Month: June 2014

Categories
мэдээ спорт

Хөвсгөлийн бөхчүүд бусад аймгуудын галд тогоочоор ч хамаагүй бэлтгэлд гарах уу

Наадам хаяанд ирэх бүр ард түмэн догдолдог. Наадамд хүч үзэх бөхчүүдээ нутгийнх нь мөнгөтэй эрхмүүд тойрч байгаад л ивээн тэтгэснээ сайрхан ярьдаг билээ. Тэгвэл Хөвсгөл аймгийн Улсын харцага Г.Ганхуяг өөрийн фэйсбүүк хуудаснаа ийн бухимдлаа илэрхийлжээ. “Жил бүр наадмын өмнө бөхчүүд аймаг, дэвжээгээрээ нэгдэж наадмын бэлтгэлд гарч залуу бөхчүүдээ ёс жудаг, намба, уламжлалд сургаж, бэлтгэл багадсаных нь ачааллыг нэмэгдүүлж, бэлтгэл ихдэж ядарсныг нь амрааж асарч сувилж наадамдаа бэлдэж, наадмаараа нутаг усаа дуудуулж, зон олноо баярлуулж цол зэргээ ахиулдаг уламжлалтай. 

Энэ жил манай аймгийн бөхчүүд наадмын бэлтгэлд нэгдэж гарахааргүй боллоо. Ноднингийн Сүүж-Уул амралтанд үлдсэн өр 1 сая 600 мянган төгрөг нэхэгдээд байдаг. Хөвсгөл аймгийн нутгийн зөвлөлийн дарга Л.Энх-Амгалан тэргүүтэй хэдэн хүн эргэж ирээд дайлуулж цайлуулаад ТВ бичлэг, зурагчид дагуулж ирээд бөөн сүр болоод дугтуйтай цөөхөн мөнгө өгдөг. Дээр нь бөх тус бүрээс 200 мянган төгрөг авч цуглуулж нэмээд ч хүрэхгүй эцэст нь цолтой бөхчүүд нь хардлаганд ороод таардаг манай аймаг бүтэхгүй ээ. Тэнд хамт гардаг бусад аймгийн нутгийн зөвлөлийнхнийг харахаар бөхчүүд нь ийм амжилт гаргахаас ч яахав гэж харагддаг. Ер нь бол бүх аймгийн нутгийн зөвлөл бөхчүүдээ асуудалгүй бэлтгэлд гаргаад зохицуулаад л явж байгаа. Зохицуулах ёстой үүрэг гэдгээ ч мэддэг. Энэ жилдээ өөрөө өөрсдийнхөө бэлтгэлийг базаагаад өөр аймаг дэвжээнд туслах тогооч ч гэсэн хийж байгаад наадмаар амжилт гаргаарай манай залуучууд. Дараа жилээс сонгууль ойртоод ирэхээр буянтай хүмүүс гараад ирэх байлгүй дээ” хэмээн бичсэн юм. 

Categories
мэдээ эдийн-засаг

“Хас”-ын Ч.Ганхуягийн зөвлөгөө

Хятадын банк манайд салбараа нээж үйл ажиллагаагаа явуулах гэж байгаад МАН-ынхан дургүй байгаа. Тэгвэл МАН-ын залуу лидерүүдийн нэг болох “Хас”-ын Ганхуяг ингэж айлджээ. “Хятадын банк Монголд орж ирэх нь нэг талаар банк хоорондын өрсөлдөөнийг эрчимжүүлж, агаар мэт хэрэгтэй байгаа гадаад валютын урсгалыг нэмэгдүүлэн бизнес эрхлэгчдэд таатай нөхцөл байдлыг бий болгох замаар манай хүндрээд байгаа эдийн засагт сэргээш өгөх талтай. Манай банкуудын ч үйлчилгээ энэ нөлөөгөөр сайжирч, дунд хугацаанд үйл ажиллагаа нь чамбайрч, өрсөлдөх чадварыг нь нэмэгдүүлэх боломж харагдана. Харин дунд хугацаанд манай бүх өөдтэй, өнгөтэй бизнесүүдийг бага хүүтэй, үлэмж их хэмжээний зээлээр тэтгэснээр нэг талаас бид нэг банкны барьцаанд бүхлээрээ орж, тэдний бидэнд үзүүлэх нөлөө, шахалт ихсэж, нөгөө талаасаа манай үндэсний гэх банкууд сайн харилцагчгүй мухардмал байдалд орон бүхлээрээ унах эрсдэл бий. 

