зайлсхийсэн, эд хөрөнгө завшсан хэрэгт холбогдсон Л.Эрдэнэбулган гэх залуу аж.
Жил бүр уламжлал болгон зохион байгуулагддаг хувцас загварын “Гоёл” наадам энэ сарын 28-нд эхлэх гэж байна. Монголын дизайнеруудын холбооноос зохион байгуулдаг тус наадам энэ жил шилдэг загвар өмсөгч, шилдэг гоо засалч, шилдэг үсчин, топ моделийг шалгаруулна. Наадмын үйл ажиллагаа загварын долоо хоногоор эхлэх бөгөөд тус арга хэмжээний үеэр Монголын шилдэг дизайнерууд өөрсдийн урласан бүтээлүүдээ нийтийн хүртээл болгох юм байна. Харин шилдэгүүдийг тодруулах гала тоглолт нь арванхоёрдугаар сарын 3-нд Соёлын төв өргөөнд болно.
“Universe best songs” наадмын шилдгийн шилдэг оролцогч, дуучин А.Хишигдалай Монгол туургатны дунд зохион байгуулдаг “Мелодия Саянских гор” олон улсын эстрадын дуулаачдын наадамд оролцож тэргүүн байр эзэлсэн байна. Тувагийн Кызыл хотод болсон уг наадамд гавъяат жүжигчин Ж.Алтанцэцэг шүүгчээр ажиллажээ. Тэрээр 2001 онд тус наадмаас “Мандах нар” дуугаараа гранпри шагнал хүртэж байсан юм.
Монгол, орос ард түмэн уламжлалт олон жилийн найрамдалт харьцаатай бөгөөд 1990-ээд оноос хойш энэ харьцаа тасарсан ч сүүлийн жилүүдэд эргэн сэргэж байна. ОХУ-д тэтгэлэгтэйгээр сурах боломж ихтэй /жилдээ 380 гаруй квот/, 2014 оны 11-р сарын 14-ээс Монгол Улс, ОХУ-ын иргэд 30 хоногийн дотор харилцан визгүй зорчих болсноор худалдаа бизнес, аялал жуулчлал болон бусад салбарын хувьд хамтын ажиллагаагаа өргөжүүлэх сайхан боломж нээгдэж байна. Тийм учраас залуучуудын хувьд орос хэл сурах хэрэгцээ улам бүр нэмэгдсээр байна: Тэгвэл залуусынхаа энэхүү хэрэгцээ шаардлагад тулгуурлан МЗХ-ны дэргэд орос хэл, соёл түгээх “Фиордализа” клуб байгуулагдаж нээлтээ хийлээ. Клубын нээлтэнд “Русский мир” сангийн захирал О.П.Максимова болон Плехановын нэрэмжит сургуулийн багш нар хүрэлцэн ирсэн юм.
Төрийн байгуулалтын байнгын хорооны дарга А.Бакей, УИХ-ын гишүүн С.Дэмбэрэл нар “Монгол Улсын Хүний Эрхийн Үндэсний Комиссын тухай хуульд нэмэлт, өөрчлөлт оруулах тухай” хуулийн төслийг УИХ-ын даргад өргөн барилаа.
Непалд зорчих тээврийн автобус осолдсоноос болж 50 орчим хүний амь үрэгджээ. Осол Непалын уулархаг Жаяркоте бүс нутагт бүр өнгөрсөн пүрэв гарагт болсон аж. Жолооч хяналтаа алдсанаас болж автобус Бери голд унажээ. 10 зорчигч амьд гарч чадсан байна. Тухайн үед 24 хүн амиа алдсан талаар мэдээлж байсан ч ням гарагт автобусыг эрэг дээр гаргасны дараа нэмж олон хүн амиа алдсан нь тодорхой болсон юм. Непалийн газар нутгийн ихэнх хэсгийг Гималайн уул нурууд эзэлдэг бөгөөд Азийн хамгийн аюултай авто замын сүлжээтэй улсын нэг. Үүнээс болж олон тооны автын осол гардаг. Тухайлбал, энэ сарын 1-нд тус улсын Макванпур тойрогт хоёр автобус осолдож, 14 хүн амиа алдаж, 20 хүн шархадсан билээ.
Гол гатлахдаа зориулалтын гарцаар зорчихыг онцгой байдлын ерөнхий газраас анхааруулж байна. 
Монгол Ардын Намын дэргэдэх Зөвлөхүүдийн танхим Тусгаар Тогтнолын ордноо хуралдаж байна. Хурлаар Монгол Ардын Нам шинэ байгуулагдах Засгийн газарт хамтрах эсэх асуудлаар хэлэлцэнэ. 
УИХ-ын гишүүн Л.Эрдэнэчимэг УИХ-ын дарга З.Энхболдод Согтууруулах ундааны хуулийн төслийг өргөн барилаа. Уг хуулийн төслийн талаарх олон нийтийн хэлэлцүүлгийг хэдэн удаа зохион байгуулсан бөгөөд стандартын шаардлага хангасан согтууруулах ундаа үйлдвэрлэх, худалдах, үйлчлэх, импортлох, экспортлох үйл ажиллагааг согтууруулах ундааны эрэлт, нийлүүлэлт, хэрэглээг хязгаарлах агуулгаар төслийг санаачилсан аж.