Month: June 2014

Хот хоорондын зорчигч тээвэрт явдаг бүх автобусанд хурд хэмжигч төхөөрөмж суурилуулжээ.

Ингэснээр  хот хооронд зорчигч тээвэрлэдэг жолооч нарын хариуцлага сайжирна гэж албаныхан үзэж байна.  

Өмнө нь хурд хэтрүүлснээс болж зам тээврийн осол их гардаг байсан. Харин энэ төхөөрөмжийг суурилуулснаар тээврийн хэрэгслийн жолоочийг 80 км цагаас хурдтай явбал удирдлагаас “Хурдаа хас” гэсэн дохио, сануулга өгөх гэнэ.

Мөн цаг агаарын тааламжгүй нөхцлөөс болж тээврийн хэрэгсэл төөрч, будилах, эвдрэл гэмтэл гарахад хаана байгааг нь тогтоох боломжтой юм.

Аялал жуулчлалаас байгаль орчинд үзүүлж байгаа сөрөг нөлөөллийг бууруулах зорилгоор Өвөрхангай аймгийн Бат-Өлзий сумын Улаан цутгалан, хүрхрээний эргэн тойрон дөрвөн км-т “Тусгай хамгаалалттай газар нутгийн сүлжээг бэхжүүлэх нь” төслөөс хамгаалалтын бүс тогтоожээ.

Хамгаалалтын бүс нь талуудын хамтын ажиллагааны нэг үр дүн юм.

Өвөрхангай аймгийн ЗДТГ санхүүжилтийг гаргаж, нутгийн иргэд, Орхоны хөндийн байгалийн цогцолборт газрын Хамгаалалтын захиргаа, Бат-Өлзий сумын ЗДТГ, Ойн анги хамтран гүйцэтгэжээ.

Ингэснээр  Хүрхрээгийн аман дээр байрладаг байсан аялал жуулчлалын баазууд, эко-гэрүүд уг хамгаалалтын бүсээс гадагш нүүж байрласан байна.

Хөвсгөл аймгийн ИТХТ-ийн тогтоолоор эмч нар төр хувийн хэвшилд давхар ажил  хийхийг хориглосон журам батлагдлаа. Тус аймгийн Нэгдсэн эмнэлгийн эмч нарын 25 нь хувийн эмнэлэгтэй, төр хувийн хэвшил хоёрт зэрэг ажиллаж байна.

Эмч нар төрийн үйлчилгээг хүргэхдээ хойрго, харьцааны соёлгүй байдаг хэрнээ хувийн эмнэлэгтээ болохоор илүү ач холбогдол өгч ажилладаг гэсэн иргэдийн дүгнэлт төрийн болон төрийн бус байгууллагын болон Авлигатай тэмцэх газрын судалгаагаар ч гарсан учраас бүх  хувийн  хэвшлийн эрүүл мэндийн байгууллага болон эмийн сангуудад атестатчилал явагдаж байна.

Шалгалтын дүнг Засаг даргын зөвлөлийн хурлаар авч хэлэлцэх ба стандартын шаардлага хангасан эмнэлгүүдэд тусгай зөвшөөрлийг олгож, хангаагүйг нь цуцлах төдийгүй эмч нар давхар ажиллахгүй аль нэгийг нь сонгон ажиллах журам батлагджээ.

Д.Түвшинбаяр гэгч нь “Т.Клугер” маркийн 91-77 УНД улсын дугаартай автомашин жолоодож явахдаа дугуй унан замын хөдөлгөөнд оролцож байсан хүүхдийг мөргөж, биед нь хүндэвтэр гэмтэл учруулжээ.

Энэ хэрэг нь өнгөрөгч сарын 31-ний өдөр Сонгинохайрхан дүүргийн 18 дугаар хорооны нутаг дэвсгэрт гарчээ. Уг хэрэгт харьяаллын дагуух цагдаагийн хэлтэс нь эрүүгийн хэрэг үүсгэн шалгаж байна.