Тэр үед тэдний зүгээс хэрэглэж болох нэг аюултай арга бол яах аргагүй зөвхөн Хятадын оролцоотой, Хятад эзэнтэй, Хятад технологи ашигласан төслүүдийг дэмжиж манай үндэсний гэх тодотголтой бизнесүүдийн өрсөлдөх чадварыг сулруулж, улмаар үгүй хийх бодлого барих боломжтой. Иймд бид энэ асуудалд туйлын нухацтай, болгоомжтой хандах нь үндэсний эрх ашигт нийцнэ. Би энд заавал хориг тавих тухай санасангүй. Бид зөвшөөрөл өгвөл эдгээр хүчин зүйлсийг тооцоолж, анхнаасаа алсаа харсан зөв хязгаарлалт, нөхцөл бүхий, нарийн хяналтын дор үйл ажиллагаа явуулах тусгай зөвшөөрөл олгон ажиллулах боломжтой юм” хэмээн цахим хуудаснаа бичжээ.

Э.ЭНХ

Categories
мэдээ нийгэм

Харангын Лхагваагаас өрөөсөн хөлтэй аавдаа унуулах машин гуйжээ

Fact news.mn сайтад гарсан “ХАРАНГА”-ЫН ЛХАГВА ХҮҮТЭЙГЭЭ “ХАР САРНАЙ”-ГИЙНД ОЧЛОО гэсэн гарчигтай мэдээний доор нэг хүүхэд  машин гуйсан сэтгэгдэл үлдээжээ. Тэрбээр том болоод таны ачийг хариулна. Илүү машин байвал манай аавд өгөөч гэжээ.

“ЛХАГВАА АХАА ТАНД ИЛҮҮ 1МАШИН БАЙГАА ЮУ МИНИЙ ААВД ӨГЧ ТУСЛАНАУУ ААВ ӨРӨӨСӨН ХӨЛТЭЙ ЯВХАД ХӨЛ НЬ ӨВДӨӨД БАЙДАГ ЮМА, БИ ТОМ БОЛООД ТАНЫ АЧИЙГ ХАРИУЛЖ ЧАДНА БИ ТАНЫГ ШҮТДЭГ МИНИЙ НОМЕР 88617000 ТАНД ИТГЭЖ БАЙНА ШҮҮ” гэжээ.

Categories
мэдээ нийгэм

”Сакура” будаанаас амьд өт гарч шуугиан тарьлаа

Содон гадаад нэртэй брэндүүдийг дэлгэрүүлсэн “Агь” ХХК-ийн “Сакура”, “Слава” Япон, Орос нэртэй цагаан будаанууд оруулж ирдэг. Тус   “Сакура”, “Слава” будаагаа БНХАУ-аас оруулж ирдэг талаар өмнө нь манай сайт мэдээлэлж байсан билээ. Хятадаас оруулж ирдэг гэх “Сакура” будаанаас амьд өт гарсан талаар цахим хэвлэлээр шуугиж байна.

Categories
мэдээ улс-төр

Д.Ганхүүд холбогдох хэрэг шүүхэд шилжлээ

Эрх мэдлээ урвуулан ашиглаж, бусдаас хахууль авахыг завдсан гэх үндэслэлээр Баянгол дүүргийн Мэргэжлийн хяналтын хэлтсийн дарга Д.Ганхүүд АТГ-ын Мөрдөн шалгах хэлтсээс эрүүгийн хэрэг үүсгэн саатуулсан.  Түүнийг Баянзүрх дүүргийн нутагт үйл ажиллагаа явуулдаг “Рояал хаус” зочид буудлын болон орон сууцны барилгын цахилгааныг ХӨСҮТ-ийн цахилгаанаас нууцаар татаж, тус төвийн хоёр цахилгаанчинд хахууль өгсөн, Баянгол дүүргийн нутагт үйл ажиллагаа явуулдаг “Сайхан” төв дэх шөнийн цэнгээний газрынхнаас хахууль авсан хэрэгт буруутган шалгасан мэдээлэл бий. Түүнд холбогдох хэргийн мөрдөн байцаах ажиллагаа дуусчээ. Дүүргийн эрүүгийн хэргийн анхан шатны II шүүх гэм буруутай эсэхийг нь тогтоох учиртай ч шүүгдэгч болон түүний өмгөөлөгч нар хурлыг элдэв шалтгаан тоочин хойшлуулсаар байгаа аж.

Categories
мэдээ спорт

Уяачдын галууд хаагуур байна…?

Их монгол улсын 808, Ардын хувьсгалын 93 жилийн ой, Үндэсний их баяр наадам болоход сар хүрэхгүй хугацаа үлдээд байна. Морины хорхойтнууд маань сэтгэл догдлон наадмаа хүлээж буй… Уяачид маань буудал суудалдаа төвхнөчихсөн морьдынхоо уяа сойлгыг тааруулж байна. 25-аас давхил эхэлнэ.

Уяачдын галууд Хүй долоон худгийн Цагаан хөтөл, Төв аймгийн Сэргэлэн сум, Авдарын уул, Ээж хад, Долоон, Сүжиг, Бухан сэрүүн, Ногоон даваа орчмоор гарцгаажээ. Бага цагаан хөтлийн орчмоор Тод манлай уяач Дугараа, ААУ Т.Ихбаярын Хүй мандал гал уяа, хурдан хонгор азаргаа Их хурдад айрагдуулж, төвийн бүсэд түрүүлгэсэн Дамбын Баяраа, хурдан хүрэн үрээгээ төвийн бүсэд айрагдуулсан Батмөнхийн Шагдаржав, хурдан буурал морьтой Шаравын Мөнгөншагай нарын уяачид одоогоор бууцгаагаад байна. Максынхан тэднээс жаахан цаашлаад хуучин буудагтаа буусан гэнэ лээ. Харин урд энгэрээдээ буюу Галзуу харын худгийн урдруу МУАУ Батчулууны Ерөөлт, МУАУ Түвдэнгийн Батцоож нарын уяачид буусан байна. Долоон худгаас зүүн хойш 61-ын гармын тэрээд Алдарт уяач Гордоогийн Дорпүрэв тэргүүтэй уяачид бас бий.

Сэргэлэн сумын баруун урдруу Тод манлай уяач Ц.Дуламсүрэн, Манлай уяач Батчулууны Мөнхтөр, ААУ Сантүндэвийн Хэрлэн, Ажнай шарга гал, хурдан хар азаргатай Ч.Гансум нарын уяаныхан байгаа сурагтай. Харин замын баруун талдаа буюу Долоон, Ногоон даваа, Бухан сэрүүнээр Тод манлай уяач Д.Онон, Э.Эрдэнэчулуун, Д.Мөнхбатаа, А.Батсүх, Ц.Хэнмэдэх, Манлай уяач “дааган” Цэндээ, Дамбын Хишигжаргал, Д.Одгэрэл, Алдарт уяач Жамбалсүрэн, ААУ Саашкагийн Эрдэнэбат нарын тэргүүтэй уяачид буудалцгааж. ХХ зууны манлай хүлэгч, Хөдөлмөрийн баатар Д.Даваахүү, Д.Бат-Эрдэнэ, Д.Дагвадорж нарын уяа Ээж хадны хойд араад байгаа гэнэ. Сэргэлэн сумын хойдруу буюу Өгөөмрөөд Б.Билэгдэмбэрэл манлай, хурдан цавьдар азаргатай Ц.Энхбат нарын уяа байгаа сурагтай.

Багахангайн зүүн талруу бас олон уяачид бий… Агт-Эрдэнэ галынхан, МУАУ Ц.Цэрэнбал, С.Ганзориг, НАУ Б.Дашдорж, Б.Саранхүү, С.Шинэбаатар нар Багахангайд байгаа. Тэнд улсын наадмын өнгө тодорхойлох томоохон сунгаа болох байх. Тод манлай уяач Г.Сандуйжав, Манлай уяач Ч.Улаан, Алдарт уяач Т.Энхтайван, “дааган” Ганаа нарын тэргүүтэй уяачид Налайхын голоор бий… Улсын алдарт уяач Ажгаагийн Алтангадас мөн Налайхын баруун урдруу бий. Тод манлай уяач С.Ганхуяг, ААУ Б.Цэндбаатар, Т.Батзориг нарын “Дорнын унага” гал уяаныхан Дорнод аймагтаа уяа сойлгоо тааруулж байгаа. 

Одоо харин наашлаад Хэнтий хавьд ирэх сурагтай. ААУ Энхбатын Дашчирэв нутагтаа /Баянхутаг/ байгаа байх. Удахгүй Ажнай шарга галдаа ирж нэгдэх байх. Тод манлай уяач Б.Содномцог Сэлэнгийн Ерөөд морьдоо уяж байгаа гэсэн. Дундговийн “Тэнүүн говийн хурд” галынхан Тэргүүн хонгор тэргүүтэй хурдан хүлгүүдээ Баянцагааны баруун тал, Довын гуанзны зүүн урдруу сойж байгаа. За тэгээд сүүлийн үед хөдөө орон нутгаас олон сайн морьд ирж төрийн наадамд дээгүүр хурдалдаг болсон. Тэдгээр уяачид маань нутаг нутагтаа л морьдоо уяцгааж байгаа. Наадам дөхүүлж ирээд л “цахиур хагалцгаах” байх даа.

HIIMORI.mn Б.Ганпүрэв

эх сурвалж www.hiimori.mn

Categories
мэдээ соёл-урлаг

“Best of the best 2014” наадмын шилдгийн шилдэг өнөөдөр тодорно

Үзэгчиддээ 6 жилийн турш цэнхэр дэлгэцээр цацагдсан нэвтрүүлэг бол “Universe Best Songs”. Үе үеийн шилдгүүдийн анхдугаар наадмыг зохион байгуулж байгаа билээ. Үргэлж шинэ содон хоолойтой авьяастнууд төрөн гарсан тус наадмын шилдгийн шилдгийг өнөөдөр тодруулна.

Үзэгчдийн хүсэн хүлээсэн “Best of the best” наадмын Гала тоглолт, Гран При шагналтанг тодруулах ёслолын ажиллагаа энэ сарын 20,21-нд “UB PALACE”-т болох гэж байна.

Уг тоглолтын тасалбарын үнэ 15 мянган төгрөг бөгөөд “UBS” телевизийн байр, “UB PALACE”-ийн билетийн кассаар худалдаалагдаж байна. Мөн 16-17 утсаар захиалан үнэгүй бүртгүүлэх боломжтой сонирхсон мэдээллээ лавлах утас:19-51 утасны дугаараас авах боломжтой.

Шилдгүүдийг цугларуулсан үдэш зөвхөн цорын ганц “Гран При” шагналтанг шүүгч, үзэгчид хамтдаа тодруулна. Шилдгийн шилдгээр шалгарсан азтай авьяастан Солонгос улс болон Англи улсад хүссэн мэргэжлээрээ суралцах эрхийг гардан авна.

Categories
мэдээ соёл-урлаг

О.Ганцоож амжилттай бүжиж байна

АНУ-ын Жаксон хотод балетчидын олон улсын уралдаан болж байна. Дөрвөн жилд нэг удаа болдог балетчидын хувьд олимптой дүйцэх уг уралдаанд манай улсын ДБЭТ-ын гоцлооч О.Ганцоож оролцон бүжиж байна.

Тэрбээр эхний шатнаас шалгарсан ба хоёрдугаарт шатанд орчин үеийн бүжгээр өрсөлдөнө. Түүний хамтран бүжиглэгчээр Гавьяат жүжигчин Ч.Ганчимэг оролцож байгаа юм. 10 дахь удаагаа зохион байгуулагдаж буй уралдаанд  20 орны 92 балетчин өрсөлдөж буй аж.

Categories
мэдээ нийгэм

Хог боловсруулах үйлдвэр байгуулна

Монгол Солонгосын “Сектех”, “MH IGH-TECH” компаниуд хог шатааж хэрэглээний дулаан, цахилгаан гаргах үйлдвэрийг Хэнтий аймгийн Чингис хотод байгуулахаар аймгийн Засаг даргатай нь гэрээ байгуулжээ. Уг үйлдвэрийг байгуулахад зургаан тэрбум төгрөгийн хөрөнгө оруулалт шаардлагатай бөгөөд санхүүжилтийг төр, хувийн хэвшлийн түншлэлээр шийдэх аж.

Энэ үйлдвэрийг бага оврын цахилгаан станц гэж ойлгож болох юм байна. Учир нь энэ үйлдвэрийн түүхий эдийн 70 хувь нь хог, 30 хувь нь нүүрс байх аж. Чингис хотынхон өдөрт 15-20 тонн хог хаягдал гаргадаг гэнэ. Тиймээс энэ хэмжээнд тохирсон станцыг Солонгос улсаас оруулж ирэхээр болжээ. Үйлдвэрт тэсэрч дэлбэрэх бодисоос бусад эмнэлгийн хог хаягдал, хуванцар, үхсэн малын сэг зэм гээд шатаж болох бүх төрлийн хог хаягдлыг боловсруулах юм байна.

Categories
мэдээ нийгэм

СӨХ бүр хуулийн булантай болов

Баянгол дүүргийн V дугаар хороо нь Дүүргийн Засаг даргын А/608 тоот захирамжийн дагуу “Айл хүний амь нэг” болзолт уралдаан зарлажээ. Энэ хүрээнд Хөршийн холбооны үйл ажиллагааг олон нийтэд сурталчилах зорилгоор “Олон нийт цагдаагийн хамтын ажиллагаа сэдэвт” нээлттэй хаалганы өдөрлөг зохион байгууллаа. Өдөрлөгт  иргэд болон албан байгууллагууд нийлсэн 100 орчим хүн оролцов. Өдөрлөгөөр Хөршийн холбоодууд хийж буй ажлаараа үзүүлэн зохион байгуулж  бусадтайгаа санал солилцов. Одоогоор СӨХ бүр хуулийн булан ажиллуулж байна. Мөн өдөрлөгийн үеэр иргэдээс санал авч, шинээр хөршийн холбоонд нэгдэх хүсэлтэй иргэдийг бүртгэн авчээ.